Vafeso 1 - KITABU KITAKATIFU

¹ Inzi Paolo, uwagwa mutumwa wa Kristo Yeso ku vulaliri vwa Nyasaye, Ng'odera munyi Avakristayo avaveeye Efeso, avaveeye avasuuvirifu mu Kristo Yeso.

² Zimbavasi ni mirembe kutura ku Nyasaye Baba wiitu kandi wu Mwami Yeso Kristo zive ni munyi.

Ligasizwa lia Roho mu Kristo

³ Lizominywa live ku Nyasaye Baba wu Mwami wiitu Yeso Kristo, uwagasiza kunyi nuvugasu vwosi vwu mu Roho uvutulaa mwigulu kuvitira mu Kristo.

⁴ Kali lirova nilikikiri kolombwa, Nyasaye yaali niyamala kotovola kunyi kove vandu aveeve kuvitira mu vuhambani Kristo kunangwa kuduuki kuva avatakatifu kandi vugira imbara mbiri weve. Kigira vuyanzi vwivwe,

⁵ Nyasaye yaali niyamala kukalaga ndi kuvitira mu Yeso Kristo kunyi kuduuki kuvugilirwa kuva avana veve. Yili liali kandi lienya lilie.

⁶ Gendi kwizominyi Nyasaye kigira vukumi vwi zimbavasi zizie, ku kihanwa chiche cha yahaana ku kunyi mu Mwana weve Muyanze.

⁷ Kuvitira mu masahi ga Kristo, kunyi konyooye livoholorwa, agaveeye kovora ndi, uvwoni vwitu vusamiihiywi. Nindio voveeye ovonene vwu vutugi vwi zimbavasi zia Nyasaye

⁸ zia yahaana ku kunyi kuvita kegero. Mu vogeri vwivwe vwosi kandi limanya,

⁹ Nyasaye yakuvuulira agaviswa guvulaliri vwivwe, kolondekana ni lilohiza lilie lilahi lia ya saaviraa kokora kuvitira mu Kristo.

¹⁰ Lilohiza yili, Nyasaye alakatwekiza lwi ing'inga indahi ilakaduuki. Alakavungizi vindu viosi harara, vindu viomuligulu kandi vindu viomulirova, na Kristo alakave mutwi gwavio.

¹¹ Vindu viosi vekolekaa kolondekana ni lilohiza lia Nyasaye kandi likalaga lilie Nyasaye yakotovola kove avandu veve umwene kuvitira mu Kristo kigira uvulariri vwivwe, kolondekana na aga yaali ni yakalaga kutura mulitanga.

¹² Kunangwa gendi kunyi ava kwaali vukutanga kuva ni lisuuvirizwa mu Kristo, kwizominyi uvukumi vwa Nyasaye!

¹³ Munyi kandi mwagwa avandu va Nyasaye lwa mwahulira likuva lia giligali lie Ivangeri iyamuleetera vohonyi. Mwasuuvira mu Kristo, kandi Nyasaye yavika muhuri gwigwe kumanyia ndi munyi muveeye vandu aveeve, ku limuha Roho Mutakatifu wa yasuuviriza.

¹⁴ Roho Mutakatifu aveeye kihambiliru cho konyoora miandu jietu josi ja Nyasaye yalaga avandu veve kandi kuvasuuviriza ndi Nyasaye alakahaane ovovoholore vwosi ku vandu vosi avaveeye aveeve. Gendi kwizominyi vukumi vwivwe!

Lisaala lia Paolo

¹⁵ Kutura nimbulira lisuuvira lienyu mu Mwami Yeso, nu vuyanzi vwinyu vwa muveeye navwo ku vatakatifu vosi,

¹⁶ sindaaleka, kuhaana lisaandiza ku Nyasaye kigira munyi mba. Nzizuliza munyi no kumutala mu lisaala liange kazozo.

¹⁷ Saalaa kandi ndi, Nyasaye wu Mwami wiitu Yeso Kristo, Baba wuvukumi, ahaane ku munyi Roho weve ulikola munyi kuva avageri kandi ulivuula Nyasaye ku munyi kunangwa muduuki kumumanya vulahi ligali.

¹⁸ Saalaa ndi Nyasaye amukole muduuki kumanyiriza vulavu vwivwe, kunangwa muduuki kumanya lisuuvirizwa lia yamulangira kandi uvutugi vwuvukumi vwi miandu jije ku avandu veve

¹⁹ Kandi muduuki kumanya kuli ovonene vwi zinguru zizie vuyinziraa mu kunyi avakusuuviraa. Zinguru yizi ziyinziraa mu kunyi yizio, ziveeye zindala nzere kuli zinguru zinene ligali,

²⁰ zia yatumikira lwa yasimugukiza Kristo kutura mu vakuzu, namwikaliza ha mukono gwigwe mulungi mwigulu.

²¹ Kristo yamiha yo igulu wa avamihi vosi vu mwigulu, vunyali, zinguru, kandi avami, aveeye nidaraja eveeye enene ligali kuvita zidaraja ziu vunyali ziosi zinyala kovoolwa mu lirova yili kandi mulirova lizaa.

²² Nyasaye yavika vindu viosi isi wi virenge via Kristo namukora kuva Mwami munene ku vindu viosi kigira likanisa lilie,

²³ iliveeye muviri gwa Kristo, uvudukiru vwa uyu umwene utwekizaa vindu viosi havundu hoosi.