Ruth 4 - KITABU KITAKATIFU

¹ Boazi yazia kwikala havundu hu kuvuganira ha kirivwa chi lidaala. Lwu mwiko wa himbi wa Elimeleki, wa Boazi yaali naatalangi ku, yavitira hazana yaho. Boazi yamulanga, “Hamba wikale hano, mulina wange!” Na yazia niyikara hasi.

² Boazi yavugula avandu likomi ku vakulundu nivaakikala,

³ yavolera mwiko weve, “Kalunu ndi Naomi wirani kutura mu kivala cha Moabu. Agulizaa kedonye chu mulimi gwaali gwa Elimeleki mwiko wiitu.

⁴ Inzi ndoli ndi nivulahi ngovolere. Niiva ugwenyaa, uguli mulimi zana imbiri wizimoni zia yava aviikaye hano; kandi imbiri wa vakulundu va vandu vange. Niiva ulayaanza kugura, uguli. Niiva siwenya kugura, hene yaho ombolere nduuki kumanya, kigiri sihaveeyeho numundu wundi unyala kugugula nataveeye ivi, ninzi mbeeye inyima woovo.” Naye yavoola, “Ndagugula.”

⁵ Maku Boazi yavoola, “Ku lidiku lia ugula mulimi kutura mu mukono gwa Naomi, wagugula harara na Ruzi mukunzakali; kunangwa mulimi yigu gutigale mu lieta lia avinyumba ya uyu wakuza.”

⁶ Navuzwa mwiko wa himbi oyo yavoola, “Inzi sinyala kuvugura mwene, gase ndononyia miandu jange. Ivi uvuguli uvwiyangu vwange kugugula, kigira inzi sinyala kugugula mba.”

⁷ Yiji ni jaali miima ja vandu va Isiraeli ing'inga ya kale mu makuva gi ligula kandi gumulikiranyia, kudinyiriza vindu viosi; mundu yaatuliza kilato chiche, nukukihaana ku wache; nandio vadinyiriza vindu mu Isiraeli.

⁸ Hene yaho uyu mwiko wa himbi ya volera Boazi, “Wiguliri ivi mwene.” Naye yaatuliza kilato chiche naha Boazi.

⁹ Boazi yavolera avakulundu, na avandu vosi, “Munyi muveeye avaloli ndi, Inzi mali kugura kutura ku Naomi viosi viali via Elimeleki, kandi ku avana veve, Kilioni na Mahaloni.

¹⁰ Kandi mali kuvugura Ruzi, mukali mutiga Mahaloni, kuva mukali wange, nduuki kuzizagiliriza lieta lia uyu wakuza ku miandu jije; lieta lia uyu wakuza livuli kogota mu vamwavo veve, kandi mukirivwa chiche mba. Munyi muveeye avalolekizi kalunu.”

¹¹ Avandu vosi avaari mukirivwa, navakulundu vavoola; “Kunyi koveeye avalolekizi. Yahova akole mukali woovo ave kuli Raheli na Lea, avivulira Yakobo avana vanyingi nivumbaka Isiraeli. Na ivi ugaasizwi, ove mutugi mu ihiiri ya Efurazi kandi ove wilieta linene mu Bezelehemu.

¹² Avana va Yahova alikuha ku mukali uyu valakole inyumba yooyo ilave kuli inyumba ya Perezi mwana wa Yuda na Tamara.”

Boazi ni Visukululwi Vivie

¹³ Kunangwa Boazi yavugula Ruzi naava mukali weve, kandi yaali harara naye. Yahova yagasiza Ruzi ma naavereka, kandi niyiivura mwana muyaayi.

¹⁴ Na avakali vavoolera Naomi, “Wizominye Yahova! Akoheeye mwisukulu muyaayi aduuki kukulinda. Muyaayi oyo alakave wilimanyikana mu Isiraeli.

¹⁵ Naye alava uwilanyia livamwoyo liilio kandi wukukulinda mu ovokeere vuvwo; kigira navizara woovo wakuyaanza aveeye wi kivuni ku ivi ligali kuvita avana vayaayi saba, avawivuyi.”

¹⁶ Naomi yavugula umwana, na yamuvika ku kilitu chiche, kandi yaali muleri weve.

¹⁷ Avakali avateende veve vamugulika lieta, Obedi; vavoolera mundu woosi, “Mwana muyayi wivuliiywi ku Naomi!” Obedi yaali baba Jese, uwaali isi Daudi.

¹⁸ Kalunu yivi nivio visukululwi via Perezi: Perezi yivula Hezoroni,

¹⁹ na Hezoroni yivula Ramu, na Ramu yivula Aminadabu,

²⁰ na Aminadabu yivula Nahashoni, na Nahashoni yivula Salomona,

²¹ na Salomona yivula Boazi, na Boazi yivula Obedi,

²² na Obedi yivula Jese, na Jese yivula Daudi.