Vagalatia 1 - KITABU KITAKATIFU

¹ Inzi Paolo, uwa lilaangwa liange kuva mutumwa si liatura ku avandu, anoho kuvitira mu zinguru ziu mundu mba, navuzwa kutura ku Yeso Kristo kandi Nyasaye Baba, uwamusigukiza kutura mu likuza,

² Avaamitu vosi avaveeye hano vahambanaa ninzi mu lituma mirembe ku munyi amakanisa ga Galatia.

³ Nyasaye Baba wiitu kandi Mwami wiitu Yeso Kristo ahaane ku munyi zimbavasi ni mirembe.

⁴ Kristo yihaana umwene kigira uvwoni vwitu kolondekana nu vulaliri vwa Nyasaye oveeye Baba wiitu, aduuki kokohonyia mu likula lidamanu lia kalunu yili.

⁵ Uvukumi vove ku Nyasaye mihiga ni mihiga! Amini.

Ivangeri ndala yenyine

⁶ Ng'enyera munyi! Mu ing'inga ngekeeke mulekaa vwangu Nyasaye uwamulanga ku zimbavasi zia Kristo, kandi mugirung'ani nukuvugilira Ivangeri yu lugano lundi.

⁷ Mugiligali gene, sihaveeyeho ni “Ivangeri yindi mba”, navuzwa mboraa yaga kigira vaveeye ho avandu valala avamunyangizaa, kandi avagerizaa kugirung'anyia Ivangeri ya Kristo.

⁸ Navuzwa kali niiva mulala ku kunyi, anoho engelosi kutura mwigulu, alamwilwazira Ivangeri yindi, iyavukani ni ya kunyi kwamwilwazira, nivulahi akalagirwi kuzia mu gehena, kandi alaamwe!

⁹ Kwamala kugavoola maziambiri, kandi kalunu nziraniraa kovora: niiva mundu woosi amwilwazira Ivangeri eveeye lugano kwavukana ni ya mwavugilira, mundu oyo akalagirwi kuzia mu gehena kandi alaamwi.

¹⁰ Muganaganaa ngerizaa koteeva vandu anoho Nyasaye kovora ndi agambooraa sigaveeye malungi? Anoho ngerizaa kuyaanziza avandu? Niiva ndakagerizi kuyaanziza avandu, si ndakaveeye mutumikiri wa Kristo mba.

Kuli Paolo yagwa mutumwa wa Kristo

¹¹ Avaamitu vange, nyenya munyi mumanye ndi Ivangeri ya ndamwilwazira, sieveeye Ivangeri iyatangizwa nu mundu mba.

¹² Sindaagenyola kutura ku mundu woosi mba, kandi sindigizwa nu mundu woosi mba. Yaali Yeso Kristo mwene wavula makuva yaga ku inzi.

¹³ Munyi mwamala kovolerwa kuli ndamenya kale lwa ndaali nindagumira lisuuvira lia Vayuda, kandi kuli ndavambaliza likanisa lia Nyasaye vugira ku livererera, kandi ningora goosi aga ndaanyaliza kulidiviza ligali.

¹⁴ Ndaavita avanyingi ku Vayuda vache vange avi likula liange mu ligumira no kolonda lisuuvira lia Vayuda, niimba nu vugulu ligali kolonda miima ja avaguuga viitu.

¹⁵ Navuzwa zimbavasi zia Nyasaye zizie, yandovola kali ningikiri kwivulwa, kandi yananga kuvitira mu zimbavasi zizie nduuki kumutumikira. Kandi lwa yatovola

¹⁶ kuvuula Mwana weve ku inzi, kunangwa nduuki kwilwaza Ivangeri yeeye ku vandu vizihiiri, si ndaazia ku mundu woosi kwenya zing'anagani mba;

¹⁷ anoho si ndaazia Jerusalemi ku yavo avatanga kuva avatumwa imbiri wange mba; ndaazia vwangu kuduuka Arebia, ma inyima ni nzirana Damasiko.

¹⁸ Kunangwa inyima wi mihiga jivaga, ndaazia Jerusalemi konyoora makuva, kutura ku Petero. Ndaamenya harara naye ku madiku komi na gatano.

¹⁹ Sindalola avatumwa vandi mba, natali Yakobo, amwavo wu Mwami yengine.

²⁰ Aga inzi mung'oderaa gaveeye gagiligali. Nyasaye amanya vulahi ndi simbehanga mba!

²¹ Inyima wa yaga ndaazia muvivala via Siria na Kilikia.

²² Ing'inga yene yeyo, Avakristayo va makanisa gi Ivuyuda sivali ni vamanyi inzi moni na moni mba.

²³ Vaali ni vamanya vuzwa aga vahulira avandi ni vavoola: “Mundu wakudambizaa kale, lero yilwaza lisuuvira lia yaageriza kwononyia mulitanga!”

²⁴ Maku vaakuminya Nyasaye kigira inzi.