Tsing'ano 25 - KITABU KITAKATIFU

Zing'ano zindi zinyingi zia Solomoni

¹ Yizi ni zing'ano zindi zinyingi zia Solomoni zia vamiihi vamenya munyumba yu vwami vang'oda ing'inga yu mwami Hezekia yaali naveeye mwamihi wikivala chi Ivuyuda.

² Kwizominya Nyasaye kuvindu via viswa, kwizominya vami ku vindu viavivaalaa.

³ Siunyala kumanya zing'anagani ziumwami mba; zing'anagani zizie ziavita zigangani zietu. Zing'anagani zizie ziveeye kuli muvwelofu vwumwigulu, anaho mululiva lwinyanza.

⁴ Nutuliza mandu ku ifeza ma uhaane kumutuli, muturi uyu alalomba kindu keveeye kilahi ligali kutura ku mandu yaga.

⁵ Suunda ihale avigizi vadamanu, ihale kutura kumwami na vwamihi vwivwe vulamanyikana kigira vulungi.

⁶ Lwa usingira imbiri wu mwami, utageriza kumuyanziza kandi kwigadiza kuva mundu wi kivuni mba.

⁷ Voveeye vulahi koteevwa wikale kondeve yuvukumi kuvita kuteevwa uhaane vwiyangu vuvwo ku mundu wundi wikivuni.

⁸ Utava vwangu kuzia mumayaalo kigira kindu chumali kolola mba. Niiva muloli wundi alavuula uvudamanu vuvwo ulakola kindiki?

⁹ Niiva mulembanaa nu mutende woovo, mulohizi makuva ginyu, mutaleka vandu vamanye makuva ginyu gu muvwivisu mba.

¹⁰ Nigaveeye ndio, vuli mundu alamanya ndi ivi sioveeye mundu unyala kuviika makuva gu muvwivisu mba, na siulatula mu zisoni mba.

¹¹ Amakuva gavakovoolera vulahi gaveeye kuli izahabu yalombwa vulahi, ma niviikwa mu ifeza.

¹² Mundu mugeri niyiganihiza mundu oveeye ni lienya kuhulira aveeye vulahi kuvita ebede yizahabu anoho magina guvuguli galombeywi kutura kuzahabu indahi ligali.

¹³ Umutumwa oveeye musuuvirifu aveeye kuli amazi maziliru mung'inga yumbasu yiligesa. Aveeye wu kuyaanziza kumunene weve.

¹⁴ Avandu valaga kuhaana vindu ma vavura kuduukiza lilagana liavo, vaveeye kuli malesi kandi vukindu vutaletaa imbura.

¹⁵ Limoloma lia galaha lilegelelaa vuhingili vonene kali linyala kwizamiliza vamiihi.

¹⁶ Utalia vwuki vunyingi kuvita kegero mba, kigira vwuki vunyingi ligali vulakokola uluki.

¹⁷ Utahongelera kuzia wu mutende woovo mba, ulamuluhiza naye alakuduunyila.

¹⁸ Liyaala lio vovehi lita kuli kivavi, kigulume, anoho muvano mwugi gwu vuta.

¹⁹ Kusuuvira mundu utaveeye musuuvirifu mu ing'inga yu vudinyu, gaveeye kuli kogeriza kulia noveeye ni linu liadengeya, anoho kogenda ne kelenge chafogoya.

²⁰ Kwimbira mundu oveeye no vovereri gaveeye kuli kumutuliza zinguvu mu lidiku liu vukindu anoho kuli kuvaka ijumbi mungwagu.

²¹ Niiva vasigu vovo vaveeye ninzara, uvahe chukulia; nivaveeye nuvuluhu, uvahe chavanwa

²² ulavakola vaduuki mu zisoni, na Yahova alakuha madanyi.

²³ Makuva gavuzwa galetaa vutima kuli vukindu vuturaa Ivaale voletaa imbura.

²⁴ Ni vulahi komenya igulu kunyumba kuvita komenya munyumba harara nu mukali mulembani.

²⁵ Lwu kumaliriza, kuhuliraa makuva malahi kutura mukivala chihale gaveeye kuli kunwa mazi maziliru lwoveeye nuvuluhu.

²⁶ Mundu mulungi uvugilira makuva gu mundu muchamu, gaveeye kuli kisinukiru chaduvuka kandi kidaho chuvusungu.

²⁷ Uvwuki vunyingi voveeye vudamanu ku ive, kandi ni ndio gaveeye konyoora lizominywa linyingi.

²⁸ Mundu utanyala kugumira vutima vwivwe, aveeye vuzwa kuli lidaala litaveeye na madigi, linyala kwingilirwa ing'inga yoosi.