Vafeso 4 - KITABU KITAKATIFU

¹ Kunangwa, inzi oveeye muhambe kigira ndumikiraa Mwami, mugoonyaa mumenye kolondekana ni liiva lia Nyasaye yaviikaho lwa yamulanga.

² Muve ni liegehiza kazozo, vahoma kandi vikuziri; Mumanyie vuyanzi vwinyu ku liekuzirana aveene na vene,

³ muve ni zinguru kulinda uvuhambani vwa Roho ahaanaa kuvitira mu mirembe ji muviika harara.

⁴ Haveeye nu muviri mulala, kandi Roho mulala, kuli haveeye kandi ni lisuuvirizwa lilala lia Nyasaye yamulangira.

⁵ Haveeyeho nu Mwami mulala, nilisuvira lilala, nilibatiza lilala.

⁶ Haveeyeho na Nyasaye mulala, naye oveeye Baba wa avandu vosi, oveeye Mwami wa vandu vosi, kandi uyinziraa kuvitira mu kunyi vosi kandi omenya mu vosi.

⁷ Navuzwa sa mulala ku kunyi yanyoora kihanwa kidukiru chi zimbavasi kolondekana ne kegero chi kihanwa kilahi cha Kristo amali kuhaana.

⁸ Mang'oda Matakatifu gavoora, “Lwa yanigira igulu mwigulu ligali, yimilira muganda munene gwa vahambe, kandi yahaana vihaanwa ku avandu.”

⁹ Kunangwa kalunu likuva yili, “Yanigira igulu” livoora ki? Gaveeye kovora ndi, kutanga yika ni yingira musi ligali mwi lirova.

¹⁰ Kunangwa, uyu uwiika musi ligali mwi lirova niyie mulala mwere uwanigira igulu ligali kuvita ligulu liosi, aduuki kwizura mwigulu ni liiva lilie liosi.

¹¹ Yaali niyie uwahaana ivihaanwa kuvandu kuli ndi: yatovola valala vave avatumwa na avandi vave avaporofeti, avandi vave avilwaazi vakulandiza Ivangeri, avandi avayi kandi avigizi.

¹² Yakola ndio kwetegekiza Avakristayo vosi ku miyinzi ju vutumwa vwu Vukristayo kunangwa aduuki kwumbaka muviri gwa Kristo.

¹³ Kandi ndio, kunyi kwosi kulakaze harara muvuhambani vwi lisuuvira lieta kandi mu limanya lietu liu Mwana wa Nyasaye. Kulakave avandu avahindira avadukanga ku kegero chu vuduukiru vwosi ovonyoleka mu Kristo.

¹⁴ Kunangwa sikulava kandi kuli avana vadoto avahilwaa yiyi ni yiyi ni viguvuli kandi avahunzulanywa ni zimbuza zia amigizu guvugadi zing'ano ziosi ga avandu, avimiliraa avandi kuduuka mu mahiolo nuvugadi vwavo vwa vatangiza.

¹⁵ Mu vogono yivwo, ku limoloma agiligali mu Roho gwu vuyanzi, gakuduukiraa kuviruki mu liiva liosi lia Kristo, oveeye mutwi gwi likanisa.

¹⁶ Kuye vivero viosi viu muviri vihambanyiywi harara, kandi muviri gwosi gwahamanywa harara navuli chungu. Kunangwa, lwa vuli kevero kiyinziraa kuli gaduukanaa, muviri gwosi guvirukaa ma gwumbakwa kuvitira mu vuyanzi.

Liiva lihia mu Kristo

¹⁷ Mu lieta liu Mwami, nziganihizaa munyi ndi: Mutazizagilira komenya kuli avandu vatamanyi Nyasaye mba vamenyaa mba; aviziganagani ziavo zindamanu ziveeye izia vuzwa

¹⁸ avovogeri ni limanya liavo viveeye mu kisundi. Sivaveeye ni lisanga mu livamwoyo lia Nyasaye ahaanaa mba; kigira livula kumanya kandi kuva ni mioyo midinyu.

¹⁹ Vamali kogotiza liiva liu kuva mu zisoni, vihaana aveene mu kifavwi chi zing'ano ziosi kandi vakora uvudamanu zing'ano ziosi vugira liegaya.

²⁰ Navuzwa, munyi simwaza kumanya Kristo kuli ndio mba.

²¹ Gaveeye havulavu, mwahulira vulahi amakuva geege, kandi kuli avalondi veve mwigizwa agiligali agaveeye mu Yeso.

²² Kunangwa, mutulizi mundu winyu wa kale uwamukola mumenye kuli mwamenyaa; mundu wa kale wdivizwaa ni likayirwa lilie liuvugadi.

²³ Mugirung'ane kandi mukolwe avahia mu Roho nomu zing'anagani zienyu,

²⁴ kuduuka mwiviki liiva liu mundu muhia, ilialombwa muliiva lia Nyasaye, lievulaa liene mu liiva lia giligali kandi uvutakatifu.

²⁵ Kigira yaga, musuuli uvovehi, vuli mundu gamuduukira avolere musuuviri wache gagiligali, kigira koveeye kwosi kevero kilala aveene naveene harara mu muviri gwa Kristo.

²⁶ Nimuveeye nuvutima, mutakoli uvwoni mba. Mutaleki liuva liyeere nimuveeye nuvutima mba.

²⁷ Mutahaana uvwiyangu ku Setani mba.

²⁸ Mundu wivaa atiiva kandi mba, navuzwa nivulahi adidikane, ayinziri na makono geege, akole kindu keveeye chuvusuuvirifu, kandi aduuki kuva mundu unyala kokonya mudaka.

²⁹ Mutaleki likuva lidamanu kali lilala lituli mu minwa jinyu kali hakuzu mba, navuzwa muvoore makuva gaveeye malahi gukwumbaka gaduukanaa ni ing'inga yene yeyo, kandi gaduuki kuhaana zimbavasi kuyavo vagahulira.

³⁰ Mutavereriza Roho Mutakatifu wa Nyasaye mba; kigira Roho aveeye muhuri gwa Nyasaye ku munyi, kugamanyia ndi lidiku lilakaduuki lia Nyasaye alakahaane vovoholore ku munyi.

³¹ Muleke uvululu vwosi, nuvutima, nilivihilirwa; niliyoga, namanyego, vitulizwi mu munyi harara nembodoka yoosi.

³² Muve novohooma aveene ku aveene; muve nu mwoyo gwi zimbavasi kandi musamiihane aveene naveene kuli Nyasaye yasamiha munyi mu Kristo.