Nehemia 9 - KITABU KITAKATIFU

Avandu va Isiraeli viiganira uvwoni vwavo

¹ Ku lidiku lia 24 liu mweli mulala mwere, avandu va Isiraeli vivungikiza harara okohonga lilia nukwivika zinguvu zia magunia kandi nukuviika luguchi ku mitwi jaavo kumanyia vovereri kigira uvwoni vwavo.

² Yavo avaari vi kisukururwi cha Isiraeli viiyahula aveene ku vageni vosi vasingira, nivatanga kwiganira uvwoni vwavo kandi uvwoni vwa avaguuga vaavo.

³ Vasingira ku zisa zivaga nivahulirizaa amakuva kutura mu kitabu chi Lilaga lia Yahova Nyasaye wavo, ma kandi ku ing'inga yi zisa zivaga izialonda ku, viganira uvwoni vwavo, kandi nivasigamira Yahova Nyasaye wavo.

⁴ Hene yaho, Jeshua, Bani, kadimieli Shebania, Bani, Sherebia, Buni na Kenani vasingira ku kitalazi cha va Levi nivalira ku Yahova Nyasaye wavo nu mwoyo munene.

⁵ Vandu va Levi yava vavoolera avandu vasigamiri Nyasaye: Jeshua, Kadimieli Bani, Hashabuneia, Sherebia, Hodia Shebania, na Pezahia. Vavoola, “Musingiri na mwizominyi Yahova Nyasaye winyu. Mumwizominye mihiga ni mihiga. Leki sa mulala yizominye lieta lilie lwu vukumi, kali niiva lizominya liu mundu siliveeye lidukiru mba.”

Lisaala lwu kwiganira

⁶ Maku kandi avandu va Isiraeli vasaala lisaala yili: Ivi, Yahova, ivi oveeye Yahova weng'ine; walomba ligulu ni zing'ereng'ani ziu muvwerefu. Ivi walomba lirova nizinyanza na viosi iviveeye mu; wahaana livamwoyo ku viosi. Uvwamihi vwizingulu vwu mwigulu vuinamaa hasi nukusigamira.

⁷ Ivi, Yahova Nyasaye, watovola Aburamu kandi numwimilira kutura mu Uru mu Babiloni; Ivi wagirung'anyia lieta lilie numugulika Aburahamu.

⁸ Ivi wanyoola mwoyo gwigwe gwaali musuuvirifu ku ivi, na ivi walomba lilagana naye. Ivi wamusuuviriza kumuha kivala cha Avakanaani; ikivala cha Avahiti na Avaamori, ikivala cha Avaperezi, Avajebusi na Avagirigashi, kuva ikivala ichi visukululwi vivie vilakamenye mu. Ivi walinda lilagana liilio, kigira oveeye musuuvirifu.

⁹ “Ivi walola kuli avaguuga viitu vakuba kivi mu Egebeti; Ivi wahulira lilira liavo kigira ovokonyi ha Inyanza Inzakanyu.

¹⁰ Ivi wakola vilolekizu viokogenyia ku mwami wa Egebeti, ku vatumikiri veve kandi ku avandu vi kivala chiche, kigira wamanya kuli vadambiza avandu vovo. Ivi wahevwa ilieta liuluyali lia ukikiri nalio kuduuka kalunu ndi.

¹¹ Ivi walombera avandu vovo inzira yu kuvitira ku mu inyanza hagati, kandi wavimilira kuvitira ku marova amuumu. Yavo avavalondelera vaahirwa mu luliva lwa mazi, kuli ligina lieyinaa mu inyanza enene yiviguvuli.

¹² Mu ing'inga ya mbasu, wavimilira numunara gwi lilesi; na mu ing'inga yuvudiku, wavimilira nu munara gwu muliru kuvaha uvulavu kunzira ya gavadukiraa valonde ku.

¹³ Ivi wiika kutura mwigulu ha kiguru cha Sinai; ivi wamoloma ku avandu vovo, kandi nuvaha malago malahi namigizu guvulamu agaveeye guvulungi kandi agiligali.

¹⁴ Ivi wavigiza kulinda lisabato liilio litakatifu limanyikane kuvo; kandi nuvaha malago, imiima namigizu kuvitira mu mutumikiri.

¹⁵ “Lwa vaali ninzara, wavaha mugadi kutura mwigulu, na lwa vaali nuvuluhu, wavaha amazi kutura ku lwanda. Ivi wavavolera vavuguli kivala icha waali nuwavasuuviriza ndi ulavaha.

¹⁶ Navuzwa avaguuga viitu vigingiraa kandi vaali avamagoti madinyu ligali, kandi nivasuula kuhulira amalago googo.

¹⁷ Vasuura kuhulira; vivilira vilolekizu ni viokogenyia viawakola hagati haavo. muligingila liavo vaatovora mwimiliri vaduuki kwirana mu vutugwa vwavo mu Egebeti. Navuzwa oveeye Nyasaye usamihaa; Ivi oveeye wizimbavasi kandi wuvuyanzi; wagalaha ku vutima, zimbavasi zizio ni zinene; Na ivi siwavaleka mba.

¹⁸ Yee, kali lwa velombera aveene kifananyi che kemoli nukukisigamira kandi nivakonyega ku livoora, Uyu niyie munyasaye wakohonyia kutura Egebeti!

¹⁹ Navuzwa Ivi siwavaleka yeyo wengine mu changalangwe mba kigira zimbavasi zizio ni zinene. Ivi siwatuliza ho lilesi kinga muliru, ugwavamanyia inzira ya valonda ku mu ing'inga ya mbasu kinga vudiku.

²⁰ Muvuyaanzi vwuvwo vulahi wavavolera agadukanaa vakole; Ivi wavaha imaana valie kandi wavaha amazi vanwi.

²¹ Yee, wavalinda vulahi mu changalangwi ku mihiga arubaini, na sivagehera kindu kali kilala mba zinguvu ziavo siziakunguha mba na vilenge viavo siviavimba mba.

²² “Ivi waleka nivaguuta zihiiri kandi uvwami, kali vivala viali ovotende vwavo. Vaaguuta kivala cha Heshiboni, uwa mwami Sihoni yamiha kandi kivala cha Bashani uwa mwami Ogu yamiha.

²³ Ivi wavaha avana vanyingi kuli zing'ereng'ani mu vwerefu. Kandi noleka vaguute nokomenya mu kivala icha waali nuwasuuviriza avaguuga vaavo ndi ulavaha.

²⁴ Visukululwi vaavo vaaguuta kivala cha Kanaani; ivi waavakoonya kuguuta avami na avandu vamenya mu Ivi waha avandu vovo zinguru vakole kuli wavayanza ku avandu na avami va Kanaani.

²⁵ Avandu vovo vagumira madaala manene gizimbinga, kivala kenoru, izinyumba zizura vutugi, nividaho viamala kuyavwa, milimi ja mizeituni, misaala ja makuyu manyingi kandi ni vizabibu. Valia viosi via venya nukwiguta, kandi nivakomera; vasangalira ivindu viosi vilahi via ivi wavaha.

²⁶ “Navuzwa avandu vovo vibaara kandi nivavula kukuhulira vasuura kuhulira Lilaga liilio. Vita avaporofeti avaviganihiza, avavavolera viirane ku ivi vaanyega ivi vuli ing'inga.

²⁷ Kunangwa ivi waleka avasigu vaavo vavaguuti nukuvamiiha. Mu vudinyu vwavo, vanira ku ivi uvakonye, na ivi waavativulira kutura mwigulu. Mu zimbavasi zizio zinene, ivi wavatumila aviimiliri avavahonyia kutura ku vasigu vaavo.

²⁸ Lwa mirembe janyoleka, vakora uvwoni kandi. Ma kandi ivi waleka avasigu vaavo kuvaguuta kandi. Navuzwa lwa viganira nokoteeva ivi uvahaonyie, ivi wahulira noveeye mwigulu, na vuli ing'inga, wavahonyia kigira livererera zimbavasi zizio zinene.

²⁹ Ivi waviganihiza vaatia amigizu googo, navuzwa vigingira kandi nivavula kuhulira malago googo. Vakora uvwoni ku malago googo, agahana livamwoyo niva umundu alagalinda. Mu liegingira liavo nilindinya magoti gaavo vasuura.

³⁰ Ivi wikuzira kuvo ku mihiga minyingi. Waviganihiza mu vwikuziri vunyingi. Wakola avaporofeti vovo komoloma. Navuzwa vasuura kuhuliriza, kunangwa ivi waleka vaguutwi na avandu vizihiiri zindi.

³¹ Navuzwa mu zimbavasi ziveeye zinene, ivi siwavaleka kinga kuvaadiviza mba; kigira ivi oveeye Nyasaye wizimbavasi kandi wi livererera!

³² “O, Nyasaye, Nyasaye wiitu, Ivi oveeye munene ligali kuli ndi! Ivi oveeye wukutihiza kandi wizingulu! Muvusuuvirifu ulindaa lilagana liilio lia walaga. Kutura ing'inga lwa avami va Asiria vakudambiza, kali kuduuka kalunu ndi, kwasalirizwa hanene ligali! Avami viitu, aviimiliri viitu, avasaalisi na avaporofeti viitu, avaguuga viitu, na avandu viitu vosi vamala kusalirizwa ligali. Yizuliza kuli uvusaliri kumali kusalira.

³³ Ivi wakola vulahi nu hana mageri ku kunyi, ivi waali musuuvirifu, kali niiva kunyi kwakora uvwoni,

³⁴ Avaguuga viitu, avami viitu, aviimiliri viitu, avasaalisi viitu sivalinda Lilaga liilio mba. Sivahuliriza ku malago googo na amiganihizu googo mba.

³⁵ Kigira vugaswa vuvwo Avami vamiiha avandu, lwa vamenya mu kivala kenene ni ekenoru cha ivi wavaha; navuzwa vasuura kugirung'ana kutura muvwoni vwavo nu kukutumikira.

³⁶ Na kalunu henza kunyi koveeye avatugwa, mu kivala kenoru cha ivi waguhaa ikivala kenoru yiki ikeheza kunyi iviukulia.

³⁷ Kigira uvwoni vwitu, ligesa linyingi lie kivala yiki lizizaa ku avami va ivi wavika ku kunyi vakwamihi. Vamiiha kunyi kandi mitugu jietu, kuli vayanzi. Kunyi koveeye mu liverera linene ligali!”

Avandu valomba Lilagana na Nyasaye

³⁸ Kigira ku goosi agaamali kwekoleka, kunyi, avandu va Isiraeli, kolombaa lilagana ling'odeywi ku chisuuhu, kandi aviimiliri viitu, avandu va Levi viitu, kandi na avasaalisi viitu nguyu vaviika mihuri jaavo kulio.