Tsing'ano 24 - KITABU KITAKATIFU

Lugano lwa 19

¹ Utakayirwa vandu vadamanu mba, kandi utageriza kuhambana navo mba.

² Kutangiza vudinyu nigo gavaganaganaa vuzwa ing'inga yoosi lwavamoloma kuduuka lwa vasaliriza mundu.

Lugano lwa -20-

³ Inyumba yumbakwa novogeri, kandi ihindiraa mu lihulirizana.

⁴ Havundu hi limanya liveeye ving'oze viayizula vutugi vunyingi kandi vindu viu vuguli vudinyu.

Lugano lwa -21-

⁵ Kuva no vogeri nu vulaha kuvita kuva nizinguru, yee limanya liveeye ni kivuni kuvita zinguru.

⁶ Kali ndio gakuduukiraa welohizi vulahi nukikiri kuzia mu vulwani, kandi amigizu amanyingi galakuha liguuta.

Lugano lwa -22-

⁷ Zing'ano zio vogeri ziveeye zindinyu ligali ku mundu musiru kuzimanya sivaveeye ni kindu cho kovora lwa makuva gi kivuni gamolomekaa ha vandu vaganira mba.

Lugano lwa -23-

⁸ Oyo olohizaa uvudamanu ing'inga yoosi, alalaangwa mundu oletaa uvudinyu.

⁹ Lilohiza liosi liu musiru aganagana liveeye vwoni. Avandu vasuura mundu utaveeye ni kindu chokovoora, navuzwa kuchaya vuzwa avandi.

Lugano lwa -24-

¹⁰ Niiva oveeye mudedekere mu ing'inga yu vudinyu, zinguru zizio zilageha ligali

Lugano lwa -25-

¹¹ Okonye avandu vaveeye ahimbi kwitwa, kandi wilanyie yavo avazizaa kwitwa.

¹² Unyala kovora yaga ngamanyi mba, navuzwa Nyasaye yamanya, kandi akalagira lienya liilio. Akohenzerizaa kandi yamanya. Alakuha amadanyi kolondekana ni miyinzi jijo.

Lugano lwa -26-

¹³ Mwana wange, ulie uvwuki kigira voveeye vulahi. Uvwuki vwidolokaa kutura ku kisaganyi, voveeye vonolu ku lulimi lulwo.

¹⁴ Umanye kandi, ovogeri voveeye vulahi ku ivi. Niiva ulavonyoola, ulava ni lisuuvirizwa ku madiku gaaza; na lisuuvirizwa yili si lilahelizwa mba.

Lugano lwa -27-

¹⁵ Utava kuli avandu avachamu valohiza kunuura vandu valungi mba, anaho kwingira mu zinyumba ziavo mba.

¹⁶ Vandu valungi vagwiza haali saba kandi vavuuka, navuzwa kivi kiladiviza vandu vuvuchamu.

Lugano lwa -28-

¹⁷ Utayaanzilira lwu musigu woovo anyoora kivi mba kandi utasangala lwa yikigatiraa mba.

¹⁸ Yahova alamanya niiva ulayaanzilira, na sialayaanza mba, kandi sialahaana mageri kuye mba.

Lugano lwa -29-

¹⁹ Utahenda mwoyo kigira vandu vadamanu mba, kandi utakayirwa vandu vachamu mba.

²⁰ Mundu mudamanu siaveeye novomenyo mba, Itaya yu mundu muchamu ilasima.

Lugano lwa -30-

²¹ Mwana wange utie Yahova kandi uhaane luyali ku mwami. Utahambana na vandu vibaara kuvo mba.

²² Vandu kuli yava valadivizwa vwangu. Unyala kumanya kivi cha Nyasaye anoho chu mwami aletaa?

Zing'ano zindi zinyingi zio vogeri

²³ Avageri vavoola vindu yivi kandi; sivoveeye vulahi avakalagi kuva ni liyaanzilira avadamanu mba.

²⁴ Niiva alavoora mundu muchamu aveeye vugira imbara, avandu valamulaama kandi zihiiri zilamusuula.

²⁵ Navuzwa yavo avagondokelaa vandu vachamu, valava nuvusangali kandi valagasizwa.

²⁶ Litivuli liuvusuuvilifu ni kimanyiru chuvulina vwa giligali.

²⁷ Wetegekizi miyinzi jijo, wetegekizi vindu viosi mu mulimi ni wakamala kwetegeka wumbake inyumba yooyo.

²⁸ Utava muloli kumutende woovo vugira kivuni kandi utava mugadi mba.

²⁹ Utavoola ndi ndamukolera kuli yangolera mba. Ndamutungiza kisaalia kugayangolera!

³⁰ Ndagenda mumilimi ni vizabibu viosi viu mundu mugata kandi musiru,

³¹ viali ni viayumba kandi vizura vuzwa mulitu gwa mafwa. Lidiji lia magina lia gukumberizaa liali ni liagwa.

³² Ndahenza kuyaga, ninganagana ku go kandi ninziga kutura kugwo.

³³ Osose kandi ogone hakekeke niiva venya uvulingi makono googo ma osose hakekeke,

³⁴ navuzwa lwuva nogonaa, vudaka vulakwingilira kuli munuri wiyavaye viugi.