Tsing'ano 2 - KITABU KITAKATIFU

Amadanyi go Vogeri

¹ Mwana wange wigi agangwigizaa, kandi utivilira agangovoolera okole mba.

² Hulira gaveeye govogeri kandi ogerizi kugamanyiriza.

³ Usave ovogeri kandi wenyelerizi limanyiriza liu musi.

⁴ Uvwenyelerizi vudinyu kuli wenyaa ifeza anaho vutugi vwaviswa.

⁵ Niiva ulakola ndio, ulamanya kivuni chu kutia Yahova kandi ulanyora ovogeri vwa Nyasaye.

⁶ Yahova niye uhaanaa vogeri, kutura kuye ahaanaa limanya kandi limanyiriza.

⁷ Ahaanaa vokonyi kandi likingwa ku vandu valungi kandi avasuuvirifu.

⁸ Akingaa yavo avakolera avandi vulungi kandi alindaa yavo avihaana kuye.

⁹ Niiva ulambuliriza, ulamanya agaveeye amalungi likalaga lirungi kandi liduukilu kandi ulamanya agadukanaa okole.

¹⁰ Ulakave mugeri, kandi limanya liilio lilakakoletele lieyaanziza.

¹¹ Ovogeri vwuvwo kandi limanya liilio liu musi lilakukinga,

¹² kandi vulakugaaya kokora vindu vidamanu, vulakokola welehe ku vandu vakora vudamanu.

¹³ Yavo na vandu vasuura limenya liu vulungi, navuzwa komenya mu kisundi chu vwoni.

¹⁴ Yavo na vandu vayanzilira kokora vudamanu kandi avasangalira uvusiru vudamanu,

¹⁵ avandu vaveeye avachamu, kandi avataveeye avasuuvirifu.

¹⁶ Ulava nuvunyari vwukwigaya ku mukali woosi muheyi ogerizaa kokogoonya na makuva geege malahi.

¹⁷ Mukali uyu siaveeye nilisuvira kumusaza weve mba kandi yivilira lilagana lilie litakatifu.

¹⁸ Niiva ulazia munyumba yeeye ulava nogendaa kunzira yilikuza. Niiva ulaziayo nu kwisunda mu kivala cha vakuzu.

¹⁹ Mundu woosi umugeniha si yirana kandi mba. Siyilanaa kunzira yi livamwoyo mba.

²⁰ Kunangwa ga kuduukira olonde liiva lia vandu valahi kandi omenye limenya liu vulungi.

²¹ Avandu valungi kandi vasuuvirifu, valamenya mu kivala chietu yiki.

²² Navuzwa Nyasaye alatulizaho vandu vachamu kandi avoni kutura mu kivala kuli misaala jifwaa kutura mu marova.