Tsing'ano 23 - KITABU KITAKATIFU

Lugano lwa -6-

¹ Lwa wikala kulia nu mwamihi, weteve muziganagani ni vwaha oveeye imbiri woovo.

² Niiva oveeye nuvuha vunyingi vwi chukulia wigaye.

³ Utava ni likayirwa ni chukulia kilahi chakoheye mba, anyala kuva nakogerizaa.

Lugano lwa -7-

⁴ Utakola miyinzi minyingi konyoora vutugi mba; ove nu vogeri vunyingi vwokoleka yaga.

⁵ Vutugi vuvwo vunyala kogota kutura ku ivi vwangu, kuli vomeli zimbaha nukuburuka kuli indizu.

Lugano lwa -8-

⁶ Utalia komesa yu mundu mwimani anoho utakayirwa chukulia kilahi chakoheye mba.

⁷ Avoora, “Hamba uvuguli chukulia kindi,” navuzwa siavolaa geligali mba. Siaganagana nindio aveeye.

⁸ Ulaluka chukulia choosi cha umali kulia kandi vovehi vuvwo vulava vwavuzwa.

Lugano lwa -9-

⁹ Utageriza komoloma makuva govogeri ku mundu musiru mba, kigira si alagavugilira mba.

Lugano lwa -10-

¹⁰ Utasunda kigingi kikulu chu lwako uvuguli mulimi gwa vavisandu mba.

¹¹ Yahova aveeye mukingi wavo wizingulu kandi alavoora makuva gaavo mu kiyaalo kigira ivi.

Lugano lwa -11-

¹² Uhulirizi mwigizi woovo kandi wigi amanyingi kuli unyala.

Lugano lwa -12-

¹³ Utalindagilira kuhaana mageri kumwana mba. Lihaana mageri lilahi kumwana silinyala kumwita mba.

¹⁴ Niiva ulamukuya nulusala, ulahonyia livamwoyo lilie kutura mulikuza.

Lugano lwa -13-

¹⁵ Mwana wange, nuva mugeri ndava nuvuyanzi.

¹⁶ Ndava niliegingira lwambulira nomoloma makuva govogeri.

Lugano lwa -14-

¹⁷ Utava ni likayirwa ku vandu avoni mba, navuzwa uzizagiliri kutia Yahova madiku goosi.

¹⁸ Gaveeye agiligali ndi Lisuuvirizwa liveeye ho kuivi, kandi lienya liilio sililatulizwaho mba.

Lugano lwa -15-

¹⁹ Mwana wange uhulirizi ove mugeri kandi uganagane ligali kuli omenyi.

²⁰ Utahambana navandu vanwezaa iwaini inyingi mba, anoho avalizaa chukulia kinyingi mba.

²¹ Avahambiki na vahuvali valagwa vadaka. Niiva chokolaa vuzwa nukulia nokogona, nonoho ulatanga kwivika madari.

Lugano lwa -16-

²² Huliriza baba woovo; alavula kuva oyo siwaali omenye mba. Lwa mama woovo ahindiraa umanyie vuyanzi vuvwo kuye.

²³ Agiligali, vogeri kwiga kandi lihulira lilahi yivi viveeye mutungu mulahi, navuzwa viveeye nu vuguli vonene niiva ulavigulanyia.

²⁴ Baba wumundu mulungi aveeye ni kivuni chu vusangali ligali. Oyo wiivula mwana mugeri alakave nuvusangali naye.

²⁵ Okole baba woovo na mama woovo vave nu vuyanzi. Oleke uyu wakwivula asangale.

Lugano lwa -17-

²⁶ Mwana wange huliriza kandi uvuguli limenya liange live amigizu kuive.

²⁷ Mukali muheyi aveeye kuli liliina liu luliva; mukali utaveeye musuuvirifu aveeye kuli ovogo vong'erere.

²⁸ Vakulindilira kuli aviivi kandi valomba avasaza vanyingi kuvula kuva avasuuvirifu.

Lugano lwa -18-

²⁹ Nivwaha oveeye nuvudinyu vunyingi? Nivwaha oveeye novovereri? Nivwaha oveeye nu vwigani? Nivwaha wigana? Nivwaha oveeye ni zingwagu vugira kindu chazileeta? Nivwaha oveeye ni zimoni zinzakanyu?

³⁰ Ni yavo avamenya ku iwaini. Yavo avazizaa kuzazama iwaini yasuganywa.

³¹ Utahenza iwaini neveeye inzakanyu mba, lwa itavagiraa mu kekombe yiginga ma yidoloka hasi.

³² Mu limalirika ilakuluma kuli enzoka yu vusungu, kandi kuli kihirigoma.

³³ Ulalora vindu vigeni, kandi ulamoloma vindu viu vuchamu.

³⁴ Ulava kuli mundu ogoni hagati hi inyanza kandi kuli mundu ogoni kondongozi kwu mulage.

³⁵ Ulavoola, “Vakunduya, navuzwa sisaliyi mba, vakunguya navuzwa simbuliyi mba. Ndavuka ing'inga ki? Inzi ndeenya iwaini yindi nwi.”