Nehemia 4 - KITABU KITAKATIFU

Nehemia agutaa vasigu veve

¹ Lwa Sanibalati yahulira ndi kunyi Avayuda kumali kutanga uvwumbaki vwi lidigi, yaali nu vutima vonene ligali, kandi natanga kukokolera kehenyahenye.

² Yavoola imbiri wa avalina veve kandi imbiri wi liihi lia vandu va Samaria, “Avayuda vadedekere yava vaganagana vakora ki? Venya ukwumbaka vushia lidigi lie lidaala linene? Vaganagana ndi ku lihaana visiuviliru vanyara kumala miyinzi zana mu lidiku lilala? Vanyara kolomba magina gukwumbakira kutura mu vitumi vie ivianyi viasambwa?”

³ Tobia, umuamoni uwaali nasingiyi ahimbi naye, yameda kovora, “Ni lidigi lia lugano ki lia vakumbaki? Kali ikivwi kinyala kulitula hasi!”

⁴ Ndaasaara, “O, Nyasaye wiitu hulira kuli vakokolera kehenyahenye! Leka manyego gaavo gavagwiri ku mitwi jaavo aveene. Leka vanyagwi ivindu viosi via vaveeye navio kandi leka vahilwe kuli vahambe mu kivala chovogeni.

⁵ Utavasamiiha uvudamanu vwavo vwavakolaa mba, kigira vamali kokonyega kunyi avakwumbakaa.”

⁶ Kunangwa kwazizagilira kwumbaka lidigi, na nonoho, lidigi zana liali inusu yuvutambi vwalio vwosi kigira avandu vaali nuvuha ukwumbaka.

⁷ Sanibalati, Tobia, kandi avandu va Arebia, Amoni, na Ashidodi vahulira ndi kwaali nikuzizagilira vulahi niliumbaka vuhia lidigi lia Jerusalemi, ma kandi mwi lidigi liasasuguka kandi vaali nu vutima vonene ligali.

⁸ Kunangwa vosi valohiza makiriri ukuuza kwingilira Jerusalemi kandi valeta iligoyana mu lidaala.

⁹ Navuzwa kwaasaala ku Nyasaye wiitu kandi nikuviika avasaza ukulinda mbasu nuvudiku.

¹⁰ Avandu vi Ivuyuda vaali nu lwimbu lwa viimba! “Zinguru zia vayinziri vukuginga misigo ziageha. Haveeye namandu gi vijonjo manyingi ligali. Sikunyala kwumbaka vuhia lidigi mba.”

¹¹ Avasigu viitu vavoola kandi, “Sivalamanya ichekolekaa anoho kukolola ichakokora kuduuka lwa kuduuka hagati haavo kandi kulaviita nu koherize miyinzi jaavo.”

¹² Navuzwa Avayuda avamenyaa hagati ha vasigu viitu vaza kukwiganihiza vuli ing'inga ya vasigu viitu vaali nivalohiza kigira kunyi.

¹³ Kunangwa ndetegekiza avandu zana ni iviugi, vivavi, matimu, uvuta nimivano jaavo, kandi nimbaviika kolondekana ni viliango viavo inyima wi lidigi, hoosi aha liali nilikikiri kufa.

¹⁴ Ndalora ndi avandu zana vahendi mwoyo, kunangwa ndavavolera aviimiliri navanene vaavo, “Mutatia avasigu viitu mba. Mwizurizi ndi Yahova aveeye munene kandi wukutihiza, ma mulwaaniri avandu vikivala chienyu, avana vinyu, avakari vinyu kandi zinyumba zienyu.”

¹⁵ Avasigu viitu vahulira ndi kunyi kumali kumanya lilohiza liavo na Nyasaye umali kwononyia zing'anagani ziavo. Maku kunyi kwosi kwirana sa mulala ku miyinzi jiitu je liumbaka vuhia lidigi.

¹⁶ Kutura lwene yilwo kuzizagilira inusu ya vasaza va ndali navo vayinzira na inusu yavo vakora miyinzi ju vulindi, niviviiki zisalamba zie vivia kandi namatimu, zinguva kandi uvuta. Aviimiliri viitu vaahana ovokonyi vwavo vuduukiru ku avandu vi Ivuyuda

¹⁷ avaari nivumbaka lidigi vuhia. Kali yavo avagingaa ivindu viukwumbakira vayinzira numukono mulala na niwagumira iviuma viavio numukono gundi,

¹⁸ kandi sa mulala uwaali niyumbaka yavika kivavi chiche nikevoheywe kuvazwa yeye. Mundu wukukuba kisiriva chokogerihiza avandi yaali ahimbi ku inzi.

¹⁹ Ndavolera avandu navanene vaavo kandi navimiliri vaavo, “Miyinzi ni mivambalaru ligali na, kandi kusalani ihale kutura ku wundi ku lidigi.

²⁰ Hoosi ha muhulira mwoyo gwi kisiriva hambi mungumbelize. Nyasaye wiitu alakulwanira.”

²¹ Kunangwa vuli lidiku kutura mumavwevwe kuduuka lwi zing'ereng'ani zia loleka inusu yitu vayinzira ku lidigi, na inusu yindi vasingira mu vulindi na matimu gaavo.

²² Ku ing'inga yeyo ndavolera avandu vaali kumiyinzi ju vulindi ndi, “Vuli mundu nu mukonyeleri weve kuduuka vagone mu Jerusalemi kunangwa vaduuki kulinda lidaala havudiku kandi, vayinziri mbasu.”

²³ Inzi sindatuliza zinguvu ziange kali vudiku mba, anoho avalina, vange anoho avatumikiri vange anoho valindi vange. Sa mulala kukunyi yaali niviuma vivie mu mukono.