Vagalatia 4 - KITABU KITAKATIFU

¹ Kunangwa icha mboraa ni yiki mwana ulinyoola miandu ja baba weve akolelwa vuzwa kuli aveeye mutugwa lwa akikiri mwana, kali vindu viosi ni viveeye vivie.

² Lwa akikiri mwana muke aveeye hasi ha valindi kandi avasingiliri vi vindu vivie kuduuka ing'inga ya baba weve yalaga.

³ Munzira ndala nzere, kunyi kandi kwaali avatugwa va mademoni gamiihaa ni kukikiri kuhindira mu roho

⁴ Navuzwa lwa ing'inga indahi yaduuka, Nyasaye yatuma Mwana weve. Yaza kuli mwana wivulwa nu mukali, kandi namenya hasi hi Lilaga lia Avayuda,

⁵ aduuki kohonyia yavo avaari hasi hi Lilaga, kunangwa kunyi kuduuki kuva avana va Nyasaye.

⁶ Kumanyia ndi muveeye avana veve, Nyasaye yatuma Roho wu Mwana weve mu mioyo jietu, Roho uliraa ndi, “Abba,” liveeye kovora Baba!

⁷ Kunangwa ivi sioveeye mutugwa kandi, navuzwa oveeye mwana. Kigira oveeye mwana weve, Nyasaye alakuha miandu josi ja yavikira avana veve.

Lihenda mwoyo lia Paolo ku Avagalatia

⁸ Maziambiri, munyi si mwamanya Nyasaye mba, kandi ndio mwaali avatugwa vi vilombe vitaveeye avanyasaye va giligali.

⁹ Navuzwa kigira kalunu mumali kumanya Nyasaye, kandi kigira Nyasaye umali kumumanya, munyi munyala ndi kwirana ku mademoni gu vudaka kandi madedekere gamiihaa mu vwerefu? Kigira ki mwenya kandi avatugwa vago?

¹⁰ Munyi muhenzerizaa nu mukuminya amadiku, mieli, izing'inga mi mihiga.

¹¹ Mbeeye ni lihenda mwoyo kigira munyi, gase miyinzi ja ndakora hagati hinyu jilagota vugira vukala kandi jive hazwa.

¹² Ng'onyaa munyi avaamitu vange, muve kuli inzi. Kali ndio inzi mbeeye kuli munyi. Mukikiri kongolera uvudamanu vwosi.

¹³ Mumanyi ndi uvulwaye vwange nivwo vwahaana vwiyangu ku inzi kumwilwazira Ivangeri lwu kutanga.

¹⁴ Navuzwa kali niiva uvulwaye vwu muviri gwange vwakola munyi kuva nu vudinyu vonene, simwachaya inzi, kandi simwasuula mba; navuzwa mwanyingiriza kuli mwakakoli ku engelosi wa Nyasaye, kandi mwanyingiriza kuli mwakakoli ku Kristo Yeso mwene.

¹⁵ Mwali nu vusangali vonene! Ni ki chamanya nikigwa? Inzi mwene mboraa agiligali ku munyi. Galava gakanyaliki, ngano mwatuliza zimoni zienyu kuhaana ku inzi.

¹⁶ Kunangwa, mali kugwa musigu winyu mu limuvoolera agiligali?

¹⁷ Avandu vandi yavo vaveeye nu vugulu kung'usa munyi, navuzwa zing'anagani ziavo siziveeye zindahi mba. Venya kumwavukanyia ninzi, kunangwa munyi muduuki kuva nu vugulu vwi livenya kuli navo vaveeye navwo mu munyi.

¹⁸ Mu agiligali voveeye vulahi madiku goosi kuva nu vugulu niiva kivuni chavwo keveeye kilahi. Yaga gaveeye agiligali kazozo kandi sigaveeye lwa inzi mbeeye ni munyi lweng'ine mba.

¹⁹ Avana vange, avayaanze! Kuli mukali oveeye ni inda ahuliraa uvuzunu vwi inumwa, nindio inzi mbulira uvuzunu kigira munyi kuduuka lwa muva kuli Kristo mwene.

²⁰ Liegomba liange liveeye ndi, ndava nimunyi kalunu, ngano ndakaveeye ni zing'anagani lugano kumunyi, mbeeye ni lihenda mwoyo linene kigira munyi.

Hagari na Sara

²¹ Mboleri, munyi avayaanzaa muve hasi hi Lilaga: simuhuliraa ichi Lilaga zana livoora?

²² Gang'odwa mu Mang'oda Matakatifu ndi, Aburahamu yaali na avayaayi vaviri mulala wu mukali mutugwa, na wa kaviri wu mukali muvoholore.

²³ Mwana weve wu mukali mutugwa yiivulwa kolondekana ku liiva liu muviri, navuzwa mwana wu mukali muvoholore yiivulwa kolondekana ku lisuuvirizwa lia Nyasaye.

²⁴ Vindu yivi ni livaala liu musi ligali. Avakali vaviri yava vaveeye chokololera ku ichaagwa malagano gaviri. Oyo uwa avana veve viivulwa mu vutugwa ni Hagari, na aveeye mu vogono vwi lilagana lialombwa ha kiguru cha Sinai.

²⁵ Hagari, usingiyi mu vogono vwi kiguru cha Sinai mu Arebia, aveeye kuli lidaala Jerusalemi liveeye ho lero. Aveeye mu vutugwa harara na avandu valio vosi.

²⁶ Navuzwa lidaala lia Jerusalemi yu mwigulu liveeye livoholore, kandi liveeye mama wiitu.

²⁷ Mang'oda Matakatifu gavoora, “Usangale, ivi oveeye mukali mugumba. Hanzuka kandi uliri nu vuyanzi, ivi uwavula kuhulira uvuzunu vwi lilumwa liu mwana. Kigira mukali walekwa alakave na avana vanyingi kuvita va uyu uwavula kolekwa nu musaza weve. ”

²⁸ Kalunu munyi avaamitu vange, muveeye avana va Nyasaye kuli mativuli gi lisuuvirizwa lilie, kuli Isaka yaali.

²⁹ Ku ing'inga yeyo uyu mwana uwivulwa munzira ya kase yadambiza oyo uwivulwa kigira Roho wa Nyasaye, kandi gaveeye malala mere kalunu.

³⁰ Navuzwa Mang'oda Matakatifu gavoora ki? Gavoora, “Kunga mukali mutugwa harara nu mwana weve kigira mwana wu mukali mutugwa si alanyoola ku miandu ja baba weve harara nu mwana wu mukali muvoholore mba.”

³¹ Kunangwa, avaamitu vange, kunyi sikoveeye avana vu mukali mutugwa mba, navuzwa avu mukali muvoholore.