Vafilipi 1 - KITABU KITAKATIFU

¹ Inzi Paolo na Timateo, avatumikiri va Kristo Yeso, Kong'oderaa munyi Avakristayo vosi mu Filipi avahambanywa na Kristo Yeso, avahenzi na aviimiliri va amakanisa harara na avakonyeleri vaavo.

² Nyasaye Baba wiitu harara nu Mwami Yeso Kristo ahaane kumunyi zimbavasi ni mirembe.

Ilisaala lia Paolo ku Vafilipi

³ Sandizaa Nyasaye wange zing'inga ziosi lwa nzizuliza munyi.

⁴ Vuli ing'inga lwa salira munyi mwosi, saalaa nu uvusangari

⁵ kigira ovokonyi vwinyu ku inzi mu miyinzi ju kulandiza Ivangeri kutura lidiku liukutanga kuduuka lero.

⁶ Mbeeye ni lisuuvira ligali ndi Nyasaye watanga miyinzi milahi yiji mu munyi, alazizagilira najo kuduuka ajitwekizi ku Lidiku lia Kristo Yeso.

⁷ Gaveeye malungi inzi kuganagana ndio ku munyi mwosi, kigira muveeye mu mwoyo gwange kazozo! Munyi mwosi muveeye avasangi harara ninzi mu zimbavasi zia Nyasaye yahaana ku inzi, lwa mbeeye muvuhambe kalunu, kandi ing'inga ya ndaali umuvoholore kosoola Ivangeri kandi kugidinyiriza ligali.

⁸ Nyasaye aveeye mulolekizi wange ndi mboraa agiligali, lwambolaa ndi vuyanzi vwange ligali ku munyi mwosi vuturaa ku Kristo Yeso.

⁹ Saalaa ndi uvuyanzi vwinyu vomeedeke ligali harara ni limanya liagiligali, kandi likalaga liduukiru,

¹⁰ kunangwa muve avanyala kotovola ivindu viveeye ivilahi ligali. Maku mulava vavoholore kandi avataveeye nimbara yoosi ku Lidiku lia Kristo.

¹¹ Livamwoyo lienyu liosi liliizula amakuyu goosi gu vulungi agatulaa mu Yeso Kristo kuduuka ku uvukumi ni ilizominywa lia Nyasaye.

Kuva mwoyo kulwa inzi ni kutumikira Kristo

¹² Nyenya munyi mumanye, avaamitu vange ndi, ivindu viosi viekoleka ku inzi vimali ligali kokonya ligali lizizagilira lie lilandiza Ivangeri.

¹³ Kuturana ku ageene yago, avasikari vosi avaveeye munyumba yu uvwami kandi avandu vandi vosi hano vamanyi vulahi ndi mbeeye muvuhambe kigira mbeeye mutumikiri wa Kristo.

¹⁴ Livofwa liange muvuhambe limali kuhaana lisuuvira linyingi ku vamiitu vange mu Mwami kandi vave nuvuluviliri ligali mu lilwaza ilikuva lia Nyasaye vugira uvuti.

¹⁵ Gaveeye agiligali ndi avalala kuvo vilwaza Kristo kigira vaveeye nembodoka kandi ovolembani, navuzwa avandi vilwaza Kristo nu mwoyo mulahi.

¹⁶ Yava vakora ndio kutura ku uvuyanzi kandi vamanya vulahi ndi Nyasaye yamalakuhaana ku inzi imiyinzi jo kosoola Ivangeri.

¹⁷ Avandu vukutanga yavo sivilwazaa Kristo nu mwoyo mulahi mba navuzwa mu roho wi liegomba vindu vie kivala vaganagana ndi valameeda ikivi ku inzi lwa mbeeye muvuhambe.

¹⁸ Sigaveeye kindu mba! Inzi mbeeye nu uvuyanzi kigira yaga niiva Kristo anyala kwilwazwa mu liiva liosi lienyekaa kali nigava gaturaa ku vugadi anoho ku vulungi. Ndazizagilira kandi kusangara,

¹⁹ Kigira manya ligali kuvitira mu Lisaala lienyu harara no ovokonyi vwi kihanwa cha Roho wa Yeso Kristo, inzi ndavoholorwa.

²⁰ Ilikayirwa ni lisuuvirizwa liange linene liveeye ndi, inzi mburi kwononya miyinzi jange, navuzwa vuli kazozo mbitilira kalunu ndakave nu vuluviliri ligali, kunangwa mu liiva liange liosi ndakaleete uvukumi ku Kristo, kali niiva ndava mwoyo anoho nguzi.

²¹ Ku inzi, kuva mwoyo ni Kristo, kandi kukuza nuvukara ovonene.

²² Navuzwa niiva ndazizagilira kuva mwoyo mangole miyinzi milahi, ku inzi simanyi ichanyala kotovola mba.

²³ Mbeeye hagati hi zimbega ziviri. Nyenya koleka livamwoyo yili kuzia komenya harara na Kristo, kigira yiki keveeye kindu kilahi ligali.

²⁴ Navuzwa gaduukiraa mbe mwoyo mu muviri kigira munyi.

²⁵ Mbeeye ni lisuuvira ni yaga, kandi manyi ndi ndakamenye. Nazizagilira komeeda ku lizizagilira lienyu kandi vusangali mu lisuuvira,

²⁶ kunangwa lwa inzi mba ni munyi kandi mulava ni kivuni ikidukiru ikinyala kumukola mwekonye kigira livamwoyo lienyu harara na Kristo Yeso.

²⁷ Kindu kenene keveeye ndi, liiva lie limenya lienyu lidukanaa live kuli Ivangeri ya Kristo yenya, kunangwa, kali niiva ndaza, anoho niimbura kuuza ndakahuliri ndi munyi mwasingira vudinyu harara kandi muveeye ni kivuni kilala. Nandio, mulava ni mulwaniraa uvulala vwi Ivangeri mu lisuuvira.

²⁸ Mutatia avasigu vinyu mba; muve avaluviriri kazozo. Yiki kilava ekelolero kuvamanyia ndi valagotiza navuzwa munyi mulaguuta, kigira Nyasaye niyie uhaanaa ku munyi iliguuta.

²⁹ Munyi muheveywi uvwiyangu vwukutumikira Kristo, sigaveeye ku lisuuvira muye lienyine, navuzwa kandi kigira ilisalira kigira Kristo.

³⁰ Munyi harara ninzi koveeye mu vulwani vulala vwere kuli mwaandola mazambiri, kandi vwa muhulira, inzi ngilwaanaa vulwani yivu.