Vafilipi 2 - KITABU KITAKATIFU

¹ Ilivamwoyo lienyu mu Kristo limukolaa kuva ni zinguru, kandi uvuyanzi vwivwe vumuleminyaa umwoyo. Muveeye ni lisanga harara na Roho kandi muveeye nu mwoyo umulahi kandi muveeye nizimbavasi kandi liverererana vene naveene.

² Ng'onyaa munyi mukore ilisangala liange litwekizwi ku liiva ni zing'anagani zindala nzere, lisanga mu uvuyanzi vulala vwere, mu liiva nu mwoyo mulala kandi uvulariri vulala.

³ Mutakola kindu kali kilala kuturana ni liegomba lie vindu vie kivala anoho iliekonya lia vuzwa mba, navuzwa muve ni liegehiza aveene naveene. Vuli kazozo, muganagane avandi kuva avalahi kuvita munyi.

⁴ Umundu sa mulala atahenza amakuva geege umwene mba, navuzwa aheenze lienya lia vandi.

⁵ Muve ni liiva lilala liere ilia Kristo Yeso yaali nalio:

⁶ Yaali ni liiva lia Nyasaye vuli kazozo, navuzwa siyaganagana agerizi kutumikira zinguru kweleng'anyia na Nyasaye mba.

⁷ Mu vogono yivwo, yihaana, naleka viosi via yaaha navio ma navugura liiva liu umutumikiri. Yekola kuli umundu wa kazozo kandi naaloleka mu liiva liu mundu.

⁸ Yaali mwegehizi kandi nagenda mu liiva liu kutia kuduuka mu likuza likuza lilie ku musalaba.

⁹ Kulwa yaga, Nyasaye yamunenehiza kuduuka higulu ligali na yamuha lieta iliveeye linene kuvita agandi goosi.

¹⁰ Kandi ndio, mu lihaana luyali ku lieta lia Yeso, ivilombe viosi mwigulu, ku lirova, nu mu lirova musi valagwa ku amalu gaavo,

¹¹ kandi vandu vosi valalaandiza havulavu ndi Yeso Kristo nu Mwami, kigira uvukumi vwa Nyasaye oveeye Baba.

Kong'ereng'ana kuli vulavu ku avandu vu mu lirova

¹² Kunangwa, avalina vange vayanze, kuli mwahulira kutura ku inzi lwa ndaali nimunyi kazozo, kuduuka muhuliri kandi kalunu lwambeeye ihale kutura ku munyi. Muzizagiliri kuyinzira nu vuti kandi ni lidegera kunangwa muduukizi ovohonyi vwinyu,

¹³ Nyasaye akolaa imiyinzi mu munyi kazozo kumukola muduuki kuvugilira kandi kuhulira uvulariri vwivwe umwene.

¹⁴ Mukore ivindu viosi vugira liegana anoho amahangari,

¹⁵ kunangwa muduuki kuva avataveeye nimbara, kandi avasereze kuli avana avadukiru va Nyasaye, avamenyaa mu kivala cha avandu avagoyanu kandi avoni. Kuduuka mung'ereng'ane hagati haavo kuli zing'ereng'ani mwigulu,

¹⁶ lwa muva muvahezaa likuva lie livamwoyo. Nimuva nimukora ndio, inzi ndava ni kivuni chukwekonya kigira munyi Lidiku lia Kristo, kigira lilamanyia ndi ilinyang'ana liange liosi harara ni miyinzi josi sijali ja vuzwa mba.

¹⁷ Hawundi amasahi gi livamwoyo liange gaduukanaa gasundulwi kuli kihanwa ku kisiuviriru chi lisuuvira lienyu lihaana ku Nyasaye. Niiva gaveeye ndio, inzi nyanza, kandi sangala harara ni munyi mwosi.

¹⁸ Munzira ndala nzere, munyi muyanze kandi musangare harara ninzi.

Timateo na Epafurodita

¹⁹ Suuviraa, Mwami Yeso nayanza, ndava ninduma Timateo ku munyi vwangu, nduuki koleminywa umwoyo na makuva ginyu

²⁰ Simbeeye nu mundu wundi kuli uyu oveeye ni lienya lia giligali mu liiva lienyu mba.

²¹ Avandu vandi vahenderaa vuzwa lienya liavo aveene, na sivahenderaa ivindu via Yeso Kristo mba.

²² Na munyi aveene mumanya kuli Timateo aveeye umudukiru, kuli oyo ninzi, nikoveeye kuli umwana na baba weve, kwayinzira harara kigira lilandiza Ivangeri.

²³ Kunangwa suuviraa ndamutuma yaaze ku munyi vwangu, lwa inzi manya kuli ivindu vimanya vive kolovega lwange.

²⁴ Mbeeye ni lisuuvira mu Mwami inzi mwene ndi ndaaza nzizi ku munyi vwangu ligali.

²⁵ Ng'anagana ni vulahi kutuma ku munyi Epafurodita, amiitu wange, umuyinziri kandi umusikari wakuyinziraa harara naye. Aveeye mutumwa winyu uwamwatuma kuuza kundumikira mu lienya liange.

²⁶ Aveeye ni lienya ligali kolola munyi mwosi, na yaveeye ni liverera kigira munyi mwahulira ndi aveeye umulwaye.

²⁷ Yee yaali umulwaye ligali kali himbi akuzi. Navuzwa Nyasaye yamuvererera na siyaali yenyine mba, navuzwa inzi kandi, yangoonya kunangwa ninema umwoyo.

²⁸ Kunangwa ndakora izingulu kutuma Epafurodita ku munyi vwangu, kandi lwa mumulola, mulava nu uvusangari, no ovovereri vwange vulagota.

²⁹ Mumwingirizi nu uvusangari vwosi kuli aminyu mu Mwami. Muhaane uluyali ku avandu avaveeye kuli oyo,

³⁰ Yavika livamwoyo lilie liosi mu uvuhiimwa, kali naava ahimbi kukuza kigira imiyinzi ja Kristo. Yiviika mu uvuhiimwa ni yenya kongonya ligali kuvita munyi.