Nehemia 3 - KITABU KITAKATIFU

Liumbaka vuhia lia madigi ga Jerusalemi

¹ Lidigi lie lidaala linene liumbakwa kuli ndi: Eliashibu musaalisi munene navasaalisi vache veve vumbaka vuhia Kirivwa cha Magondi, nivakitakasa, nukuviika viliango mu vwiyangu vwavio. Vatakasa lidigi kuduuka hu Munara gwa Mia kandi hu Munara gwa Hananeli.

² Avasaza va Jeriko vumbaka vuhia kedonye chi lidigi lialonda ku. Zakuri muyaayi wa Imuri yumbaka vuhia kedonye chi lidigi lialonda ku.

³ Avikiliango cha Hasena vumbaka kirivwa chi Zisuzi. Vaala mialiru jacho, ni vasingiriza miliango jacho kandi nivaviika miruguyu javio harara ni uvubada vwukuhanira virivwa, mu vogono vwavio.

⁴ Meremozi, muyaayi wa Uria na mwisukulu wa Hakozi, yumbaka kedonye chalonda ku. Meshulami, muyaayi wa Bereehia, mwisukulu wa Meshezabeli yumbaka vuhia kedonye chalonda ku. Zadoku muyaayi wa Baana yumbaka vuhia kedonye chi lidigi lialonda ku.

⁵ Avasaza kutura Tekoa vumbaka vuhia kedonye chalonda ku; navuzwa vimiliri avasaza vi lidaala vasuura kokora miyinzi ja makono nijizingulu jia vahevwa na vahenzi vaavo.

⁶ Jehoyada muyaayi wa Pasea na Meshulami muyaayi wa Besodeia vumbaka vuhia Kirivwa cha Jeshana. Vaala mialiru jacho kandi niviliango viacho mu vogono, kandi nivaviika mu miruguyu kandi vivohero uvubada vwu kuhanira kirivwa.

⁷ Melatia kutura Gibeoni, Jadoni kutura Meronozi, na vasaza va Gibeoni na Mizipa vumbaka kedonye chalonda ku, kuduuka ku zinyumba ziu mwamihi wi kivala keveeye Imadioli wu Mugera gwa Efurate yamenya.

⁸ Uzieli muyaayi wa Harihaia, muturi wi zahabu, yumbaka vuhia kedonye chalonda ku. Hanania mulombi wizinyasi zifunyaa mwayu, yumbaka vuhia kedonye chalonda ku, kali kuduuka ha Lidigi Ligalamu.

⁹ Refaya muyaayi wa Huri, mwamihi wa Inusu yi kivala yumbaka vuhia kedonye chalonda ku.

¹⁰ Jedaya muyaayi wa Harumafu yumbaka kedonye chalonda ku, ichaali ahimbi ku inyumba yeeye mwene. Hatushi, muyaayi wa Hashabineia yumbaka kedonye chalonda ku.

¹¹ Malikija muyaayi wa Harimu na Hashubu muyaayi wa Pahazi Moabu yumbaka vuhia kedonye chalonda ku kandi Munara gwa mahiga.

¹² Shalumu muyaayi wa Haloheshi, mwamihi wo lovega lulala lwa Jerusalemi yumbaka kedonye chalonda ku. Avakaana veve vamukoonya kuyinzira.

¹³ Hanuni na avandu vamenyaa mu lidaala linene lia Zanoa vumbaka vushia Kirivwa chi Livona. Vaviika virivwa mu vogono, nivaviika mu miruguyu kandi nivivohero vwukuhanira kirivwa, kandi nivumbaka vuhia zimita 440 zie lidigi, kuli kuduuka ha Kirivwa cha Mandu.

¹⁴ Malikija muyaayi wa Rekabu, mwamihi wa Bezi-Hakeremu yumbaka vushia Kirivwa cha Mandu. Yavika virivwa mu vogono vwavio kandi naviika mu miruguyu ni vivohero vwukuhanira kirivwa.

¹⁵ Shalumu muyaayi wa Kolihoze, mwamihi wa Mizipa yumbaka vuhia Kirivwa chi Kidaho. Yaanyinya inzira yikirivwa, naviika virivwa mu vogono vwavio, kandi naviika mu miruguyu kandi vivohero vwukuhanira kirivwa. Ha Lidavalia lia Shela yumbaka lidigi liakagatana nimilimi gwu vwami, kuli kuduuka ku vika viemilango kusulunguta kutura mu Lidaala linene lia Daudi.

¹⁶ Nehemia muyaayi wa Azibuku, mwamihi wo lovega lulala lwo losoma lwa Betezuru, yumbaka vuhia kedonye chalonda ku chi lidigi, kali kuduuka ku kilindwa cha Daudi, ha lidavalia, kandi kuduuka ha zinyumba zia vasikari vu vulwani.

Avandu vihiiri ya va Levi avayinziraa mulwumbaka lidigi

¹⁷ Avandu vihiri ya va Levi yava vumbaka vuhia vidieli vie lidigi vialonda ku: Rehumu muyaayi wa Bani yumbaka kidieli chalonda ku. Hashabia, mwamihi wi inusu yo losoma lulala lwi kivala cha Kelia, yumbaka Kidieli chalonda ku mu vogono vwi kivala chiche.

¹⁸ Bavai muyaayi wa Henadadi, mwamihi wi inusu yolosoma lwi kivala cha kelia, yumbaka Kidieli chalonda ku.

¹⁹ Ezeri muyaayi wa Jeshua, mwamihi wa Mizipa yumbaka kedonye chalonda ku ichaali imbiri wi inyumba yukuviika mu iviugi; kuduuka havundu hi lidigi liavodong'anila.

²⁰ Baruki muyaayi wa Zabai yumbaka kidieli chalonda ku kuzia kuduuka ha vwingiliru vwinyumba ya Ehashibu Musaalisi Munene.

²¹ Meremozi muyaayi wa Uria, mwisukulu wa Hakozi, yumbaka kidieli chalonda ku, kuduuka ku keheri chi inyumba ya Eliashibu yaduuka.

Avasaalisi vayinzira ku lidigi

²² Avasaalisi yava vumbaka vuhia vidieli vinyingi vie lidigi: Avasaalisi kutura havundu hakumbiriza Jerusalemi vumbaka kidieli kelonda ku;

²³ Benjamini na Hashubu vumbaka kidieli chi lidigi lialonda ku, ichaali imbiri wi zinyumba ziavo. Azaria, muyaayi wa Maaseia na mwisukulu wa Anania, yumbaka kidieli chalonda ku, ichaali imbiri wi inyumba yeeye.

²⁴ Binui muyaayi wa Henadadi yumbaka vuhia kidieli chalondaku, kutura ku inyumba ya Azaria kuduuka ha, kona yi lidigi.

²⁵ Na Palali muyaayi wa Uzai yayinzira kolovega lohenza kegodi chi lidigi kandi munara gwayeka ichova kutura ilushia wi inyumba yu mwami ahimbi nu mugizi gwa vasikari. Walonda ku yaali, Pedaya muyaayi wa Paroshi

²⁶ na vatumikiri vumulitembeli avamenyaa ku kagulu ka Ofeli vumbaki vuhia kuduuka havundu hahenza Kirivwa cha Mazi kuzia ivugwi kandi munara gwayeka ichova.

Avumbaki vandi

²⁷ Avasaza kutura Tekoa, vumbaka vuhia kidieli chalonda ku, kutura munara munene ugwayeka ichova kuduuka ku lidigi lia Ofeli.

²⁸ Igulu wi Kirivwa chi Zibarasi, avasaalisi vumbaka vuhia, sa mulala yumbaka imbiri wi inyumba yeye mwene.

²⁹ Zadoku muyaayi wa Imeri yumbaka vuhia kidieli chahenzana ninyumba yeeye. Uwalonda ku yaali, Shemaya muyaayi wa Shekania, mulindi ha Kirivwa cha Ivugwi, yumbaka vuhia kidieli chalonda ku.

³⁰ Hanania muyaayi wa Shelemia, na Hanuni, muyaayi okola sita wa Zalafu, vumbaka kedonye chalondaku. Meshulami muyaayi wa Berekia yumbaka vuhia kedonye chalonda ku, ichaali imbiri vwi inyumba yeye.

³¹ Malikija, mulala ku avatuli vi izahabu, yumbaka kedonye chalonda ku, kuzia kuduuka ku inyumba ya vatumikiri vi Litembeli kandi avakiranyi, yaali ha kirivwa cha Mifekadi, ahimbi ne keng'oze chaali igulu wa Ivaale wi ivugwi wi lidigi.

³² Avatuli vi izahabu na avakiranyi vumbaka vuhia kendonye chukumaliriza, kutura ku keng'oze keveeye hakona yi lidigi kuduuka ha Kirivwa cha Magondi.