Tsing'ano 22 - KITABU KITAKATIFU

Vulahi vwu Kuva ni Miima Milahi

¹ Nivulahi kotovola lieta lilahi kuvita kotovola uvutugi ovonene, kandi nivulahi kuva ni miima milahi kuvita ifeza anoho zahabu.

² Mutugi harara nu mudaka vaveeye kindu kilala. Yahova yavalomba vosi.

³ Mundu mugeri alolaa vuhimwa mayeleha, navuzwa mundu musiru azizaa maduuka mu vudinyu inyima yiduli.

⁴ Utie Yahova kandi wegehizi na ulanyora madanyi gu vutugi, uluyali kandi ulahindira.

⁵ Amafwa kandi mitego viveeye munzira yavandu vachamu, uyu wilindaa yeleha kuvio.

⁶ Wigizi mwana kuli adukanaa komenya, na sialivilira lwa ava muhindira mba.

⁷ Mundu mutugi yamiha mundu mudaka, na uyu wegobaa aveeye mutugwa wu mwegobizi.

⁸ Mundu utagaa vudamanu alagesa kivi, ni lidambiza lia dambiza vandi lilahelizwa.

⁹ Mundu oveeye muhaani alagasizwa kigira ahaanaa viukulia vivie ku vadaka.

¹⁰ Ukungi mundu oveeye wikehenyahenye, na lihing'ana lilatula ho, mahangali, kandi ovolembani, vilahera.

¹¹ Mundu uyanzaa uvunifu vwu mwoyo kandi oveeye wi zimbavasi, mwami alava mulina weve.

¹² Yahova ahenzerizaa mundu oveeye ni limanya, navuzwa atungaminya makuva gu mundu utaveeye musuuvirifu.

¹³ Mundu mugata ayaanza kohonga hango, avoora ndi isimba inyala kumunyoola niiva alatula ichova.

¹⁴ Amakuva gu mukali muheyi gaveeye kuli vogo, gagumiraa yavo va Yahova aveeye nu vutima navo.

¹⁵ Uvusiru vwayizula mumwoyo gwumwana, navuzwa imbimbu yukuhaana mageri ilatuliza uvusiru muye.

¹⁶ Mundu udambiza vadaka kunangwa aduuki komeeda uvutugi vwivwe, kandi oyo uhaanaa kihanwa kumutugi vombi valagwa vadaka.

Zing'ano 30 Zio Vogeri

¹⁷ Huliriza na nda kwigiza aga vandu avageri vamali kovora. Ohenzerizi amigizu gaavo,

¹⁸ na ulasangala niiva ulagizuliza ma ugavoole.

¹⁹ Nyenya usuuviri Yahova, yiki nicho kigiri ngovolere zing'ano yizi kalunu.

²⁰ Inzi mali kokong'odera zing'ano 30 ziveeye mu ni limanya kandi na miigizu amalahi,

²¹ kandi zilakwigiza agaveeye amalungi kandi gagiligali. Maku lwutumwa kwenyeleriza, ulaleeta mativuli malahi.

Lugano Lwu -1-

²² Utanula mudaka kigira aveeye mudaka mba, anoho utavadambiza mu kiyaalo mba.

²³ Yahova alasingilira kiyaalo chavo, kandi alalanya yavo avalanyaa avadaka.

Lugano Lwa -2-

²⁴ Utalomba vulina nu mundu wuvutima vululu ligali mba,

²⁵ Kigira unyala kwiga miima jaavo ma uvuli kugirung'ana.

Lugano lwa -3-

²⁶ Utalaga kutunga magovi gu mundu wundi mba.

²⁷ Niiva ulavula kutunga, valavugula kali kidali chicho.

Lugano lwa -4-

²⁸ Utasunda kigingi chu lwako kikulu cha vaguuga vovo vatuunga mba.

Lugano lwa -5-

²⁹ Ololaa mundu oveeye nu vusiza ku miyinzi jije milahi? Uyu alatumika imbiri wu mwami, kandi si alatumika imbiri wa vandu vataduukanaa mba.