Vagalatia 6 - KITABU KITAKATIFU

¹ Avaamitu vange, niiva mundu woosi yanyooleki nakora vwoni munyi avaveeye mu Roho gavadukiraa mumukonye vulungi mu vohoma. Navuzwa mwilindi aveene gase na munyi mulagerizwa kandi.

² Mukonyane kuginga uvulitu vwa vuli mulala nu wache, na munzira yiyi muladuukiza lilago lia Kristo.

³ Kigira niiva mundu ku vosi yiganagana aveeye kindu ing'inga ya ataveeye kindu, yigadaa mwene.

⁴ Navuzwa vuli mundu gamudukira agerizi miyinzi jije mwene, ahene yaho alava ni liekonya mwene, vugira kwifananyia ku wundi.

⁵ Mundu sa mulala alagiinga musigo gwigwe mwene.

⁶ Mundu wigizwa likuva liu Vukristayo kuduuka asaange ku vindu viosi vilahi viaveeye navio nu mwigizi weve.

⁷ Mutagadwa mba, Nyasaye sianyala kokolelwa kehenyahenye mba. Ichu mundu atagaa, nicho cha agesaa.

⁸ Niiva mundu alataaga mu mulimi ku liegomba lio muviri gwigwe mwene, alagesa ligesa lie likuza. Navuzwa niiva atagaa mu mulimi gwa Roho, kutura ku Roho, alagesa livamwoyo litahera mba.

⁹ Kunangwa kunyi kutaluha ku likora uvulahi mba, kigira kulavuna mu zing'inga ndahi, kulakagese niiva si kukuza mioyo mba.

¹⁰ Kunangwa ing'inga yakoveeye nu vwiyangu, kuduuka kokole uvulahi ku avandu vosi, mbitilira ku yavo avaveeye avinyumba yitu mu lisuuvira.

Lieganihiza kandi licheliza liu kumaliriza

¹¹ Mulole kuli zinduguta ziveeye zinene zia inzi mung'oderaa nu mukono gwange umwene!

¹² Avandu vageriza kuniga munyi mukevwe kuzinguru, ni yava avenyaa kwimanyia ndi vaveeye avalahi, nu kwekonya ku vindu viu muviri. Vakora ndio kunangwa vavuli kudambizwa kigira musalaba gwa Kristo.

¹³ Kali yava avakevwa sivalonda Lilaga aveene mba, navuzwa venya munyi mukevwe kunangwa vaduuki kwekonya ndi munyi mwavugilira muruka gwu mumuviri yigu.

¹⁴ Navuzwa, kulwa inzi, ndekonya vuzwa mwene kigira musalaba gwu Mwami wiitu Yeso Kristo. Kuvitira ku musalaba, vindu vie lirova viakuza kandi inzi ndaakuza kuvindu vie lirova.

¹⁵ Likevwa anoho kuvula kokevwa siliveeye kindu, navuzwa kindu keveeye kenene nikuva ekelombe kihia.

¹⁶ Mirembe, ni zimbavasi vive ku yavo vosi avagendaa mu lilago yili kandi ku avandu vosi va Nyasaye.

¹⁷ Kutura kalunu mundu woosi, atanyangiza mba, kigira ng'ingi ku muviri gwange zimbala zimanyia ndi mbeeye mutugwa wa Yeso.

¹⁸ Zimbavasi ziu Mwami wiitu Yeso Kristo zive harara ni munyi mwosi, avaamitu vange. Amini.