Nehemia 6 - KITABU KITAKATIFU

Lilohiza Makiriri Kwita Nehemia

¹ Sanibalati, Tobia, Geshemu Umuarabua na vasigu viitu vandi vahulira ndi kumali kwumbaka lidigi ma kandi sihali na hasasuguka handi ahatigaye mba, kali nigava kwali nikukikiri kusingiriza viliango mu virivwa mba.

² Kunangwa Sanibalati na Geshemu vaandumila amakuva okombolera ndi, “Hamba kwagaane harara mu lilala ku tudaala twu mu Livona lia Ono.” Navuzwa yigu gwaali mutego gwaavo gwokogeriza kusaliriza.

³ Ndaatuma avatumwa kuvo kuvavoolera, “Inzi ngolaa miyinzi minene ligali. Sinyala kusulunguta indangu yeyo mba. Sindasingiriza miyinzi yiji ku kivuni chu kuuza kumulora mba.”

⁴ Vaandumila makuva malala meere haali kane, na vuli ing'inga ndavatumira litivuli lilala liere.

⁵ Maku ing'inga ya katano Sanibalati yatuma mutumikiri weve ku inzi, na makuva malala meere, kandi ni ibarwa itakunikiywi, mu mukono gwigwe.

⁶ Yaga nigo agang'odwa mu: “Geshemu amboleraa ndi ulusuma lumali kulanda hagati hi zihiiri ziveeye mu ovotende ndi ivi na avandu Vayuda musaviraa ukwiibaala ma kandi yiki nicho kijiraa nimwumbaka vuhia lidigi. Kali ndio, kolondekana namakuva yago, ivi olohizaa kwekola mwami yivi mwene.

⁷ Kandi umali kotovola avaporofeti kulandiza amakuva yaga mu Jerusalemi, ‘Mwami aveeye ho mu Ivuyuda!’ Kalunu amakuva yaga galaduuka ku mwami; kunangwa hamba, na oleke kovolerane harara niivi.”

⁸ Ndamutumira amativuli yaga, “Sihaveeyeho ni kindu ichekolekaa kuli ivi ovola mba; navuzwa ivi ugalombaa vuzwa kutura mu zing'anagani ziu mumutwi gugwo mwene.”

⁹ Vosi vaali nivagerizaa kukutihiza nivaganaganaa ndi, valakolekiza kokora miyinzi. Ndasaara, “Navuzwa kalunu, Nyasaye mbe zinguru!”

¹⁰ Ahimbi ku ing'inga yiyi ndaazia kuluuta Shemaya muyaayi wa Delaya umwisukulu wa Mehetabeli, uwaali naatamiywi kutura munyumba yeeye. Yambolera, “Ivi ninzi kuduuka kuzie kwivisa harara Havundu Hatakatifu hi Litembeli, na oleke kuhane viliango vie Litembeli, kigira avandu vazaa kukwita; Yee, vazaa kukwita ing'inga yoosi yuvudiku vwa kalunu.”

¹¹ Navuzwa ndamutivulira, “Inzi simbeeye mundu uwirukaa nukuzia kwivisa mba. Uganaganaa ndagerizi kohonyia livamwoyo liange ku lievisa mu Litembeli? Sindakola ndio mba!”

¹² Lwa ndaganagana ku makuva yaga, ndamanyiriza ndi Nyasaye siyaali naamolomi ku Shemaya mba, navuzwa Tobia na Sanibalati vaali ni vamuhe viambeti yanziganihizi,

¹³ nduuki kokora uvwoni, kunangwa vaduuki kwononyia lieta liange lilahi kandi nukuumbika mu zisoni.

¹⁴ Ndaasaara, “O, Nyasaye wange, yizuliza aga Tobia na Sanibalati vamali kokora na uvahe amageri. Wizulizi mukali oyo Nodia kandi navaporofeti vandi vosi avagerizaa kundihiza.”

Litwekiza miyinzi

¹⁵ Inyima wa madiku 52 miyinzi, jilidigi liosi jiafa kwumbakwa vuhia ku lidiku lia 25 liu mweli gwa Eluli.

¹⁶ Lwa avasigu viitu vi zihiiri ziakukumbiriza vahulira makuva yaga, vaali nuvuti vonene ligali kandi liegingira liavo liagehizwa, ligali kigira vamanyiriza ndi miyinzi yiji jikoleywi novokonyi kutura ku Nyasaye wiitu.

¹⁷ Ku ing'inga yiyi yoosi aviimiliri vi Ivuyuda vazizagilira kong'oderana zibarwa na Tobia.

¹⁸ Avandu vanyingi mu Ivuyuda vaali kolovega lwilwe ku liesuuha kigira navizara weve yaali Muyuda Shekania muyaayi wa Ara. Komeeda ku agene yaga, muyaayi weve Jehohanani yaali naleti mukaana wa Meshulami, muyaayi wa Berekia.

¹⁹ Avandu vaali vanyara komoloma imbiri wange amakuva givikolwa vilahi via Tobia yaali naakori kandi vaali vanyara kumuvolera amakuva goosi ga ndamoloma. Na yaazizagilira kundumira zibarwa okogeriza kundihiza.