Tsing'ano 31 - KITABU KITAKATIFU

Zing'ano ziu Mwami Lamueli

¹ Yaga namakuva gumwami Lamueli wa Maasa, aga mama weve yamwigiza.

² “Ivi oveeye mwana wange wandayanza ligali; oveeye mativuli gilisaala liange. Nyara kokovoolera ki?

³ Utamalira zinguru zizio kuvakali mba, kandi utavaha mabese googo mba. Avakali yava vamali kudiviza vami avanyingi.

⁴ Lamueli, hulira; sigaduukana vami vanwi iwaini anoho kwanira linwa mba.

⁵ Lwavanwezaa iwaini vivilira malago kali valeka kuduukiza lienya liavandu.

⁶ Amalwa gaveeye gavandu vakuza, ni iwaini eveeye ya vandu va veeye mu vudinyu ligali.

⁷ Leka vanwi ma viviliri vudaka vwavo, kandi vovereri vwavo.

⁸ “Molomera vandu vatanyala kwemolomera vene: ukingi lienya lia vandu vosi avatinyalizaa.

⁹ Uvamolomere ma ove mukalagi wa giligali. Ukingi lienya lia vadaka harara na vatinyaliza.”

Mukali wi Miima Milahi

¹⁰ Nivwaha unyala konyoora mukali mulahi? Aveeye mulahi ligali kuvita magina guvuguli.

¹¹ Musaza weve aviikaa lisuuvira lilie muye, kandi sialava mudaka mba.

¹² Lwaveeye mwoyo amukoleraa malahi, kandi sianyala kumukolera sianyala kumusaliriza mba.

¹³ Mukali uyu atovoraa vwoya vwa magondi ni zimbusi ziokolomba zinguvu na makono geege gu vugulu.

¹⁴ Aveeye kuli zimeri ziavakiranyi ziletaa viukulia kutura ihale.

¹⁵ Avukaa nivutaacha nokolombera avinyumba yeeye chukulia kandi kovoolera vayinziri veve vikikali chokokola.

¹⁶ Ahenzaa mulimi kandi agugula, kandi atagaa mizabibu na mabese ga anyooye.

¹⁷ Aveeye muyinziri mugulu okolaa makono geege gaava nizinguru.

¹⁸ Amanyaa vukala vwa vuli kindu chalombaa, kandi ayinzilaa kuduuka vudiku.

¹⁹ Alombaa zimbusi zizie kandi anavaa zinguvu zizie mwene.

²⁰ Aveeye muhaani ku vadaka kandi ku avaveeye ni lienya.

²¹ Siahendaa mwoyo ing'inga yu vukindu mba, kigira amanyi ndi vinyumba yeeye vaveeye ni zinguvu ziuluya.

²² Alombaa zisuka zievidali nokwiviika zinguvu zindahi zie mizambarao.

²³ Musaza weve yamanyikana ligali, aveeye mulala ku vimiliri vi lidaala.

²⁴ Alombaa zinguvu kandi misibi, ma aziguliza ku vakiranyi.

²⁵ Aveeye nizinguru kandi wokohevwa luyali, siaveeye nuvuti kugazaa imbiri mba.

²⁶ Amolomaa novogeri vwagalaha kandi aveeye wi liegiza lisuuvirifu.

²⁷ Vuli ing'inga akolaa miyinzi jukulinda vinyumba yeeye nukuhaana via venya.

²⁸ Avana veve vamusandizaa kandi musaza weve amwizominyaa.

²⁹ Avoora; “Vakali vanyingi vaveeye avalahi, navuzwa ive oveeye mulahi kuvavita vosi.”

³⁰ Vulahi voveeye vwu vugadi, ni ligondo liveeye vuzwa, navuzwa mukali uhaana luyali ku Yahova adukanaa yizominywi.

³¹ Adukanaa asandizwi ku viosi viakolaa kandi vandu vosi vaduukana vahane luyali kuye.