Nehemia 5 - KITABU KITAKATIFU

Nehemia yakonya avadaka

¹ Lwinyima, avandu vanyingi vombi vasaza navakari, vatanga lielilira ku Avayuda vache vaavo.

² Valala vavoola, “Koveeye na vandu vanyingi kwenyaa viukulia vinyala kukokora kove mwoyo.”

³ Avandi vavoola, “Kunyi kunigiki kwihambilira milimi jietu kandi milimi jie Mizabibu kandi nizinyumba kunangwa konyoole uvuswage uvukudukaa kunangwa kuvuli kukuza ni inzara.”

⁴ Avandi navo vavoola, “Kunyi kwegoba mabesa kuduuki kutunga uvusuru vwu mwami ku milimi jietu ni milimi ji mizabibu jietu.

⁵ Koveeye avihiiri ndala nzere na Avayuda vache viitu. Avana viitu sivaveeye avalahi kuli avana vaavo? Navuzwa kunyi kumali kokora avana viitu avatugwa. Valala ku vakana viitu vamali kugulizwa ku muvutugwa. Sikoveeye niliekonya mba kigira milimi jietu ni milimi ja mazabibu jiitu jamala kuvugulwa na avandu vandi.”

⁶ Lwa ndahulira lielilira liavo, ndasinyika ligali,

⁷ ma ndaganagana chokokola, ma ninzara avamihi na vanene va vandu. Na ndavavolera, “Munyi mudambiza avamwavo vinyu Vayuda!” Kunangwa ndalanga livugana lia avandu vosi harara kuduuki komoloma ku vudinyu yivwo.

⁸ Ndavavolera, “Kunyi lwa kunyaliza, kwiranyia avamwavo viitu Avayuda avaari niviguliza aveene kuvageni. Navuzwa kalunu munyi munigaa aviiko vinyu ukwiiguliza aveene ku munyi, Avayuda vache vaavo!” Aviimiliri zana vachiring'ana makiriri kigira vamanya ndi amakuva yaga gaveeye agiligali.

⁹ Maku ndavoora, “Icha mukoraa keveeye kidamanu! Muduukana mutie Nyasaye na mukore agaveeye malungi. Maku simulahana ku avizihiiri kivuni choosi icha vakokolera kehenyahenye mba.

¹⁰ Mali koleka avandu veegobe mabesa nuvuswage kutura ku inzi, kandi avalina vange na avasaza vanyinziliraa vakoli ndio kandi. Kalunu leki koleke lidaya iviambeti. Muleke amagovi ginyu goosi ga vaveeye nago, amabese anoho uvuswage, anoho iwaini anoho maguta ga muzeituni.

¹¹ Mwaza, yaanzi muviiranyiri milimi jaavo, milimi ji mizabibu jaavo, milimi ji mizeituni jaavo imbia kandi nizinyumba ziavo vwangu!”

¹² Aviimiliri vaativura, “Kunyi kulakola kuli ovola. Kuliiranyia imiandu na sikulageliza kuvugura amagovi kandi mba.” Ndaalanga avasaalisi kandi ningora aviimiliri viisuuhi imbiri wavo ukulinda lisuuviriza lia vaali nivisuuhi.

¹³ Maku ndatuliza ni ndasung'usa inguvu yumusibi yandali ninziviki niimboora, “Nyasaye alasung'usa kuli ndio mundu sa mulala uvula kuduukiza lisuuviriza yili, atuli munyumba yeeye, na mumiyinzi jije. Mundu uyu asung'uswi ndio kandi akolwe hazwa.” Avandu vosi vavoola “Amini!” Kandi vizominya Yahova. Na aviimiliri vaalinda Lilagana liavo.

Uvuhaani vwa Nehemia

¹⁴ Ku ing'inga yi mihiga komi na mbiri ja ndaali mwamihi wa Ivuyuda, kutura ku muhiga gwa sirini gwa Aritasakises yaali mwami kuduuka ku muhiga gwigwe gwa 32, aviiko vange kinga inzi mwene sindaalia chukulia cha ndenyeka kulia kuli mwamihi mba.

¹⁵ Navuzwa vuli mwamihi uwaali imbiri wange waali musigo muliduhu ku avandu na vateva vahevwe vidonye arubaini viefeza ku vuli lidiku komeeda ku chukulia ni iwaini. Kali avatumikiri vaavo vadambiza avandu. Navuzwa inzi ndakora lugano kutura kuvo, kigira ndaatia Nyasaye.

¹⁶ Navuzwa, mu vogono yivwo, ndiituliza kokora miyinzi juvwumbaki vwi lidigi numwoyo gwange gwosi na sindivugulila ku miandu mba. Umundu vwosi uwanyinziliraa yakokonya kumbaka lidigi vuhia.

¹⁷ Vuli kazozo, ndalihiza avandu Vayuda 150, kandi harara na aviimiliri vaavo, komeeda ku avandu vazaa ku inzi kutura mu zihiiri ziakukumbiriza.

¹⁸ Vuli lidiku iviukulia vialombwa viali eng'ombe ndala, magondi sita malahi ligali nizingoko zinyingi. Vuli inyima wa madiku likomi ndahaana iwaini imbia inyingi yizing'ano ziosi. Navuzwa ndamanya misigo miliduhu ja avandu valinajo, kunangwa sindateeva mbeevwe viukulia via mwamihi yenyeka anyoore mba.

¹⁹ Ngusaala, O, Nyasaye wange, unzizulizi ku goosi aga mali kokolera avandu yava.