Tsing'ano 26 - KITABU KITAKATIFU

Utava musiru mba

¹ Lizominya mundu musiru liveeye lia vuzwa, liveeye kuli ibarafu mu ing'inga yu mbasu anoho imbura inyingi mu ing'inga yi ligesa.

² Vilaamo sivinyala kukusaliriza niiva siuduukiraa ulaamwe mba, gaveeye kuli manyonyi gilitonderizi ni iminyi gaaburukaa kandi sigagwizaa mba.

³ Gakuduukiraa ukuyi ibarasi, uviiki lijamu ku Ibunda kandi ukuyi mundu musiru.

⁴ Niiva uhaana litivuli ku liteeva liu vusiru, ulava musiru kuli mundu uliteevi.

⁵ Uhaane litivuli lisiru ku liteeva lio vusiru kandi uyu uliteevi alamanyiriza ndi siaveeye mugeri kuli aganaganyia mba.

⁶ Niiva ulatuma mundu musiru ahili makuva, gakuduukiraa kali ukalage vilenge vivio; ovezaa nuweyenyeraa vudinyu.

⁷ Mundu musiru anyala kutumikira zing'ano kuli mundu wafogoya anyala kutumikira vilenge vivie.

⁸ Kwizominya mundu musiru gaveeye kuli kovoha ligina ku mugoye gwo lokova.

⁹ Livoora liu lugano lwa vandu avasiru, liveeye kuli liifwa litozaa mu mukono gwu mundu muhambiki;

¹⁰ mundu mwene miyinzi, uvugura mundu musiru anoho muhambiki kumuyinzilira, asaliriza vandu vandi avayaanzaa miyinzi yijo.

¹¹ Mundu musiru okolaa kindu chu vusiru lwa kaviri, aveeye kuli imbwa yirana kulia maluki gayo.

¹² Mundu musiru ligali aveeye mulahi kuvita mundu uganagana aveeye mugeri lwa ataveeye ndio mba.

¹³ Mundu mugata avoora ndi isimba eveeye munzira, isimba eveeye ku mbalabala.

¹⁴ Mundu mugata agirung'aniraa mu vogono kuli muliango govodong'aniraa ku zimbada ziagwo.

¹⁵ Avandu valala vaveeye avagata ligali. Si vanyara kali kuviika chukulia muminwa jaavo mba.

¹⁶ Mundu mugata agangana ndi aveeye mugeri kuvita vandu saba avanyala kuhaana mativuli gaavo vulungi.

¹⁷ Mundu wingira mu lihing'ana litaveeye lilie, aveeye kuli mundu uzizaa kunzira ma agimira matuu gi imbwa.

¹⁸ Mundu mulalu ulasa zisese ziu muliru kandi mivano juvuta jilikuza, aveeye kuli

¹⁹ mundu ugadizaa mutende weve navoora ndi, akubaa vuzwa zimbaka.

²⁰ Zingu nizitaveeyeho, muliru gumanyaa gusima; vugira limonya, lirembana liheraa.

²¹ Amaka galombaa zisese kwaka, zingu zilomba muliru kuzizagilira kwaduka, kandi vandu valeta vudinyu, valomba lihing'ana kuzizagilira.

²² Makuva gumundu mumoonyi gaveeye kuli chukulia kenoru, kandi gingilaa musi mumwoyo gwumundu ligali.

²³ Limoloma litaveeye liagiligali livisaa chuganaganaa, liveeye kuli ifeza ikikiri kusihilwa iviikiywi kunyingu yo vodohi.

²⁴ Mundu mwigadi avisaa vusigu vwivwe mu makuva geege guvugadi.

²⁵ Makuva gege gahulirika vulahi, navuzwa utamusuuvila mba, kigira mwoyo gwigwe gwayizura uvusigu.

²⁶ Anyala kwigadiza mu vusigu vwivwe, navuzwa vuli mundu alalola vindu vidamanu viakola.

²⁷ Avandu vategera vandi mitego vagimilwa ni mitego jaavo. Mundu utangiza kogomogominya ligina, limwilaniraa ma limusionolanyia.

²⁸ Gakuduukiraa udunyiri mundu ukusaliriza no vovehi. Limoloma litaveeye lie giligali liletaa lidiva.