Vafilipi 4 - KITABU KITAKATIFU

¹ Kunangwa, vamiitu vange, munyi muveeye avayaanze vange mbeeye na mahooru kolola munyi ligali! Munyi mungolaa kuva nu vuyanzi kandi nzekonyaa kigira munyi. Gamudukira musingiri vudinyu mu Mwami.

² Ng'onyaa Eyodia na Sindike, mwaza ni muyanzaa mugerizi kuvugilirizana nu kuva nu mwoyo mulala kuli avavozo mu Mwami.

³ Ndeva ivi muyinziri musuuvirifu wache, yaanza okonye avakali yava. Vayinzira vudinyu harara ninzi kulandiza Ivangeri ni zinguru, harara na Kilemendi kandi avayinziri vache vosi, avamita gaavo gang'odwa mu kitabu chi livamwoyo.

⁴ Mu sangale mu Mwami kazozo. Mboraa kandi musangare!

⁵ Leki ovohocha vwinyu vumanyikane ku avandu vosi. Mwami yaazaa vwangu.

⁶ Mutava ni lihenda mwoyo ku kindu kali kilala, navuzwa lienya lienyu limanyikane ku Nyasaye mu lisaala, mumuteeve nu mwoyo gwi lisandiza.

⁷ Mirembe ja Nyasaye, ijiveeye igulu kuvita limanya liosi liu umundu, jilalinda imioyo jinyu kandi zing'anagani zienyu vulahi mu Kristo Yeso.

⁸ Mu limaliriza avaamitu vange mukore zing'anagani zienyu ziizuli ni vindu viveeye vilahi kandi ividukanaa vinyoole lizominywa; vindu viveeye vie ligali, viu vulungi, ivisereze, viu kuyaanziza kandi viu luyali.

⁹ Mukore vindu viosi via mwiga no konyoora kutura ku inzi kandi via mwahulira nimbora no kolola ningoraa. Na Nyasaye uhaanaa kunyi mirembe alava harara ni munyi.

Paolo yasandiza vandu va Filipi ku vihaanwa viavo

¹⁰ Sangala ligali mu Mwami kigira kalunu, inyima wi ing'inga indambi, munyooye uvwiyangu vwo kohendera inzi umwoyo ni mungoleraa ndio Simbolaa mwaali ni mwaleka ililinda mba navuzwa mwaadaka uvwiyangu kokora ndio.

¹¹ Simbolaa yaga kigira mwandeka mu uvudaka vwange mba, navuzwa ndaanala kwikuzira ne kekekeeke chambeeye nacho.

¹² Inzi manyi vulahi kuli gavezaa lwa umundu aveeza nilienya, kandi manyi kuli umundu aveeza, lwaveeye navio ivinyingi mbitilira. Inzi ndaamara kwiga ikivuni cha gene yaga ing'inga yoosi kandi havundu hoosi, nduuki kuva nu uvusangari, kali mbe ninziguta anoho nembeeye ninzara; mbe navio ivinyingi, anoho vikekeke.

¹³ Nyara kokora ivindu viosi kuvitira mu Kristo, uhaana ku inzi, izingulu kusingira.

¹⁴ Navuzwa mwakora vulahi ligali lwa mwangoonya mu vudinyu vwange.

¹⁵ Munyi Avandu va Filipi mumanya vulahi ligali lwa ndaatula Makedonia, mu madiku gu kutanga gukwilwaza Ivangeri, ni munyi veng'ine avamwangoonya. Nimunyi veng'ine vandetera vihaanwa.

¹⁶ Kali lwa ndaali mu Tesalonike, mwandetera ovokonyi haali kanyingi.

¹⁷ Sigaveeye nyenya vuzwa konyoora ivihaanwa, navuzwa nyenya kolola ivikolwa ivilahi nivimedekaa ku ga mumali.

¹⁸ Yee, mali konyoora ivindu viosi viamumali kuhaana ku inzi, kandi ni ivinyingi kuvita lienya liange. Mali kuvinyoora kuvitira mu amakono ga Epafurodita. Vihaanwa yivi viveeye kuli kihanwa kifunyaa umwayu umulahi ku Nyasaye; kandi viveeye isadaka indahi ivugilirwa nu kuyaanziza Nyasaye.

¹⁹ Nyasaye wange alahaana ku munyi lienya lienyu liosi kolondekana nu vukumi vwu uvutugi vwivwe mu kuvitira mu Kristo Yeso.

²⁰ Uvukumi vove ku Nyasaye Baba wiitu imihiga ni mihiga. Amini.

Milembe ju Kumaliriza

²¹ Muchelizi Vakrisitayo vosi mu Kristo Yeso. Avaamitu avaveeye harara ninzi hano vamuchelizi.

²² Avakristayo vosi hano vamuchelizi mbitilirayavo avaveeye vinyumba yu uvwami vwa Kaisari.

²³ Zimbavasi ziu Mwami wiitu Yeso Kristo zive harara ni munyi mwosi.