Vagalatia 5 - KITABU KITAKATIFU

¹ Koveeye no vovoholore mu Kristo na Kristo niyie wakovoholora. Kunangwa, singiri vudinyu kuli avandu vavoholore kandi mutavugilira kuva avatugwa kandi mba.

² Hulirizi! Inzi Paolo, muvooleraa ndi, nimuvugilira kokevwa, gaveeye kovora ndi Kristo siaveeye novokoonyi ku munyi kali hakuzu mba.

³ Nziganihizaa mundu woosi kandi havulavu uvugilira kokevwa, galamuniga kugumira nu kuhulira Lilaga liosi.

⁴ Yavo avagerizaa kokolwa avalungi imbiri wa Nyasaye ku lilonda Lilaga, vamali kwiyavukanyia vene kutura ku Kristo. Yavo vaveeye ichova wi zimbavasi zia Nyasaye.

⁵ Navuzwa, ku lisuuvira, kulindilira nu vuha kuvitira mu roho, vulungi vwi lisuuvirizwa.

⁶ Nikoveeye nu vuhambani na Kristo Yeso, likevwa anoho livula kokevwa silikoonyaa kindu, navuzwa lisuuvira likora miyinzi kuvitira mu vuyanzi.

⁷ Mwaali ni mukoraa vulahi! Nivwaha wamwigalira muvura kolonda agiligali? Yamugoonya kuli ndi?

⁸ Ligoonya yili siliatula ku Nyasaye ulangaa munyi mba.

⁹ Mamera makekeeke gaduvulaa lihumbi liosi lie kenoko ma liviimba.

¹⁰ Navuzwa ngikiri ni lisuuvira ni munyi kuvitira mu Mwami ndi, simulava nu mwoyo gundi kali mulala kutura ku aga ndaamuvolera mba, navuzwa ku vosi umukubizaa kivi alava ni likalagirwa lilie mwene na Nyasaye, kali naava naveeye vwaha.

¹¹ Navuzwa kulwa inzi avaamitu vange, nimba ni nzizagilira kwilwaza ndi likevwa lienyekanaa kalunu, kigira ki ngidambizwa? Kunangwa niiva yago gakaveeye agiligali, lilwaza liange kigira musalaba gwa Kristo sililaleeta vudinyu mba.

¹² Ndakayanzi yavo avamuhendizaa mwoyo vazie viilade aveene.

¹³ Avaamitu vange, munyi muve vavoholore. Navuzwa ovovoholore vwinyu vutahaana uvwiyangu vwi liegomba liu muviri kumwamiiha mba, navuzwa mutumikirane aveene naveene mu vuyanzi.

¹⁴ Lilaga liosi liduukiziywi mu lilago lilala: “Uyaanze mutende woovo kuli wiyanza mwene.”

¹⁵ Navuzwa, ni mulumana kuli zinyama ziu mbulimu nu kusalirizana aveene naveene, muhenze vulahi gase muladivizana aveene naveene.

Miyinzi ja Roho nu muviri

¹⁶ Navuzwa agambooraa ni yaga, muleke Roho yimiliri livamwoyo lienyu na munyi mulavula kudukiza liegomba liu muviri.

¹⁷ Kigira vindu vie liiva liu muviri gwu uvwoni gwenyaa vihing'anaa ni via Roho yenya, kandi via Roho yenya vihing'anaa na iviumuviri gwenyaa. Kigira yivi viviri viveeye uvusigu ku iviene ku viene; agaveeye kovora, simunyala kokora via munyi mwenya kokora mba.

¹⁸ Navuzwa Roho alamwimilira, simuveeye hasi hi Lilaga mba.

¹⁹ Kunangwa miyinzi jumuviri jiveeye havulavu, najo ni yiji, uvulaya, kifavwi, voheyi vwi zing'ano ziosi,

²⁰ ukusigamira vifananyi, ovologi, uvusigu, ovolembani, embodoka, uvutima, uvwimani, amahangari, ukwavukana, ukwikala vidieli,

²¹ likendeka, vwiti, uvuhambiku, uvuhuvaali vwi zing'ano ziosi, ni vindu kuli yivio; ndanga kumwiganihiza lero kuli lwa ndaamwiganihiza maziambiri. Yava avakolaa vindu kuli yivi sivanyala konyoora vwami vwa Nyasaye mba.

²² Navuzwa likuyu lia Roho liveeye uvuyanzi uvusangari; mirembe, uvwikuziri, zimbavasi, uvulungi, ovohooma, uvusuuvirifu,

²³ ovohocha, kandi ukwilinda. Sihaveeye ho ni lilaga lisuulanaa na makuva kuli yaga mba.

²⁴ Yavo avaveeye ava Kristo Yeso vamali kuvamba muviri harara ni liegomba lidamanu liagwo likayirwa liagwo.

²⁵ Nikuva nikoveeye mwoyo mu Roho, gendi kogende mu zinguru zia Roho.

²⁶ Leki kuvuli kuva ni liekonya lia vuzwa nu kutindilana aveene naveene, no kokolerana embodoka aveene naveene.