Tsing'ano 30 - KITABU KITAKATIFU

Zing'ano zia Aga

¹ Yaga na makuva ga Aga mwana wa Jake kutura ku Maasa, gayavoolera Izieli na Ukali: “Nyasaye siaveeye ninzi mba, Nyasaye siaveeye ninzi mba kandi simbeeye winyaliza mba.

² Mbeeye kuli inyama yu muvulimu simbeeye mundu mba; simbeeye ni zing'anagani kuli mundu mba.

³ Si ndayiga ovogeri vwosi mba, kandi simanyi kindu choosi kigira Nyasaye mba.

⁴ Nivwaha unyala kumanyiriza vogeri vwu mwigulu? Nivwaha wagumira ku vukindu mu makono geege: anoho nivwaha wavohera ku amazi mu zinguvu zizie? Nivwaha walomba keheri choosi chi lirova? Lieta lilie nivwaha kandi lieta liu mwana weve ni vwaha? Mbolera niiva umumanyi!

⁵ “Nyasaye adukizaa goosi ga alaangaa. Aveeye kuli ikuuti ku vosi avenyaa likingwa lilie.

⁶ Niiva ovoora ndi yavoola kindu cha yavula kuvoola, alakugondokera nu kukumanyia ndi uveeye mugadi.”

Zing'ano zindi zinyingi

⁷ Ngoteva Nyasaye, uhaane ku inzi vindu viviri ningikiri kukuza:

⁸ undulizi mu vovehi kandi vugadi, kandi uleke mburi kuva mutugi anoho mudaka. Ombe vuzwa chukulia kidukanaa ninze.

⁹ Niimba ni chukulia kinyingi, nyara kuvoola ndi si ngwenyaa mba. Navuzwa nimbeeye mudaka nyara kwiva ma mbane izisoni ku Nyasaye wange.

¹⁰ Utadula mutumikiri imbiri wu mwami weve mba. Ulalaamwa kandi usaliri kigira yaga.

¹¹ Koveeye ho na vandu valama vababa vaavo kandi sivasandizaa vamama vaavo mba.

¹² Vaveeye ho na vandu valala avaganaganaa ndi vaveeye valahi lwavafunyaa vugundu.

¹³ Vaveeye ho na vandu valala avaganaganaa ndi vaveeye valahi ligali oh, henza kuli vaganagana vaveeye valahi ligali!

¹⁴ Vaveeye ho na vandu valala avatumikiraa vululu kolegelera vadaka kandi vandu vaveeye nilienya linene; nindio vanyoola limenya liavo.

¹⁵ Mundu muhuvaali wiyanzizaa aveeye na vakana vaviri na vombi valangwa “Ombe!” Kuveeye ho ne vindu vivaga vitigutaa na vine vitavoola “Gaduuki”.

¹⁶ Kivala cha vakuzu, mukali mugumba lirova liumu lienya imbura kandi muliru gwaduukaa gutasimaa.

¹⁷ Mundu woosi ohenyahenyeraa baba weve anoho uchayaa mama weve mu vokeere vwivwe vwakaveeye vulahi zisoti ziamulia anaho majikoro gavoze zimoni zizie.

¹⁸ Viveeye ho ni vindu vine viveeye viokogenyia ku inzi ku vimanya:

¹⁹ Kihungu kuburukaa mu vwerefu, enzoka emoraa ku lwanda, emeli yenyeleriza inzira yayo mu inyanza, kandi musaza nu mukali kuva harara:

²⁰ Mukali oveeye muheyi akolaa kuli ndi: akolaa voheyi, ma yisinga, kandi avoora, “Ngoli kindu kidamanu mba!”

²¹ Viveeye ho nivindu vine viekivala kinyala kuvula kwikuzira kuvio;

²² Mutugwa ugwizaa mwami, mundu musiru oveeye nivindu viosi viayenyaa kulia,

²³ mukali wasuulwa uzizaa lukali, kandi mutumikiri wikikali uvugura vwiyangu vwu munene weve wikikali.

²⁴ Ziveeye ho zinyama zine mukivala ziveeye zingekeke ligali, navuzwa ziveeye no vogeri ligali.

²⁵ Amage: sigaveeye ne zinguru navuzwa gavungiza viukulia viago muing'inga yumbasu.

²⁶ Makinieli sigaveeye nezingulu, navuzwa galombaa vomenyo vwago muzinyanda.

²⁷ Zisigi: siziveeye numwami, navuzwa zigenda harara.

²⁸ Masiagali: unyala kudiira lilala mumukono gugwo, navuzwa ulaganyola muzinyumba ziuvwami.

²⁹ Viveeye ho vindu vine viu kuyaanziza kuvilola lwa vigenda:

³⁰ Zisimba ziveeye ni zinguru kuvita zinyama zindi ziosi, kandi sizitizaa zinyama zindi mba.

³¹ Zimburi zikole, zidaywa zielola, kandi mwami nasingiyi imbiri wa vandu veve.

³² Niiva waveyaange musiru ligali kuva ni kirage kandi kulohiza kokora vudamanu, uleke ma uganagane!

³³ No seza maveere, onyoora maguta. Nuduya mundu ku liulu, masahi galatula. Niiva ulava nu vutima, ulava mu vudinyu.