Tsing'ano 6 - KITABU KITAKATIFU

Lieganihiza ku Uvusiru

¹ Mwana wange, niiva wayihaana kuva kihambiliru ku mutende woovo, kandi niiva wahaana lilagana liilio kigira mugeni utamanyikani,

² maku umali kwevoha na makuva googo umwene, kandi umali kwivika mumutego kigira lilagana liilio.

³ Maku mwana wange, kigira oveeye nuvunyari vwokohona: Uzie kuye, ma umugoonye akovoholore.

⁴ Utazia kogona anoho mu kososa mba.

⁵ Utuli mu mutego yigu kuli linyonyi anoho kisusu kehononokaa mu mutego gwu muhimi.

⁶ Avandu vagata gavadukiraa vanyoore liega kuli amage gamenyaa.

⁷ Sigaveeye nu mwimiliri, mwamihi anoho munene mba,

⁸ navuzwa gavikaa viukulia viago mu ing'inga yu mbasu, magetegeka ku ing'inga yu vukindu.

⁹ Mundu mugata alazizagilira kogona kuduuka ng'inga ki? Alavuuka ng'ingaki?

¹⁰ Avoora, “Ndagona hakekeke vuzwa, kandi ndalinga makono gange nokososa vuzwa hakekeke.”

¹¹ Navuzwa lwava naveeye mu zindolo, uvudaka vulamwingilira kuli umwivi yevohi ni viungi viu vulwani.

¹² Avandu vachamu avatakonya kindu vagendagenda nokovoora uvugadi.

¹³ Vasimiraa zimoni ziavo, virenge viavo kandi videte viavo nokovoora uvugadi.

¹⁴ Valohiza uvudamanu mu mioyo jaavo, nukuzizagilira koleta ikivihiri havundu hoosi.

¹⁵ Kigira yaga, kivi kiladuuka kuvo vugira kumanya, nonoho valadivizwa ligali.

¹⁶ Yivi ni vindu sita anoho saba via Yahova adunyiraa:

¹⁷ Lihenza lidamanu, kovora vugadi, kwita vandu vataveeye nimbala,

¹⁸ kuganagana kolohizi uvuchamu, kunyagula kokora uvudamanu;

¹⁹ Muloli uhambanaa mu livoora vugadi kandi mundu utangiza makuva gu kuhangaliza kuvandi.

Lieganihiza Kokora Ovoheyi

²⁰ Mwana wange, ugumiri amalago ga baba woovo, kandi utaleka miigizu ga mama woovo mba.

²¹ Uhuliri amakuva gaavo, kandi ugaviiki mu mwoyo gugwo.

²² Amigizu gaavo galakwimilira lwa ogendaa, galakukinga mu vudiku, kandi galakuha zing'anagani mu ing'inga yu mbasu.

²³ Amalago gaavo gaveeye kuli ling'ereng'ana liu vulavu ku ivi, amigizu gaavo galakumanyia limenya.

²⁴ Galakokola welehe ku vakali vadamanu, kandi welehe ku makuva madamanu ga vakali vaheyi.

²⁵ Utakayirwa uvulahi vwavo mba, kandi utavugilira vakusimi ni zimoni ziavo mba.

²⁶ Musaza anyala kugura liraya ku mutungu gwe kedonye chu mugadi, navuzwa mukali muheyi alavugula uvutugi vwu musaza vwosi.

²⁷ Mundu anyala kuginga muliru ku kiritu chiche ma avuli kusamba zinguvu zizie?

²⁸ Anoho mundu anyala kogenda ku manda gu muliru ma avuli kuhia virenge vivie?

²⁹ Yaga gaveeye vuzwa madamanu kuli musaza okolaa ovoheyi nu mukali wu musaza wundi. Oyo okolaa yaga, alakahevwe mageri.

³⁰ Avandu sivadulaa mwivi ni yivi viukulia lwaveeye ninzara mba.

³¹ Navuzwa niiva alagumirwa, gamuduukira atungi haali saba. Kuduuka ahaane vindu viaveeye navio viosi.

³² Mundu okolaa ovoheyi siaveeye novogeri mba. Oyo okolaa yaga yidivizaa mwene.

³³ Musaza uyu alakuywa kandi sialava nu luyali mba, alava mu zisoni mihiga ni mihiga.

³⁴ Embodoka ekolaa musaza wu mukali okoli ovoheyi kuva nu vutima kandi sialava ni zimbavasi lwavanzaa kisaalia mba.

³⁵ Sialavugilira mitungu josi mba; anoho vihaanwa vinyingi sivilahomatiza uvutima vwivwe mba.