Tsing'ano 13 - KITABU KITAKATIFU

Avalina Vageri Vakokolaa Kuva Mugeri

¹ Mwana wovogeri ahulirizaa amigizu ga baba weve, navuzwa mundu wi kirage siavugilira ndi aveeye mudamanu mba.

² Avandu avalahi valanyora madanyi ku gavavoraa, navuzwa avagaadi vamenya mukirage.

³ Mundu ulindaa makuva geege, alindaa livamwoyo lilie, navuzwa oyo oveeye na makuva gavwangu alidiviza.

⁴ Mundu mugata niyenya kindu si alakenyoola mba, navuzwa mundu mugulu alanyoola choosi chayenyaa.

⁵ Vandu avasuuvirifu vasuura uvugadi, navuzwa makuva ga vandu avachamu gaveeye zisoni kandi gukuvihiliriza.

⁶ Vulungi vukinga vandu vataveeye nimbala, navuzwa vudamanu vugwihizaa avoni.

⁷ Avandu valala vekola kuva vatugi, navuzwa sivaveeye ni kindu mba. Avandi vekola kuva vadaka, navuzwa vaveeye avatugi.

⁸ Mundu mutugi atumikiraa mabese geege kohonyia livamwoyo lilie, navuzwa si aveeyeho nu mundu utihizaa mudaka mba.

⁹ Valungi vaveeye kuli uvulavu vwaka, na vachamu vaveeye kuli itaya isimaa.

¹⁰ Liegingira si liletaa kindu, navuzwa liletaa vudinyu. Voveeye vulahi kwenya miigizu.

¹¹ Vutugi vwa onyoora mu vodoto ulavogotiza vwangu, navuzwa uyu uvungiza mu lielemeriza alava navio vinyingi.

¹² Lwi lisuuvirizwa litaveeyeho mwoyo gukuzaa, navuzwa lwi lienya liduukizwa likohezaa vusangali.

¹³ Mundu uchayaa amigizu malahi yeleeteraa lidivizwa, navuzwa oyo wegehizaa ku malago alakanyoole madanyi.

¹⁴ Amigizu gu mugeri gaveeye kisinukiru chi livamwoyo; galamuhononokiza kutura mu mutego gwi likuza.

¹⁵ Limanya lilahi lileeta luyali, navuzwa yavo avatanyala kusuuvilwa valadivizwa.

¹⁶ Mundu wovogeri aganagana kazozo imbiri wakikiri kokora kindu, navuzwa musiru alangaminya vusiru vwivwe.

¹⁷ Mutumwa mudamanu aletaa vudinyu, navuzwa yavo avanyala kusuuvirwa valeta mirembe.

¹⁸ Mundu otenyaa kwigizwa alava mudaka kandi alachaywa, navuzwa oyo uhuliriza miigizu alizominywa.

¹⁹ Liegomba liduukiziywi liveeye lilahi mu mwoyo, navuzwa ligirung'ana kutura mu vudamanu, liveeye gi livihiririzwa ku vasiru.

²⁰ Mundu ogendaa harara na vandu vageri, agerihaa, navuzwa niiva ahambana nu muganda gwa valina vasiru, aladivizwa.

²¹ Vudinyu volonda avoni havundu hoosi, navuzwa vandu valungi valanyora madanyi malahi.

²² Mundu mulahi aleka miandu jije kuvisukulu veve, navuzwa miandu javoni jilahevwa vandu avalungi.

²³ Milimi ja vadaka jagehera jiveeye niviamo vinyingi, navuzwa vandu vataveeye valungi vavagaya vavuli kulima.

²⁴ Mundu utahaana amageri ku mwana veve, siyamuyaanza mba. Navuzwa oyo umuyaanza alamwigiza.

²⁵ Avalungi vaveeye niviukulia vinyingi navuzwa vachamu vamenya ni inzara kazozo.