Tsing'ano 8 - KITABU KITAKATIFU

Lizominya lio vogeri

¹ Hulira! Vogeri vulangirizaa. Limanyiriza ligiinga mwoyo.

² Vogeri vusingiraa ku zisonga zie vigulu himbi ninzira, kandi ha vwavukaniru vwizinzira.

³ Ha vwingiliru vwi lidaala linene, vulangiliraa himbi ni virivwa;

⁴ “Mugoonyaa mwinye mwosi; nangiliraa vuli mundu oveeye mulirova.

⁵ Mukikili nu lwana? Mwigi kuva vahindira. Muveeye vasiru? Mwigi kuva ni limanya.

⁶ Hulira makuva gange gaveeye malahi ligali; goosi ga muvooleraa gaveeye malungi

⁷ Gambolaa gaveeye geligali vovehi voveeye vusigu ku inze.

⁸ Chambolaa, choosi keveeye chiligali; kivula ho keveeye chu vugadi anoho chokogotiza.

⁹ Ku yavo avaveeye ne limanya lio mugati, galang'aminyiywi ku uyu wamanya gekolekaa.

¹⁰ Tovola miigizu gange muvogono vwi ifeza; tovola limanya kuvita kotovola izahabu indahi.

¹¹ “Inzi mbeeye novogeri, mbeeye mulahi kuvita magina gu vuguli; sihaveeyeho ni cha wenyaa kufananywa ninzi mba.

¹² Inzi mbeeye vogeri, kandi mbeeye ni limanya lio mugati; mbeeye ni limanya kandi ni likalaga lia geligali.

¹³ Kusuura vudamanu ni kuhaana ku Yahova luyali; ndasuura kwelola nu kwigingira, ni zinzira zindamanu na makuva go vovehi.

¹⁴ Ndohizaa miyinzi no kugikola mbeeye ni limanya, kandi nizinguru.

¹⁵ Ngonyaa vami kwamiiha kandi vamiihi kolomba malago malahi.

¹⁶ Ngonyaa vuli mwamihi mu lirova kwamiiha; vosi vanene harara ni vizinyumba ziu vwami.

¹⁷ Nyanza yavo vanyanza; uyu onyenyaa alanyoola.

¹⁸ Mbeeye nu vutugi kandi luyali komeedeka kwi miandu nu kwinyaliza kuhaana.

¹⁹ Cha onyoora kutura ku inze kiveeye kilahi kuvita izahabu indahi ligali, kandi kuvita ifeza inyuki ligali.

²⁰ Ng'endaa kunzira yu vulungi; nondaa zinzira ziageligali.

²¹ Mbana vutugi kuyavo vanyanzaa, nzizuliza zinyumba ziavo na mavikiru.

²² “Yahova yaatanga konomba imbiri wi vindu viosi, jaali miyinzi jije ju kutanga kale ligali

²³ Ndaalombwa mulitanga, lwu kutanga ligali kivala kikikiri kolombwa.

²⁴ Ndivulwa zinyanza zikikiri kuvaho, kandi lwi visinukiru via mazi vikikiri kuvaho.

²⁵ Ndiivulwa vigulu vikikiri kuvaho, kandi vikikiri kuvikwa mu vugono vwavio.

²⁶ Ndivulwa Nyasaye nakikiri kolomba kivala ni milimi, kali nakikiri kolomba marova gukutanga makekeeke.

²⁷ Ndali ho lwa yalomba ligulu naalivika haliveeye, lwa yavambalariza vwerefu kunyanza.

²⁸ Lwa yavika malesi mu vwerefu, lwa yigula visinukiru vienyanza

²⁹ kandi nalaga mazi ginyanza gavuli kuvita hayaali nalagizi. Ndaali ho lwayavika musingi gwi kivala.

³⁰ Ndaali himbi kuli mwumbaki, ndaali kitinya chu vuyanzi kuye vuli ing'inga ndaali nu vuyanzi imbiri weve kazozo.

³¹ Kuva nu vuyanzi ni kivala kandi kuyaanzizwa na vandu.

³² “Kalunu mwinye vana vange, mbulirizi, mukore kuli mboraa na mulava nu vuyanzi.

³³ Muhuliri ga mwigizwa. Muve ni limanya; mutagaleki mba.

³⁴ Yavo vambulirizaa valava nu vuyanzi. Yavo vaalindilira ha muliango gwange vuli lidiku, vaalindilira mu vwingiliru vwa hango hange;

³⁵ ku yavo avanyoora, vanyoola livamwoyo. Kandi Yahova alavayaanza.

³⁶ Yavo vatanyoolaa visalilizaa vene, ku woosi oveeye nu vusigu ninzi yayanza likuza.”