Tsing'ano 18 - KITABU KITAKATIFU

Voveeye Vudamanu kuyaanzilira vandu Vadamanu

¹ Vandu vatahulirizanaa na vandi viyanza; vahing'ana na agavandi vamanyi kuva malungi.

² Musiru si ahendaa mwoyo kumanya kindu mba, chayenyaa vuzwa ni kumanya kuli aveeye mugeri.

³ Vwoni ni zisoni viveeye kindu kilala. Nogotiza luyali lulwo ulakolelwa kehenyahenye.

⁴ Makuva gumundu ganyala kuva kisinukiru chovogeri, gaveeye musi kuli inyanza kandi malahi kuli mugera guvitaa.

⁵ Sivoveeye vulahi kuyaanzilira mundu mudamanu nu kwigalira mundu utaveeye nimbala konyoora vulungi mba.

⁶ Makuva gumundu musiru galetaa volembani, goosi agaavoola galetaa vudinyu kuye.

⁷ Lwu mundu musiru amolomaa, yidivizaa; agumilwa numutego gwamakuva gege mwene.

⁸ Amakuva gumumonyi gaveeye kuli chukulia kilahi, kuyaanza kugavugula nukugaviika mu zing'anagani zietu.

⁹ Mundu mugata aveeye mudamanu kuli mundu udiviza.

¹⁰ Yahova aveeye kuli munara gwizingulu gwumulungi yirukira mu anyoore vohonyi.

¹¹ Avandu vatugi vaganagana ndi, vutugi vwavo vuvakingaa kuli lidigi litambi lie zinguru liakumberiza lidaala.

¹² Avulaho mundu unyala konyoora luyali, nategehizi, avandu vikirage vaveeye kunzira yu kudivizwa.

¹³ Uhulirizi kutanga, nukikiri kuhaana mativuli, na nutakoli ndio oveeye musiru kandi muzalirizi

¹⁴ Mwoyo gwumundu gwikuziraa kuvulwaye, navuzwa nivwaha unyala kwikuzira ku vudinyu vwumwoyo gumali kuvunika?

¹⁵ Mundu mugeri anyoora limanya, kandi gutu gwu mugeri gwenyelerizaa limanya.

¹⁶ Kihanwa chu mundu kimwiguliraa viliango vinyingi kandi kimwimiliraa kuduuka imbiri wavandu avanene.

¹⁷ Mundu wukutanga komoloma mu kiyaalo alolekaa kovora agiligali kazozo, kuduuka lwumusigu weve atangaa kumuteeva mateeva.

¹⁸ Niiva vandu vaviri vizingulu vahing'ana mu kiyaalo, likuba zikuura lilavukanya vosoolo vwavo.

¹⁹ Okonye amwavo woovo naye alakukinga kuli lidigi liezingulu lie lidaala, navuzwa nolembana naye alakuhanira muliango gwigwe.

²⁰ Mundu alamenya kolondekana na makuyu kutura ku makuva goosi gavoora; aligutizwa na makuva geege.

²¹ Amakuva agovoola galahonya livamwoyo anaho galalidiviza, kunangwa gakuduukiraa uvugiliri makuyu ga makuva googo.

²² Oyo onyoora mukali, umali konyoora kindi kilahi kandi anyoora liyaanzilira kutura ku Yahova.

²³ Lwa vandu vadaka vamoloma, gavadukiraa vasave mu ligoonya kandi mugalaha, navuzwa lwa vandu vatugi vahaana mativuli, vaveeye nu vululu.

²⁴ Vaveeye ho avandu valala avigadaa kuva avalina, navuzwa aveeye ho nu mulina wahimbi ligali kuvita amwavo woovo.