Ruth 2 - KITABU KITAKATIFU

¹ Naomi yaali numwiko wu musaza weve Elimeleki, uwalangwa Boazi. Boazi yaali mundu mutugi kandi wamanyikana ligali.

² Lidiku lilala Ruzi yavolera Naomi, “Leka nzie mu mulimi ndoore ingano elekeywi nonde avayinziri vagesi. Mbeeye nilisuvira ndanyoora mulala wi zimbavasi uvugilira mulonde inyima.” Naomi ya muvooleraa, “Zia, okole ndio mukaana wange.”

³ Ruzi yazia mu mulimi nagenda inyima wa vagesi, nadoolanga viangala viengano ya valeka mu. Gakolekaa ndi, yazia mu mulimi gwa Boazi, uwinyumba ya Elimeleki.

⁴ Kandi henza, Boazi yaza natura Bezelehemu. Yacheliza avagesi navoora; “Yahova ave harara ni munyi!” Navo vativura “Yahova akugasizi.”

⁵ Boazi yateeva mwimiliri wa vagesi, “Mukaana uyu ni vwaha?”

⁶ Mwimiliri oyo yativura navoora, “Aveeye mukaana mu Moabu uwaza harara na Naomi kutura mu kivala cha Moabu.

⁷ Naye andeevi muhe munwa alonde inyima wa vagesi adoole, nukuvungiza viangala viengano itigalaa. Kunangwa yaazi mahongi hano kutura mugamba kuduuka kalunu, nitali yikaye mu chiriri hakekeke vuzwa nokososa.”

⁸ Boazi yavolera Ruzi, “Kalunu, hulira, mukaana wange, utazia kodoola mu mulimi gundi mba; kandi utatula hano mba. Navuzwa omenye hano harara na vakana vange.

⁹ Uvahenzerizi ma uvalonde hoosi havazizaa kogesa. Mali kugaya avasoleri vange vatakutindira mba. Lwa oveeye nuvuluhu, uzie kunwa amazi kutura mu zisiongo zia vasoleri vadahiyi mu.”

¹⁰ Ruzi yinama hasi imbiri weve, navolera Boazi, “Kigira ki inzi nyooye zimbavasi imbiri woovo? Kigira ki unzizulizi, ninzi mbeeye vuzwa mugeni?”

¹¹ Boazi yamutivulira, “Goosi aga wakolera navizara woovo kutura musaza woovo nakuza, gavuuliki ku inzi. Inzi manyi kuli waleka baba woovo na mama woovo, nikivala cha wivulwa mu, kandi waza komenya hagati ha avandu va wavula kumanya.

¹² Yahova akohe amadanyi gaduukanaa ni miyinzi ja wakola. Nyasaye wa Isiraeli wa waza kwikinga mu zimbaha zizie.”

¹³ Na Ruzi yavoola, “Oleke nyoore zimbavasi imbiri woovo, mwami wange, kigira oleminyi mwoyo gwange kandi kigira omboleeye inzi, mukaana mutumikiri woovo, makuva malahi, kali nindaveeye mulala ku vakana vatumikiri vovo.”

¹⁴ Kung'inga yiliilia, Boazi yavolera Ruzi, “Hamba hano, ulagiri uvuchima, na odongere mu munyu yigu.” Kunangwa Ruzi yikala harara navagesi. Boazi yamusundira uvuswage vusaambe, na yaalia, kuduuka lwa yiguta kandi naleka vandi.

¹⁵ Lwa Ruzi yasingira kuzia kodoola vuswage, Boazi yalaga avasoleri veve navoora, “Mumuleke adoole kali hagati hiviganda vivoheywi; mutamuleembi mba.

¹⁶ Kandi mutulizi vikekeke mu viavofwa, muleke avidoole, mutamugaya mba.”

¹⁷ Kunangwa yadoola vuswage mu mulimi kuduuka hamugorova. Kandi lwa yaali niyakahuula, yanyoora ndi yaali naadooye ahimbi zikilo likomi ziu vuswage.

¹⁸ Yidwika vuswage, nazia mu lidaala. Yamanyia navizara weve ivia yaali navungizi. Yamuha kandi ichukulia chaali nikitigaye ku cha yaali naliyaange.

¹⁹ Naomi yamuteeva, “Odooye hayi vuswage yivu lero? Uyinziyi mu mulimi gwa vwaha? Nyasaye agaasizi mundu umanyi naava mulahi ku ivi.” Kunangwa Ruzi yavulira navizara weve lieta liu mundu wa yakola miyinzi mu mulimi gwigwe, navoora, “Mundu waangoli naye miyinzi alangangwa Boazi.”

²⁰ Naomi yavoola, “Yahova agaasizi Boazi! Yahova atwekizaa lisuuvirizwa lilie kazozo ku avaveeye mwoyo, kandi ku yavo avakuzaa.” Naomi yaazizagilira kovora, “Mundu oyo aveeye mulala ku aviiko viitu vahimbi; aveeye mulala ku vandu vinyumba yitu unyala kulinda kunyi.”

²¹ Kunangwa Ruzi, yavoola, “Yee, komeeda ku yago, yamboleeye nzizagiliri kuvungiza vuswage harara navayinziri veve kuduuka lwa vamala ligesa!”

²² Naomi yavolera Ruzi, navizara weve, “Nivulahi, mwana wange, ivi kuzia harara na vakana veve, gase ulatindilwa mu mulimi gwu mundu wundi.”

²³ Kunangwa Ruzi yayinzira harara na vakana vayinziri va Boazi, naadoora vuswage kuduuka lwi shairi kandi ingano yoosi yageswa. Ruzi yaazizagilira komenya harara na navizara weve Naomi.