Tsing'ano 5 - KITABU KITAKATIFU

Lieganihiza kigira Voheyi

¹ Mwana wange, huliriza ovogeri vwange kandi gelimanya liange.

² Maku ulamanya kuli uva ni miima milahi, na makuva googo galamanyia ndi oveeye ni limanya.

³ Munwa gwu mukali muheyi ginyala kuva milahi kuli vwuki kandi livuusa lilie lihomolokaa kuli maguta ga muzeituni,

⁴ navuzwa yaga goosi nigakavita si alakolekela kindu, nitali vululu nu vuzunu.

⁵ Alakuvugula kuduuka mu kivala cha vakuzu; inzira ya agendaa ku ni inzira yi likuza.

⁶ Siagunzaa kunzira yi livamwoyo mba; navuzwa agendagendaa ichova, na siyizuliza chekoleka mba.

⁷ Avana vange, kalunu mbulirizi, mutivilira gambolaa mba.

⁸ Mwerehe ku mukali kuli uyu! Kali mutisuunda himbi ni kiliango chiche mba!

⁹ Niiva ulakola ndio, vandu vandi valavugula luyali lwa mwalange nalwo kale, na mulakuza nimukikiri vana mu makono ga vandu vataveeye ne zimbavasi.

¹⁰ Yee, avageni vatamanyikani valavugula vutugi vuvwo vwosi, na viawagamulira ku vilava viu wundi mundu.

¹¹ Ulagona mukidali chicho chi likuza nokenyaa muvuzunu na zinyama ziu muviri gugwo zilalivwa,

¹² na ulavoola, “Kigira ki niimbura kwiga? Kigira ki niimbura koleka mundu angelihizi?

¹³ Sindenya kuhuliriza ga vigizi vange mba. Sindahulira ga wavoola mba.

¹⁴ Nonoho ndanyooleka mu zisoni muzimoni zia vandu.”

¹⁵ Ove musuuvirifu ku mukali woovo na uhaane vuyanzi vuvwo kuye yeng'ine.

¹⁶ Vana va onyoora na vakali vandi si valakokolera kindu kilahi mba.

¹⁷ Vana vovo vaduukana vaviluki vaduuki kokokonya, vatakonya vageni vatamanyikani.

¹⁸ Kunangwa uyaanze mukali woovo kandi ove nu vusangali naye

¹⁹ aveeye mulahi ligali kandi wu vuyanzi kuli kisusu. Leka vuyanzi vwivwe vukuyanzize, leka akukumbele nu vuyanzi vwivwe.

²⁰ Mwana wange kigira ki uhaane vuyanzi vuvwo ku mukali muheyi? Kigira ki uyanzaa mukali wu musaza wundi?

²¹ Yahova alolaa vindu viosi via okolaa. Hauzia hoosi, akohezaa.

²² Uvwoni vwu mundu muchamu voveeye mutego. Agumililwa mu muluvu gwu vwoni vwivwe.

²³ Akuzaa kigira sianyala kwilinda mba. Vuyingu vonene vwivwe vulamuhila kuduuka mu kilindwa chiche.