Obadia 1 - KITABU KITAKATIFU

Yahova Yahaana mageri ku Ihiiri ya Edomu

¹ Yivu novoporofeti vwa Obadia, makuva ga Yahova Wuvunyali yavoola kigira Edomu. Yahova umali kutuma mutumikiri weve ku zihiiri, kandi kumali kuhulira makuva geege agaavoola: “Mwetegeke! Gendi kuzie kulwaana Edomu!”

² Yahova avooreraa vandu va Edomu, “Inzi ndamukora kuva avadedekere hagati hi zihiiri, vuli mundu woosi alamuchaya.

³ Liegingira lie mioyo jinyu limali kumugaada; munyi avamenyi mu imbinga yu lwanda, vomenyo vwinyu voveeye igulu, mu vigulu. Kunangwa mwevoleraa, ‘Nivwaha unyala kukwikiza hasi?’

⁴ Kali niiva mulelombela hango hinyu have igulu kuli inyumba yi kihungu, kunangwa muduuki kololeka kuli muveeye hagati hi zing'ereng'ani, inzi ndamwikiza hasi.

⁵ “Lwa vivi vaza ing'inga yu vudiku, vavugura vuzwa kindu choosi chavenyaa. Lwa vandu vavungizaa mazabibu, valeka mazabibu gandi makekeeke. Navuzwa vasigu vinyu vaamudivizi ligali.

⁶ Munyi visukululwi via Esau, amaviikiru ginyu gamali kulanywa.

⁷ Avandu vamuhambanaa navo vosi vamali kumugaada; vamali kumukunga kutura mu kivala chiinyu. Avandu vaali ni mirembe ni munyi vamali kumuguuta. Avalina vamwasuuvira kandi ni mulia harara navo, vamali kotega mutego kumunyi vavoola kumunyi, ‘Limanya liosi liamwali nalio liveeye haliha?’

⁸ “Ku lidiku lia nambane mageri ku Edomu ndakadivizi avasaza vaavo avageri kandi ndakatuliziho ovogeri vwavo vwosi.

⁹ Avasaza vizingulu vu vulwani va Temani valakatiihizwi, kandi vuli musikari mu Edomu alakitwi.

Kivuni chu Kuhaana Mageri ku ihiiri ya Edomu

¹⁰ “Kigira mwakolera avamwavo vinyu vudamanu, visukululwi via Yakobo, mulava mu zisoni, kandi muladivizwa mihiga ni mihiga.

¹¹ Ku lidiku liene yilio, mwasingira halovega, lwa vasigu vandi vageni vaza nivavunaga virivwa viavo, munyi mwali avadamanu kuli avageni yavo, avaavugura miandu ja Jerusalemi nivagavulana vene ku vene.

¹² Ng'ano mwavura kohenzerera avamwavo vinyu lwa vaali mu kivi Ivuyuda. Ng'ano mwavura kusangalira lidiku lia vadivizwa: ng'ano mwavura koseka lwa vaali mu vusaliri.

¹³ Ng'ano mwavura kwingira mu lidaala linene lia vandu vange nokohenzelera vusaliri vwavo; Ng'ano mwavura kuvugura vutugi vwavo ku lidiku liavo lie kivi.

¹⁴ Ng'ano mwavura kusingila muvwavukaniru vwizinzira nukugumira yavo avagerizaa kwiruka, Ng'ano mwavura kuvahaana ku vasigu ku lidiku liuvusaliri vwavo.

Nyasaye Alakakaragiri Zihiiri

¹⁵ “Lidiku liveeye ahimbi lwa Inzi, Yahova, ndakakalagili zihiiri ziosi. Avandu va Edomu, agamumali kokora, kandi galakakoleke ku munyi. Chamumali kuhaana kilirana kumunyi.

¹⁶ Avandu vange vamali konyoora mageri amalulu ligali ku kiguru change kitakatifu. Zihiiri ziosi ziveeye ahimbi zilanyoola mageri, zilazizagilira konyoora mageri malulu ligali. Ziosi zilanyoola mageri goosi nukudiva ligali.

Liguuta lia Isiraeli

¹⁷ “Navuzwa ku kiguru cha Ziyoni avandu valala valakahononoke, kandi halakave havundu hatakatifu. Avandu va Yakobo valakavuguli kivala keveeye chavo ku vulungi.

¹⁸ Avandu va Yakobo valakave kuli muliru, avandu va Josefu valakave kuli olomemo. Valakadivizi avandu va Esau kuli muliru gusambaa luvuva. Avandu va Esau si valakahoneku kali mulala mba. Inzi Yahova mali kovora.

¹⁹ “Avandu kutura Isavaalu wi Ivuyuda valakavuguli Edomu; Avandu kutura imadioli wa Shefela valakavuguli kivala cha Filisitia. Avandu va Isiraeli valakavuguli kivala cha Efuraimu na Samaria. Avandu va Benjamini valakavuguli kivala cha Gileadi.

²⁰ Muganda gwi liihi lia vandu vaadikizwa, kutura Isiraeli, valakilane nukuguuta, kandi kuvugura kivala cha Foenisia kuduuka Ivaale wa Zarefazi. Avandu vadikizwa kutura Jerusalemi, avaveeye Sefaradi, valakilane nukuvugula madaala gaveeye Isavaalu wi Ivuyuda.

²¹ Avasaza vaguuti kutura Jerusalemi valakazie kwingilira kivala cha Edomu nukuchamiiha. Yahova mwene alakave Mwami.”