Nehemia 8 - KITABU KITAKATIFU

Ezira asomeraa avandu Lilaga

¹ Ku lidiku liukutanga liu mweli gwa saba yigwo avandu vosi vavugana harara mu Jerusalemi, mu mugizi munene imbiri wi Kirivwa cha Mazi. Vateva Ezira, musaalisi kandi mung'odi wi Lilaga lia Yahova yaali yahaana ku Isiraeli kuvitira mu Musa, aleete kitabu chi Lilaga.

² Kunangwa musaalisi Ezira yaleeta kitabu chi Lilaga imbiri wi livugana lia vasaza, avakali na avana avaari vanyara kuhulira nukumanyiriza.

³ Yavasoomera Lilaga ha, mugizi munene ugwali imbiri wi kirivwa cha Mazi, kutura mu mavwevwe kuduuka mbasu hagati. Na avandu vosi vahuliriza vulahi ligali.

⁴ Na Ezira mung'odi yasingira ku kitarazi chi misaala ichaali nichumbakiywi kigira muyinzi yigwo. Ahimbi kuye vasingilaho, Matitia, Shema, Anania, Uria, Hilicha na Maaseia vasingira ku mukono gwigwe mulungi. Na Pedaya, Mishaeli, Malikija, Hashumu, Hashibadana, Zakaria na Meshiulamu nivasingira ku mukono gwigwe mumosi.

⁵ Ezira yakunura kitabu zana. Avandu vosi vaali vanyara kumulora kigira yaali nasingiyi igulu wavo; na nonoho lwa yakunura kitabu yicho, avandu vosi vasingira.

⁶ Ezira yavoola, “Yahova Nyasaye umunene!” Avandu vosi vaginga makono gaavo igulu nivavoora, “Amini! Amini!” Maku vinaminya mitwi jaavo hasi kandi nivasigamira Yahova, mmoni mwavo nimudiiyi hasi.

⁷ Maku avandu vosi vasingira ma nivasingira mu vogono vwavo, na vandu va Levi yava vavivaalira amakuva goosi gi Lilaga zana: Jeshua, Bani, Sherebia, Jamini, Akubu, Shabezai, Hodia, Maaseia, Kelita, Azaria, Jozabadi, Hanani, na Pelaia

⁸ vasoma vulahi ligali kutura mu kitabu chi Lilaga cha Nyasaye, nivaligirung'anyia kandi niviivaala kivuni, kunangwa avandu vosi vaduuki ku kumanyiriza aga somwa.

⁹ Lwa avandu vosi vahulira agi Lilaga lienyaa, vaasalirizwa mu mioyo jaavo ligali, ma nivatanga kulira. Kunangwa Nehemia, uwaali mwamihi, harara na Ezira, uwaali musaalisi kandi mwigizi wi Lilaga vasomera avandu Lilaga lia Nyasaye, na vandu va Levi avaari ni vivaalaa Lilaga vaavoolera avandu ndi, “Lidiku lia kalunu liveeye litakatifu ku Yahova Nyasaye, kunangwa mutalira anaho kusioma mba.

¹⁰ Hene yaho Nehemia yavavolera, muzie yengo, mulombe lilia lilahi ligali kandi munwi iwaini indahi, na musange viukulia viavo na yavo avatali navio. Lidiku lia kalunu liveeye litakatifu ku Yahova wiitu; kandi mutaverera mba, kigira uvusangari vwa Yahova voveeye zinguru zienyu.”

¹¹ Kunangwa vandu va Levi vahozeriza avandu vosi, nivavoora, “Kiling'ani, kigira lidiku yili liveeye Litakatifu. Mutaverera kandi mba.”

¹² Kunangwa avandu vosi vazia yengo nivalia kandi nivanwa nuvusangali kandi nivasanga ivia vaali navio na avandu vandi; kigira vaali ni vamanyi makuva ga vaali nivasomeywi.

Lilia lia Amadiri

¹³ Lidiku lia kaviri liu mweli gwa saba, yavo avaari aviimiliri vi zihiiri harara na vasaalisi kandi na va Levi vazia ku Ezira mwigizi wi lilaga okosomere mu amigizu gi Lilaga.

¹⁴ Vanyoola ndi Lilaga, ilia Yahova yahaana kuvitira mu Musa, lialaga avandu va Isiraeli vamenye mu madiri mu ing'inga yi lilia lia madiri.

¹⁵ Kunangwa vaahana malago yaga kandi nivagatuma mu Jerusalemi mwosi kandi mu madaala manene na madaala gandi goosi: “Muzie muvivala vie vigulu na muleete zisia zia matu kutura ku misaala ji midaragwa, ja mizeituni, ja makindu kandi nimisaala jindi kolomba madiri kuli gang'odwa mu Lilaga.”

¹⁶ Kunangwa avandu vaatura kuzia koleta zisia zia matu kandi nivumbaka madiri kwigulu kugalamu kwi zinyumba ziavo, mu migizi, ji Litembeli kandi mu mugizi gwa avandu vosi ahimbi ni Kirivwa cha Mazi kandi Kirivwa cha Efuraimu.

¹⁷ Avandu vosi avaari nivaazi kutura mu lihaminywa vumbaka madiri kandi nivamenya mugo. Yiyi yaali ing'inga yukutanga ya iliilia lia madiri liakolwa kutura ing'inga ya Joshua muyaayi wa Nuni, na avandu vosi va Isiraeli vaali nuvusangali vonene ligali.

¹⁸ Kutura ku lidiku liukutanga lie Lilia lia Madiri, kuduuka ku liukumaliriza, Ezira yasomera avandu kedonye chi Lilaga vuli lidiku. Vaali nilisavo yilio ku madiku saba, na ku lidiku lia munane, haali ho ni livugana muruka gu kumaliza livugana kolondekana na malago gi Lilaga.