Tsing'ano 4 - KITABU KITAKATIFU

Vokonyi vwo Vogeri

¹ Avana vange, muhuliri aga baba winyu amwigizaa. Hulirizi na mulava ni limanyiriza.

² Gamwigizaa gaveeye malahi, muduukana mugizulizi goosi.

³ Lwa ndaali ningikiri muyaayi musoleri, mwana mudelwa ku vivuli vange,

⁴ baba wange yanzigiza nambolera, “Yizuliza gambolaa na utagivilira mba. Okole kuli ngovoleeye na ulahindira.

⁵ Onyoore ovogeri kandi limanya liu musi linyingi, utivilira anoho kusuura gambolaa mba.

⁶ Utaleka ovogeri kigira vulakulinda, uvuyaanze kandi vulakukinga

⁷ konyoora ovogeri ni kindu chi kivuni ligali cha unyala kokora. Kindi choosi cha onyoora, yenyeleriza vogeri vwu musi.

⁸ Yaanza ovogeri na vulakokola kuva munene ligali. Uvukumbelerizi na vulakuleetela luyali.

⁹ Vulava kuivi itaji yu vukumi.”

¹⁰ Mwana wange, mbulirizaa. Uhuliri ligali gangovoleraa, na ulahindira.

¹¹ Mali kukwigiza ovogeri ni liiva lilahi lio komenya.

¹² Sihalavaho ni kikwigalira munzira yooyo niiva ulagenda novogeri mba, kandi siulikigitala lwa unyagula mba.

¹³ Wizulizi vuli ing'inga cha umali kwiga. Vogeri vuvwo ni limenya liilio, uvulindi vulahi ligali.

¹⁴ Utazia ha vandu vadamanu vazizaa mba, utalonda miima jaavo ju vuchamu mba.

¹⁵ Utakola ndio mba! Welehe ku vudamanu! Uvusuuli ma uzie kunzira yooyo.

¹⁶ Vandu vachamu sivanyala kogona nivatakoli kindu kidamanu mba. Vagona nivahenza kuduuka lwa vasaliriza mundu.

¹⁷ Uvuchamu kandi vunuuri ni kuli vukima na mazi kuvo.

¹⁸ Inzira ya valungi vagenda ku eveeye kuli litongaa lie liuva, enyooraa vulavu vuli ing'inga kuduuka lwu mbasu gwakaa.

¹⁹ Inzira ya vachamu, eveeye kisundi kuli vudiku. Vagwiza, navuzwa sivalola ha vikigatiyi mba.

²⁰ Mwana wange huliriza gambolaa. Hulira makuva gange.

²¹ Utagaleka gatuli kuive mba. Ugizulizi, ma ugaviiki mu mwoyo gugwo.

²² Galahaana livamwoyo no vulamu ku oyo ugahuliraa.

²³ Henza kuli uganaganaa. Livamwoyo liilio lilombwaa ni zing'anagani zizio.

²⁴ Utavoola kindu kitaveeye chagiligali mba. Utahambana navovovehi mba, kandi makuva guvuchamu mba.

²⁵ Henza imbiri muvulungi novusuuvirifu vwa giligali, utiviika muzisoni mba.

²⁶ Lohiza vulahi viunyala kokora, na choosi cha okola kilava kilahi.

²⁷ Welehe kuvudamanu kandi ogende vulungi. Utazia kika kilala ichova winzira inungi mba.