Tsing'ano 27 - KITABU KITAKATIFU

Utigingira mba

¹ Utiyizominya kigira mugamba mba. Siumanyi kinyala kwekoleka kalunu na mugamba mba.

² Oleke vandu vandi vakwizominye kali avageni, navuzwa utiyizominya ivi mwene mba.

³ Magina nu muyeke viveeye vilitu, navuzwa vulitu vwu musiru aletaa, voveeye vuliduhu ligali kuvita viombi.

⁴ Uvutima voveeye vululu kandi lidiviza, navuzwa si kiveeye kindu ni voleng'anywa nembodoka mba.

⁵ Ni vulahi kugaya mundu havulavu kuvita koleka aganagane ndi siumuhendera mba.

⁶ Unyala kusuuvira mulina uhaanaa mageri ku ivi kukwigiza navuzwa livuusa liu musigu liveeye vugadi vuzwa.

⁷ Numali kwiguta ulasuula kulia vwuki, navuzwa noveeye ninzara kali chukulia kilulu keveeye kenoru.

⁸ Mundu oveeye ihale kutura hango, aveeye kuli linyonyi liveeye ihale kutura kunyumba yalio.

⁹ Maguta gu mwayu ni kimuli vikoleteraa uvuyanzi mumwoyo, navuzwa uvudinyu vwononyaa elielemeliza lie zing'anagani.

¹⁰ Utivilira valina vovo anoho valina vababa woovo mba. Niiva oveeye nu vudinyu utateeva vokonyi kutura ku amwavo woovo mba; mutende wa himbi anyala kokokonya kuvita amwavo woovo oveeye ihale.

¹¹ Mwana wange, ove mugeri na inzi ndava nu vuyanzi; ndava ni litivuli ku mundu woosi ondeva makuva gataveeye ni kivuni.

¹² Mundu mugeri alolaa vudinyu nivuza ma yeleha kuvwo, navuzwa mundu utaganagana alingira muvwo ma yidula lwinyima.

¹³ Mundu oveeye musiru ligali kulaga kusingilira kutunga ligovi liu mugeni, genyekaa vutugi vwivwe vuvugulwi kuduuka lwatunga ligovi yili.

¹⁴ Uyu uchelizaa mutende weve nu mwoyo munene, na avukaa mu mavwevwe, alavalizwa kuli mulaami.

¹⁵ Mukali mulembani aveeye kuli amazi gatonyatonya do-do-do mu ing'inga yi imbura!

¹⁶ Unyala kumukiring'anyia ndi? Wageriza ku kusingiliza vukindu anaho wageriza ku kugumira maguta mumukono gugwo?

¹⁷ Avandu viga kutura kuvandi; kuli kivia kihiagalaa kivia kindi.

¹⁸ Osembelere mukuyu na ulanyora makuyu gu kulia. Oyo ulindaa vanene veve alahevwa luyali ligali.

¹⁹ Mumoni mumwo nimwo mwololaa nimulolekelaa mu mazi, kandi niive mwene umanyi agaveeye mu mwoyo gugwo.

²⁰ Liegomba liu mundu liveeye kuli kivala cha vakuzu; liegomba si liheraa mba.

²¹ Muliru gogerizaa izahabu ni ifeza; liiva liu mundu linyala kandi kogerizwa.

²² Kali niiva ulakuba mundu musiru kuduuka ave masamba makuzu, si ulatuliza uvusiru muye mba.

²³ Ulindi magondi googo ni zing'ombe zizio vulahi ligali kuli unyala,

²⁴ kigira vutugi si vuhindira mihiga ni mihiga mba; kali ndio zihiiri sizihindiraa mihiga ni mihiga mba.

²⁵ Utimuli vunyasi vwumu kandi utimuli vunyasi vuvisi kundulu kwi vigulu lwu vulimu vundi vwu kwuminya vukiviluka.

²⁶ Unyala kulomba zinguvu kutura ku vwoya vwa magondi googo, kandi unyala kugura mulimi na mabese gonyooye ni wakaguliza zindala ku zimburi zizio.

²⁷ Zimburi zitigaye zilakuha maveere harara na vinyumba yooyo kandi ku vatumikiri vovo vi kikali.