Tito 2 - KITABU KITAKATIFU

¹ Navuzwa gakuduukiraa wigizi vindu viduukana na amigizu malahi.

² Wigizi avakulundu vave avadukanu, avokohevwa luyali, avilindi, avovogeri, vi lisuuvira, vu vuyanzi, kandi vu kwikuzira.

³ Wigizi kandi avakeere vave nuluyali lulahi mu miima jaavo; vatava avahuzirizi, anoho avayaanzaa amalwa. Gavadukiraa vigizi agaveeye amalahi.

⁴ Kandi vaduuki kwigiza avakali avang'erere vayanze avasaza vaavo, kandi avana vaavo,

⁵ vave avilindi, kandi valungi, avalindaa amakuva gu mu izinyumba ziavo aveene, vave avahocha kandi avegehiziraa avasaza vaavo aveene, kunangwa likuva lia Nyasaye livuli konyegwa.

⁶ Wigizi avasoleri vang'erere vave avilindaa aveene.

⁷ Mu vindu viosi ivi umwene wimanyie kuva oveeye chokololera ku miima milahi; ove musuuvirifu kandi mugulu mu liegiza liilio.

⁸ Livoora liilio live lilahi vugira chokwikigitaliza, kunangwa umuhing'ani aduuki koleganywa havulavu, kigira siaveeye nichavoola ku kunyi kidamanu mba.

⁹ Wigizi avatugwa vegehizi ku avanene vaavo, vavayaanzizi mu vindu viosi, vatava na mahangali mba;

¹⁰ vatiiva kutura kuvo, navuzwa vamanyie uvusuuvirifu, kunangwa vaduuki kuhaana luyali ku amigizu ga Nyasaye Muhonyi wiitu ku vindu viosi.

¹¹ Nyasaye umali kumanyia zimbavasi zizie zio ovohonyi ku avandu vosi.

¹² Izimbavasi yizio ziegizaa kunyi kuduuki koleka liiva liu uvudamanu nilikayirwa lie vindu vie lirova; kandi komenye liiva liu kwilinda aveene, liuvulungi kandi liuvunyasaye mu lirova yili,

¹³ lwa kulindiliraa lidiku liu uvugasu, lia kwasuuvirizwa liu vukumi vwa Nyasaye munene kandi Muhonyi wiitu Yeso Kristo liliduuka.

¹⁴ Yihaana mwene kigira kunyi, aduuki kukutuliza mu vudamanu vwosi, kandi kokokola kove avandu valungi, avaveeye aveeve mwene kandi, vaveeye ni lienya kokora uvulahi.

¹⁵ Wigizi vindu yivi; utumikiri vunyali vuvwo vwosi lwa wigiza kandi lwa uvadinyirizaa. Utaleka mundu kali mulala akolege anoho kukuchaya.