Tsing'ano 7 - KITABU KITAKATIFU

¹ Mwana wange, wizulizi gambolaa na utivilira changuvooleraa mba.

² Okole cha mboraa, na ulahindira. Ulindi nokolonda miigizu gange kuli ulindaa endolero ye emoni yooyo.

³ Uviiki amigizu gange zing'inga ziosi, ugaviiki mu mwoyo gugwo.

⁴ Uvuguli ovogeri kuli mbozo wowo, na limanya liu musi live kuli mulina woovo wa himbi.

⁵ Valakokola welehe ku vakali va vasaza vandi kandi, welehe ku vakali vaveeye na makuva go kogoonya.

Mukali muheyi

⁶ Lidiku lilala ndahenza ichova kuvitira mu lidilisia lienyumba yange,

⁷ ndaalora vayaayi vasoleri avakikiri kuva ni limanya, navuzwa muvo ndaalora mundu musiru ligali.

⁸ Yaali nagenda ku inzira ahimbi hu mukali wundi yamenya. Yaali naavitira himbi ninyumba yeeye

⁹ hamugorova lwi kisundi chaali ni chakaduuka.

¹⁰ Maku mukali oyo yagana nu muyaayi oyo, mukali oyo yaali ni yiviiki zinguvu zizie kuli liraya na aveeye ne lilohiza lilie.

¹¹ Yaali nengolo kandi vugira zisoni, yaali niyamenya na agendaa mu zinzira

¹² anoho kusingila mukoona kulindilira, zing'inga zindi munzinzila na zing'inga zindi mu viitu.

¹³ Yakumbelera muyaayi oyo, naamuvusa, namwumika vulungi muzimoni navoora,

¹⁴ “Mali kuhaana kihanwa change kalunu kandi mbeeye ninyama kutura ku visiuviliru.

¹⁵ Kunangwa nzizi kukwenya. Ndaakukwenya, na kalunu mali kokonyoola!

¹⁶ Mali kwala kidali change ne zisuka ziuvulidadi zialombwa ni pamba kutura Egebeti.

¹⁷ Mali kuvaka kidali change vifunya mwayu kuli manemane, kimuli nu mudalasini.

¹⁸ Hamba kuyaanzane uvudiku vwosi! Kulava harara ni kugumilani.

¹⁹ Musaza wange siaveeye hango mba; Yaziiyi mu logendo lutambi.

²⁰ Yavugula mabese manyingi ligali kandi si alilana vwangu mba kuduuka lwa masiza gaviri gaavita.”

²¹ Kunangwa mukali oyo yamugeriza no vuyanzi vwivwe, na muyaayi oyo yavugilira limoloma lilie lihoma lio kogoonya

²² Nonoho muyaayi uyu yalonda mukali oyo kuli igiriki izizaa mukisinziru kandi kuli kisusu kitumaa mumutego

²³ hu muvano gwuvuta gukitumita mumwoyo. Yaali kuli linyonyi lizizaa mu neti. Siyamanya ndi livamwoyo lilie liveeye muvuhimwa mba.

²⁴ Avana vange, kalunu mumbulirizi, muhulirizi gambolaa

²⁵ mutaleka mukali kuli uyu amulegelere muziganagani mba. Mutagendagenda kumwenya mba

²⁶ Yamala kudiviza vasaza vanyingi kandi yakola vandu vanyingi ligali kukuza,

²⁷ Niiva ulazia munyumba yeeye, umanye oveeye kunzira yukuzia mukivala chavakuzu. Yiyi eveeye inzira inyimbi yilikuza.