Vafeso 2 - KITABU KITAKATIFU

¹ Maziambiri munyi mwaali avakuzu mu Roho kigira lihiola kandi uvwoni vwinyu.

² Ing'inga yeyo mwamenya kolondekana ni liiva lidamanu lie lirova, Kandi mwaloonda nukuhulira liiva lio mwami wa mademoni gi zinguru mu vwerefu, mademoni gamiihaa avandu avatahuliraa Nyasaye.

³ Mu agiligali Kunyi kwosi kwaali kuli yavo. Kandi Kwamenya kolondekana nilikayirwa lidamanu lie miviri jietu, nikokola choosi ichayaanziza lienya liu miviri kandi zing'anagani zietu aveene. Mu liiva lietu liu muviri, kunyi kuli avandu vandi, kwadukana konyoole vusaliri vwu vutima vwa Nyasaye.

⁴ Navuzwa livelererwa lia Nyasaye, liveeye linene ligali kandi uvuyanzi vwivwe ku kunyi voveeye vonene kuvita kegero;

⁵ ndi lwa kwaali avakuzu mu Roho kigira mahiolo giitu, yakokola kove mwoyo harara na Kristo. Gaveeye ku zimbavasi zia Nyasaye ndi munyi muhonyiywi.

⁶ Mu lihambanywa lietu harara na Kristo Yeso, Nyasaye yakusimugukiza kutura mu likuza lia Roho harara na Kristo, kunangwa muduuki kwamiiha naye mwigulu.

⁷ Yakola ndio kunangwa aduuki kumanyia mu zing'inga ziosi izizaa, ovonene vwuvutugi vwi zimbavasi zizie muvuyaanzi vwa yamanyia kunyi kuvitira mu Kristo Yeso.

⁸ Gaveeye ku zimbavasi zia Nyasaye, munyi mumali kohonywa kuvitira mu lisuuvira, kandi yaga sigaveeye kigira mativuli gi zinguru zienyu mba, navuzwa keveeye kihanwa cha Nyasaye.

⁹ Sigaveeye kigira vikolwa vienyu aveene kunangwa mundu ku woosi avuli kwiyizominya mba.

¹⁰ Nyasaye umali kokolomba kuli koveeye, kandi mu lihambanywa harara na Kristo Yeso, yalomba kunyi kigira livamwoyo lie vikolwa vilahi, viamali kwetegekizira kunyi kuduuki kokora.

Uvuhambani mu Kristo

¹¹ Kunangwa mwizurizi ndi mwaali vandu vizihiiri ku liivulwa maziambiri. Mwalangwa, “avatakevwa,” na Avayuda avilangaa “avakevwa,” yili ni likevwa liu muviri.

¹² Mwizurizi ndi ing'inga yeyo, mwaali ni mwavukanywa kutura ku Kristo. Mwaali avageni kandi simwali valala ku avandu vatovole va Nyasaye mba; simwali ni lisanga mu malagano gi lisuuvirizwa lia Nyasaye ku avandu veve mba. Mwamenya mu lirova linu vugira lisuuviriza kandi vugira Nyasaye.

¹³ Navuzwa kalunu, mu Kristo Yeso munyi avamwali ihale maziambiri, muleeteywi ahimbi kuvitira mu masahi ga Kristo.

¹⁴ Kristo mwene oleeti mirembe ku kunyi mu likora Avayuda na vandu vizihiiri kuva avandu vi ihiiri ndala. Yasambula lidiji iliavavukanyia kandi iliavakolaa vave avasigu.

¹⁵ Yeso yaatuliza ho Lilaga lia Avayuda harara na malago galio kandi ni miima jalio aduuki kolomba zihiiri ziviri yizio kugwa ihiiri ndala imbia muye, nokoleta mirembe hagati haavo.

¹⁶ Ku likuza lilie ku musalaba, Kristo yadiviza vusigu vwavo. Kuvitira kunzira yu musalaba gwigwe yahambanyia zihiiri ziombi mu muviri mulala kandi naaviranyia ku Nyasaye.

¹⁷ Kunangwa, Kristo yaza, niyilwaza Ivangeri yi mirembe ku vosi, ku munyi vandu vizihiiri, avamwali ihale kutura ku Nyasaye, kandi ku Avayuda, avaari ahimbi kuye.

¹⁸ Gaveeye kuvitira mu Kristo ndi kunyi kwosi, Avayuda kandi vandu vizihiiri, koveeye avanyala kuuza imbiri wa Baba mu Roho mulala.

¹⁹ Kunangwa, munyi vandu vizihiiri simuveeye avageni anoho avandu avichova, kandi mba. Munyi muveeye vandu vihiiri ndala harara na avandu va Nyasaye kandi avinyumba ya Nyasaye.

²⁰ Munyi kandi mwumbakiywi ku musingi ugwalombwa na avatumwa kandi avaporofeti, Kristo mwene naveeye ligina liu mukoona.

²¹ Niyie uhambanyia harara kandi agenenehizaa kuva Litembeli litakatifu iliaviikwa halovega kuva liu Mwami.

²² Mu Kristo, kandi munyi kandi mwumbakwa harara na avandu vosi, muduuki kuva vomenyo vwa Nyasaye omenya mu kuvitira mu Roho weve.