Vafeso 3 - KITABU KITAKATIFU

¹ Kigira yaga inzi, Paolo, muhambe wa Kristo Yeso kulwa munyi vandu vizihiiri, saalaa ku Nyasaye.

² Suuviraa ligali munyi mwamala kuhulira ndi, Nyasaye, mu zimbavasi zizie, yamalakuhaana ku inzi miyinzi yiji ngole kigira madanyi ginyu.

³ Nyasaye yambulira lilohiza lilie liu mu vwivisu kandi nalikora limanyikane ku inzi. Mali kong'oda mu vwimbi amakuva yaga,

⁴ kandi niiva mulasooma icha mali kong'oda, munyala kwiga nukumanya limanyiriza liange lia agaviswa ga Kristo.

⁵ Zing'inga ziavita, mundu siyavoolerwa amakuva gaviswa yaga mba, navuzwa Nyasaye umali kugavura kalunu ku Roho ku avatumwa na vaporofeti veve vatakatifu.

⁶ Agaviswa gene ni yaga: kuvitira mu Ivangeri ya Nyasaye, vandu vizihiiri vagwiyi avasangi vi miandu harara na Avayuda mu zimbavasi zia Nyasaye; vave muviri mulala na vasaange mu lisuuvirizwa lia Nyasaye yalomba kuvitira mu Kristo Yeso.

⁷ Inzi ndakorwa mutumikiri wi Ivangeri ku kihanwa kidukiru chi zimbavasi zia Nyasaye cha yamba kuvitira mu miyinzi ji zinguru zizie.

⁸ Kali nimbeeye mukekeeke ligali ku vandu va Nyasaye vosi, Nyasaye yamba zimbavasi zizie yizi, nduuki kwilwaazira vandu vizihiiri kigira uvutugi vwokogenyia vwa Kristo uvutanyala kwenyelerizwa;

⁹ Kandi ngole avandu vosi vaduuki kolola kuli lilohiza lia agaviswa ga Nyasaye liduukizwa. Nyasaye, oveeye mulombi wi vindu viosi yaavisa imbisu kutura kale,

¹⁰ kunangwa ku ing'inga ya lero, kuvitira munzira yi likanisa, zingelosi vamiihi, kandi vaveeye ni zinguru mwigulu vaduuki kwiga kuli Nyasaye aveeye mugeri mu liiva liosi.

¹¹ Nyasaye yakola yaga kolondekana nu vulaliri vwivwe uvutahera mba, vwa yanyoora kuvitira mu Kristo Yeso Mwami wiitu.

¹² Kunangwa, mu lihambanywa lietu na Kristo kandi kuvitira mu lisuuvira lietu muye, kunyi koveeye nuluviliraa kuzia imbiri wa Nyasaye vugira uvuti vwosi.

¹³ Kunangwa mugoonyaa ligali, mutakuza mioyo mba kigira salira kulwa munyi; yaga gaveeye uvukala vwinyu.

Uvuyanzi vwa Kristo

¹⁴ Kigira yaga, sigamaa mu lisaala imbiri wa Baba,

¹⁵ oveeye uvutangiliru vwa vuli ihiiri yu mwigulu kandi ya haasi enyooraa lieta liayo liagiligali.

¹⁶ Inzi saalanga ku Nyasaye kutura ku vuhinda vwu vukumi vwivwe ahaane zinguru kumunyi kuvitira mu Roho weve, muduuki kuva nizinguru mu liiva lienyu liu mugati.

¹⁷ Saalanga ndi kandi Kristo aduuki kolomba vomenyo vwivwe mu mioyo jinyu kuvitira mu lisuuvira. Saalanga ndi vuyanzi vuduuki kuva musingi gwivindu viosi via mukoraa,

¹⁸ kunangwa, munyi harara na vandu va Nyasaye vosi muduuki kuva nizinguru ziu kumanyiriza uvuyanzi vwa Kristo vutaveeye nekegero.

¹⁹ Yee, muduuki kumanya uvuyanzi vwa Kristo uvuvitaa limanya liosi, ndi muduuki kwizulwa ligali nu vuduukiru vwosi vwa Nyasaye.

²⁰ Kalunu uyu, wi zinguru zizie ziyinziraa mu kunyi, anyala kokora amanyingi ligali kuvita yago agakunyala koteeva anoho kuganaganaa.

²¹ Uvukumi vove ku Nyasaye mu likanisa kandi mu Kristo Yeso, zing'inga ziosi, mihiga ni mihiga. Amini.