Tsing'ano 12 - KITABU KITAKATIFU

Siunyala kwivisa inyima wuvudamanu mba

¹ Mundu woosi uyanzaa ovogeri avugiliraa kovoolelwa kindu keveeye kidamanu, ichakolaa navuzwa oyo usulaa kwigizwa aveeye musiru.

² Yahova ayaanza avandu avalahi, navuzwa akalagira yavo avalohizaa vudamanu.

³ Uvuchamu sivuhanaa likingwa mba, navuzwa vandu valungi vasingilaa vudinyu.

⁴ Mukali mulahi aveeye itaji kandi uvusangari kumusaza weve; navuzwa mukali oletanga zisoni kumusaza weve aveeye kuli vigumba vivie viaguunda.

⁵ Avandu avalungi valakokolera vulahi, navuzwa vandu vachamu valenya kukugada.

⁶ Amakuva gavandu avachamu gaveeye guvwiti, navuzwa makuva gavandu avalungi gahonyia yavo vatihizwa.

⁷ Avandu avachamu vanyola lidivizwa kandi sivaleka visukululwi mba, navuzwa zinyumba zia vandu avalungi zihindilaa.

⁸ Niiva oveeye mundu wovogeri, ulizominywa, navuzwa noveeye musiru vandu valakuchaya.

⁹ Voveeye vulahi kuva mundu wakazozo uyinzilira chukulia, kuvita kwekola mundu munene navuzwa ove ninzara.

¹⁰ Mundu mulungi alindaa mitugu jije, navuzwa mundu muchamu ajikoleraa vudamanu.

¹¹ Umulimi mugulu aveeye ni viukulia vinyingi, navuzwa nuvusiru kogotiza vwiyangu ku miyinzi jitaveeye ni kivuni.

¹² Avandu vosi avachamu venyeleriza kokora vindu vidamanu, navuzwa vandu valungi vasingira vudinyu.

¹³ Mundu muchamu ategwa magumilwa na makuva geege mwene, navuzwa mundu musuuvirifu yituliza mu vudinyu.

¹⁴ Amadanyi googo galondekanaa na makuva googo govoora na gokolaa; ulanyora gaduukanaa niive.

¹⁵ Avandu vasiru vaganaganyia vuli ing'inga ndi vaveeye avalungi, navuzwa vandu vageri vahuliriza miigizu.

¹⁶ Lwu mundu musiru anyoora vutima, avulomba vumanyikana vwangu. Vandu vovogeri sivalondelelaa makuva gu kuhuziriza mba.

¹⁷ Lwaovolaa geligali, vulungi vwekoleka, navuzwa vovehi voletaa gataveeye amalungi.

¹⁸ Amakuva madamanu gatumitaa kuli kivavi, navuzwa makuva gavoolwaa no vogeri gahonyia.

¹⁹ Vovehi sivuhindila mba, navuzwa agiligali gamenya mihiga ni mihiga.

²⁰ Yavo avalohizaa vudamanu valanyora vwangu guvutima, navuzwa yavo avayinziraa vulahi valanyora vusangari.

²¹ Si kiveeyeho kindu kidamanu chakolekaa ku mundu mulungi, navuzwa vandu vachamu vizuyi vudinyu.

²² Yahova adunyiraa vavehi; navuzwa ayaanzizwaa na yavo avagumira makuva gaavo.

²³ Avandu vageri vakiring'ana ku gavamanyi, navuzwa vandu vasiru valandiza vusiru vwavo.

²⁴ Miyinzi midinyu jihaanaa zinguru, navuzwa kuva mugata kulakokola ove mutugwa.

²⁵ Uvuliduhu mumwoyo vutulizaho vuyanzi, navuzwa makuva malahi galakuha vusangali.

²⁶ Mundu mulungi aveeye mwimiliri wumulina weve, navuzwa inzira ya vandu vadamanu ivimiliraa ku ligota.

²⁷ Noveeye mugata siulanyora chawenyaa mba, navuzwa nuyinzira vudinyu, ulanyora ingavi.

²⁸ Uvulungi voveeye inzira yi limenya; navuzwa uvuchamu voveeye inzira yu kuzia mulikuza.