Vafeso 5 - KITABU KITAKATIFU

¹ Kigira muveeye avana avayaanze va Nyasaye, kuduuka kuva kuli aveeye.

² Livamwoyo lienyu kuduuka liamiifwi nu vuyanzi kuli Kristo yakuyaanza nahaana livamwoyo lilie mwene kigira kunyi kuli kihanwa kifunyaa mwayu mulahi kandi sadaka yukuyaanziza Nyasaye.

³ Kigira munyi muveeye vandu va Nyasaye, sivaveeye vulahi amakuva goosi go voheyi, anoho komenya mu miima midamanu jovoheyi, anoho likayirwa, nu uvuviti vitalwe hagati hinyu kali hakuzu mba.

⁴ Kifavwi, anoho amakuva gi zisoni nu guvusiru, anoho amahing'ani, anoho zimbaka, sividukana munyi kuvitivula mba, navuzwa nivulahi musandizi Nyasaye.

⁵ Kigira yaga muve nilimanya ligali ndi, umuheyi woosi anoho utaveeye munifu mu miima, muhuvaali, wi vifananyi mukayirwi, siaveeye nilisanga mu vwami vwa Kristo kandi vwa Nyasaye mba.

⁶ Mutaleka mundu kali mulala amugaade na makuva gu vusiru mba; gaveeye kigira vindu yivi uvutima vwa Nyasaye vuduuka ku avandu vosi avavuraa kumutia.

⁷ Kunangwa mutava ni lisanga harara na avandu kuli yava mba.

⁸ Maziambiri, munyi mwali mu kisundi, navuzwa kalunu muveeye nu vulavu mu mwami; kunangwa kuduuka mumenye kuli vana vu vulavu.

⁹ Likuyu liu vulavu linyoolekaa mu goosi gaveeye malahi, malungi kandi agiligali.

¹⁰ Mugerizi kwiga agayaanziza Mwami.

¹¹ Mutava ni lisanga ni miyinzi ji kisundi ijitaveeye nu vukala mba, navuzwa nivulahi mujichaye havulavu.

¹² Ziveeye zisoni kali kovora vindu via vandu vatatizaa Nyasaye vakora mu vwivisu.

¹³ Navuzwa lwi vindu viosi viletwaa ku vulavu, ahene yaho liiva liavio lieligali livuulikaa havulavu;

¹⁴ Kindu choosi ikivuuliywi havulavu kigwizaa uvulavu. Yiki nicho kigira nigavooleka, “Vuka, O, ivi ugonaa, simuguka kutura mu likuza, kandi Kristo alang'ereng'ana ku ivi.”

¹⁵ Kigira yaga, muhenze vulahi kuli mumenyi. Mutamenya kuli avandu vasiru, navuzwa kuli avandu vovogeri.

¹⁶ Mutumikiri vulahi uvwiyangu vwa muveeye navwo ku likora vulahi, kigira zing'inga yizi ziveeye zidamanu.

¹⁷ Kigira yaga, mutava avasiru, navuzwa mugerizi kumanyiriza uvulariri vwu Mwami.

¹⁸ Mutahambika iwaini mba kigira imanya imudivizi; navuzwa mwizuli Roho du.

¹⁹ Muvolerane aveene naveene makuva gi zizaburi, muzinyimbu kandi mu zinyimbu zindakatifu. Mwimbi zinyimbu kandi zizaburi ku Mwami ni lizominya mu mioyo jinyu ku Mwami.

²⁰ Mwizominye kandi muhaane lisandiza kazozo ku Baba Nyasaye kigira vindu viosi mu lieta liu Mwami wiitu Yeso Kristo.

Kuli avakali na vasaza vaduukana vamenye

²¹ Mwegehizirane aveene naveene mu liitia Kristo.

²² Munyi avakali, mwegehizi ku vasaza vinyu kuli munyala kwegehiza ku Kristo.

²³ Musaza aveeye mutwi gwu mukali kuli Kristo aveeye mutwi gwi likanisa kandi aveeye muhonyi wilikanisa, iliveeye kuli muviri gwigwe.

²⁴ Kuli likanisa liegehiziraa Kristo, kandi ndio kuduuka avakali vegehizi ligali ku vasaza vaavo mu vindu viosi.

²⁵ Avasaza muyanze avakali vinyu kuli Kristo yayanza likanisa naalikuzira.

²⁶ Yakola yaga aduuki kulitakasa ku Nyasaye ni likuva lilie, lwa mali kulinihiza na amazi

²⁷ aduuki kwenyolera likanisa liu vukumi litaveeye nimbara anoho makunya anoho kindu kidamanu kuli yivi.

²⁸ Na ndio kandi avasaza kuduuka vayanze avakali vaavo kuli vayaanza miviri jaavo aveene. Musaza uyanza mukali weve, yiyanzaa mwene.

²⁹ Sihaveeyeho nu mundu ku vosi uvihiliraa inyama yu muviri gwigwe mwene mba; navuzwa agulihizaa kandi agodenda, kuli Kristo adendaa likanisa,

³⁰ kunyi koveeye vivero viu muviri gwigwe.

³¹ Kuli Mang'oda Matakatifu gavoora, “Kigira yaga, musaza alaleka baba na mama weve naye alahambanywa nu mukali weve. Yava vaviri valagwa muviri mulala.”

³² Agiligali gaviswa yaga gaveeye manene, navuzwa gaveeye kelolero cha Kristo ni likanisa.

³³ Gaveeye ndio ku ivi; kandi musaza sa mulala ayaanze mukali weve kuli mwene yiyaanza, kandi mukali kuduuka ahaane luyali ku musaza weve.