Tsing'ano 20 - KITABU KITAKATIFU

Vogeri voveeye vulahi kuvita izahabu

¹ Kunwa iwaini inyingi ekolomba kuva mundu wi liyoga kandi musiru. Voveeye vusiru kuhambika.

² Utie mwami wu vutima kuli unyala kutia isimba ihugumaa nu vutima; kokora mwami ave nu vutima ni kuli kwisunga.

³ Mundu musiru atangizaa mahangali, navuzwa voveeye vulahi kweleha kugo.

⁴ Umulimi oveeye mugata ligali kulima mu ing'inga idukanaa, sialava nichokogesa mba.

⁵ Zing'anagani ziu mundu ziveeye kuli amazi gu luliva, navuzwa mundu wovogeri vwu musi anyala kugadaha.

⁶ Vuli mundu amolomaa kuli aveeye wu luyali kandi musuuvirifu, navuzwa nivwaha unyala kunyoola mundu musuuvirifu?

⁷ Avana vaveeye ni ingavi niiva vaveeye na baba oveeye musuuvirifu kandi okolaa gaveeye amalungi.

⁸ Mwami wikala kondeve yu vwami, amanyaa vudamanu lwa vololaa.

⁹ Mundu anyala kumanya ligali zing'anagani zizie ziveeye zinungi, kandi yaatuliza vwoni vwivwe vwosi?

¹⁰ Yahova adunyiraa vandu vaatumikira vigelo viu vugadi.

¹¹ Kali mwana amanyia liiva lilie kolondekana ku agakolaa; ulamanya niiva aveeye musuuvirifu kandi mulahi.

¹² Yahova yakuha zimoni kolola kandi amatu kuhulira.

¹³ Niiva ulatumikira vwiyangu vuvwo vunyingi kugona, ulava mudaka. Okole miyinzi vuli ing'inga na ulava ni viukulia vinyingi.

¹⁴ Muguli yilirira vuli ing'inga ndi uvuguli voveeye igulu, navuzwa ni yakatula ho yevoolavoola kuli anyooye vuguli vodoto.

¹⁵ Niiva umanya makuva ga omoloma, oveeye ni kindu chu vuguli vutambi kuvita izahabu anaho magina guvuguli.

¹⁶ Mundu oveeye musiru ligali alaangaa kutunga ligovi liu mugeni, gaduukanaa vindu vivie vivugulwi kuhambilira ligovi yili.

¹⁷ Vindu via onyoora munzira itaveeye inungi ulaviyanza kuli chukulia kilahi ligali, navuzwa yaga nigakavita kilava kuli muyeke munwa mumwo.

¹⁸ Onyoore amigizu malahi nulanyoola cha wenyaa; utazia mu vulwani nukikiri kwelohiza mba.

¹⁹ Makuva ga vuzwa sigaveeye nimbisu mba. Welehe ku vandu vamoloma makuva gu vusiru.

²⁰ Niiva ulalaama baba woovo anoho mama woovo, limenya liilio lilahera kuli itaya isimaa mukisundi.

²¹ Niiva unyoola vutugi vuvwo mu vudoto, sivulakokonya hanene mba.

²² Utitungila vudamanu mba. Suuvira Yahova na alakokoonya.

²³ Yahova adunyiraa vandu vaatumikira vigero viu vugadi.

²⁴ Yahova yatovola zinzira zietu; kunangwa mundu anyala kumanya ndi zinzira zizie?

²⁵ Uganaganyie vulahi ligali imbiri wukikiri kulaga kuhaanira Nyasaye kihanwa unyala kwidula inyima.

²⁶ Umwami mugeri gamuduukira atange kumanya mundu okolaa vudamanu, maku ahaane mageri vugira livelelelwa.

²⁷ Roho gwumundu goveeye itaya ya Yahova, gwenyelerizaa zing'anagani ziumusi ziumundu.

²⁸ Umwami alazizagilira kuva mwami niiva uvwamihi vwivwe vulava vwagiligali, vwuvulungi kandi uvuduukanaa.

²⁹ Kwegomba zinguru zia vasoleri ni uvunyali vwaro kandi kuhaana luyali ku zimbuzi ziuvusakulu ni uvukumi kuvo.

³⁰ Liduywa lisalirizaa litulizaa vudamanu, likuywa lie zimbimbu likolomba kuva mulahi mugati mu mwoyo.