Tsing'ano 1 - KITABU KITAKATIFU

Kivuni Chi Zing'ano

¹ Yizi ni zing'ano zia Solomoni mwami wa Isiraeli, muyaayi wa Daudi.

² Zing'ano yizi niziokokonya vandu kuva ni limanyiriza vogeri, liegiza lilahi kandi kumanyiriza zing'ano zia makuva gu musi.

³ Zinyala kukwigiza kuli unyala komenya novogeri, kandi kuli unyala kuva musuuvirifu kandi wi liiva liduukiru, mulungi kandi liiva liduukilu.

⁴ Zinyala kokora mundu musiru kuva mugeri kandi zie liegiza vasoleri kuva vovokonyi.

⁵ Zing'ano yizi zinyala komeeda umundu wi limanya ovogeri kandi amigizu,

⁶ kunangwa aduuki kumanyiriza vivuni viaviswa viu musi vie zing'ano kandi gaturaa ku vandu vovogeri vatangia.

Miigizu ku Vasoleri

⁷ Liitia Yahova liveeye litanga lio vogeri, navuzwa avasiru vachaya ovogeri kandi vasuura kwiga amigizu.

⁸ Mwana wange, huliriza amigizu ga baba woovo na mama woovo.

⁹ Amigizu gaavo galakokola ove mulahi kuli igudwa ku mutwi gugwo kandi amadongolo mu ligoti liilio gakokola kuva ni ligondo lilahi.

¹⁰ Mwana wange, lwa voni vakogeriza utavugilira mba.

¹¹ Niiva valavoora, “Hamba kuzie kogoneka mundu na kumwiti! Genda kuzie kwingilira vandu vataveeye nimbala.

¹² Vanyara kuva mwoyo kandi valamu lwakuvanyoola, navuzwa valava vakuzu lwa kuva nikwakayinzira ku vo.

¹³ Kulakanyoole vutugi vwi zing'ano ziosi kandi kulakizulizi mu zinyumba zietu vilaanye!

¹⁴ Hamba uhambane ni kunyi, na kulavugula viosi viakwiva.”

¹⁵ Mwana wange, utahambana na vandu kuli yava mba. Welehe kuvo.

¹⁶ Vaveeye vwangu mu likora uvudamanu. Vuli kazozo vetegeki kwita.

¹⁷ Si voveeye vulahi kotega mutego lwi linyonyi liawenyaa kugumira nililoraa mba;

¹⁸ navuzwa, avandu kuli yava vetegekeraa mitego aveene, mitego jaza giviiti.

¹⁹ Linuura kazozo lidivizaa livamwoyo liu munuri. Yaga nigo gakolekaa ku mundu woosi omenya mu liiva liu vunuuri.

Lieganihiza kigira kusuura ovogeri

²⁰ Huliriza! Ovogeri vulangiliraa mu zinzira kandi havundu hoosi mu viitu.

²¹ Vulangiliraa vudinyu ligali ha vandu vavuganira.

²² “Vandu vasiru! Mulava avasiru kuduuka ing'inga ki? Mulasangalira kokolera ovegeri kehenyahenye kuduuka ing'inga ki? Muliiga ing'inga ki?

²³ Muhuliri lieganihiza liange. Inzi ndahaana zing'anagani zindahi ku munyi, kandi ndamuha vogeri vwange.

²⁴ Inzi mali kulanga munyi kuza ku inzi, navuzwa si mwenya kuhulira mba. Mali kuhaana ku munyi mageri, navuzwa simuhuliyi mba.

²⁵ Mumali kusura miigizu gange, kandi si muveeye ni livugilira lieganihiza liange mba.

²⁶ Kunangwa lwa muduuka mu vudinyu, inzi ndamusekeriza. Ndamukolera kehenyahenye lwi litihiza liduka ku munyi,

²⁷ Lwi kivi kiduukaa ku munyi kuli kiihi nokoleta vukindu vwi litihiza liu vudinyu, mulava mu vusaliri kandi mu vuzunu.

²⁸ Maku mulakanzaniri, navuzwa si ndakamutivuliri mba. Mulakanyenye havundu hoosi navuzwa si mulakanyoole mba.

²⁹ Munyi mwasuura ovogeri, kandi mwasuura kutia Yahova.

³⁰ Si mwenya kuhulira lieganihiza liange anoho amigizu gange lwa ndamwigiza mba.

³¹ Kunangwa mulakanyoole mageri kolondekana na gamuduukira kandi mulasalira kolondekana ni vikolwa vienyu.

³² Avandu vasiru vakuza kigira vasuura ovogeri, na vayingu vadivaa kigira liesuuviriza liavo.

³³ Navuzwa oyo umbuliriza alamenya mu likingwa. Alava mu mirembe vugira litihizwa liu vudamanu vwosi.”