Tsing'ano 28 - KITABU KITAKATIFU

Malago ga Nyasaye gaveeye gi kivuni

¹ Avandu vachamu virukaa lwu mundu atavakunga, navuzwa vandu valungi vaveeye valuviliri kuli isimba.

² Lwi ihiiri ekolaa vwoni, yamifwaa na vami vanyingi, navuzwa ihiiri eveeye na vimiliri vi limanyiriza kandi limanya ilazizagilira kuva ni zinguru.

³ Umwamihi udambiza vadaka aveeye kuli imbura idiviza vitagwa.

⁴ Yavo avasuuraa malago vizominyaa vandu vachamu, navuzwa yavo avalindaa malago sivaveeye harara navagasulaa mba.

⁵ Avandu vadamanu si vamanyi uvulungi mba, navuzwa yavo avasigamiraa Yahova vamanyiriza uvulungi vulahi.

⁶ Mudaka oveeye musuuvirifu numulahi kuvita mutugi utaveeye musuuvirifu.

⁷ Mwana utizaa malago aveeye mugeri, navuzwa oyo uhambanaa na valina venya lilia linyingi, aveeye zisoni ku baba weve.

⁸ Mundu onyoora vutugi vwivwe mulimeeda vukala, avungizilaa oyo oveeye ni zimbavasi ku vadaka.

⁹ Niiva siulatia malago ga Nyasaye, sialavugilira lisaala liilio mba.

¹⁰ Niiva ulimilira mundu mulungi kokora vudamanu, ulagwa mu mutego gugwo, navuzwa avandu vataveeye nimbala valanyora miandu milahi.

¹¹ Mundu mutugi aganagana ndi aveeye mugeri kazozo, navuzwa mundu oveeye mudaka nilimanya liu mugati amanyi ligali.

¹² Lwu mundu mulungi anyoora vwami vandu vosi vavezaa nuvusangali, navuzwa lwa vandu vachamu vamiiha, avandu vivisaa.

¹³ Mundu uvisaa vwoni vwivwe si alagasizwa mba, navuzwa oyo wiyama no koleka vwoni alanyoola zimbavasi kutura ku Nyasaye.

¹⁴ Aveeye nuvugasu mundu utizaa Yahova kazozo, navuzwa oyo oveeye ni kirage aladivizwa.

¹⁵ Mundu muchamu wamihaa avadaka aveeye kuli isimba ihuuma anaho iduba esetaa.

¹⁶ Mwamihi utaveeye ni limanyiriza, aveeye mudambizi mululu, navuzwa oyo usulaa vuchamu alamedwa madiku gelimenya lilie.

¹⁷ Mundu onyooleka na mahiolo gukwita wundi alima kilindwa chichie vwangu ligali kuli anyala, utageriza kumugaya mba.

¹⁸ Mundu oveeye mulungi alahonywa kutura muvudinyu, navuzwa oyo utaveeye musuuvirifu alagwa mu liliina.

¹⁹ Mulimi uyinziraa ni zigulu alanyoola viukulia vinyingi, navuzwa mundu ogotiza vuzwa vwiyangu zing'inga ziosi, alava nuvudaka zing'inga ziosi.

²⁰ Mundu musuuvirifu alanyoola vugasu, navuzwa oyo udidikanaa konyoora vutugi alahevwa mageri.

²¹ Kuva ni liyaanzilira sivoveeye vulahi mba, navuzwa konyoora viambeti vikekeke mundu akolaa vudamanu.

²² Mundu mwimani adidikanaa kunyoola uvutugi, navuzwa siamanyi ndi vudaka vulamunyoola mba.

²³ Wigizi mundu na lwinyima alayaanzilira miigizu googo.

²⁴ Mundu wivilaa baba weve anaho mama weve kandi na vola yivwo sivoveeye vwoni mba, ahambana numundu udiviza.

²⁵ Mundu wenya lilia linyingi aletaa vudinyu, navuzwa oyo usuviraa mu Yahova alanyoola vutugi.

²⁶ Mundu wisuuvirizaa aveeye musiru, navuzwa oyo ogendaa muvogeri alahona.

²⁷ Mundu uhaanira ku vadaka, sialadaka mba, navuzwa oyo wivisaa kutura ku vadaka vandu vanyingi valamulaama.

²⁸ Lwa vandu vachamu vanyoola uvwami avandu vivisa, navuzwa lwa vachamu vadivaa, vandu avalungi vamiiha kandi.