Nehemia 13 - KITABU KITAKATIFU

Lieyahula kutura ku vageni

¹ Lwa Lilaga lia Musa liali ni lisomaa vudinyu vaduuka ku luvaso lovoolaa, Umuamoni kinga Umumoabu siaveeye numunwa kwingira mu livugana lia avandu va Nyasaye kali hakuzu mba.

² Kivuni chaali ndi avandu va Amoni na Moabu sivahaana ichukulia na mazi ku avandu va Isiraeli lwa vaali kologendo lwavo kutura Egebeti mba. Mu vogono yivwo vaatunga Balaamu amabese ukulama Isiraeli, navuzwa Nyasaye wiitu yagirung'anyia kilaamo zana kuva vugasu.

³ Lwa avandu va Isiraeli vahulira makuva gi Lilaga yili nilisomwa, vatuliza avageni vosi hagati haavo.

Vindu via Nehemia yaleeta Vihia

⁴ Musaalisi Eliashibu, uwasingiliraa ving'ozi via mavikiru gi Litembeli, ku ing'inga indambi, yaali muliiva lilahi ligali na Tobia.

⁵ Yavugilira Tobia atumikiri keng'oze kenene ichatumikiraa maziambiri ku livikwa mu vihaanwa viu vuswage kandi kimuli, iviju viatumikaa mu Litembeli, vihaanwa via avasaalisi, izaka yuvuswage, iwaini kandi maguta ga muzeituni agahevwa vandu va Levi, avimbi vu mu Litembeli, kandi avalindi vi virivwa vie Litembeli.

⁶ Navuzwa lwayaga goosi gaali nigekolekaa, inzi sindali nimbeeye mu Jerusalemi mba; kigira mu muhiga gwa 32 gwi liamiiha liu mwami Aritasakises wa Babiloni, ndaali ninzirani ku mwami kumumanyia amakuva gi miyinzi. Inyima wi ing'inga engekeeke mwami yamba munwa

⁷ ma ninzirana Jerusalemi. Uwene yeyo, ndagenya konyoora ndi Eliashibu yaali navugiliye Tobia kutumikira keng'oze mu migize ji Litembeli.

⁸ Ndavihilirwa ligali muno ma nisiuva ichova iviju vie inyumba viosi via Tobia.

⁹ Ndahaana malago ndi ving'oze viosi vitakaswe kigira muruka gwi idini, kandi iviju vie Litembeli, vihaanwa viuvuswage ni kimuli viranywe mu.

¹⁰ Kandi ndamanya ndi avimbi vu Mulitembeli na va Levi vandi vaali nivatuli Jerusalemi, kandi nivirani mu milimi jaavo, kigira avandu sivali nivahevwa iviukulia vivaduuka mba.

¹¹ Kunangwa, ndagondokera avanene na vamiihi nimbora, “Kigira ki Litembeli lilekeywe vuzwa?” Na ndaleta vandu va Levi na aviimbi harara mu Litembeli kandi nimbaviika ku miyinzi jaavo kandi.

¹² Maku avandu va Ivuyuda vosi vatangakoleta zizaka ziavo ziu vuswage, zie iwaini, na maguta ga muzeituni mu ving'oze via mavikiru.

¹³ Kandi ndatovora avasaza yava: Shelemia, musaalisi; Zadoku, mwigizi wi Lilaga; kandi Pedaya, umulevi ukusingilira ving'oze via mavikiru: Mukonyeleri wavo yaali Hanani, muyaayi wa Zakuri na mwisukulu wa Matania. Ndamanya ndi nyara kusuuvira avasaza yava kuva avasuuvirifu mu ligavula viukulia ku avayinziri vache vaavo.

¹⁴ Unzizulizi, O, Nyasaye wange, vindu viosi yivi, kandi vikolwa viange vilahi via inzi mali kokolera Litembeli liilio kandi kigira kukusigamira.

¹⁵ Mu madiku yago, ndaalora avandu mu Ivuyuda nivamiinaa makuyu ga mazabibu ku Lidiku lie Lisabato. Avandi vaali nivaleeta uvuswage nuviika ku zibunda, harara ni iwaini, mazabibu, makuyu, nimisigo jindi josi. Na vaali nivajiletaa mu Jerusalemi ku lidiku lie Lisabato. Kunangwa ndaviganihiza vavuli kuguliza kindu choosi ku lidiku lie Lisabato.

¹⁶ Avasaza valala kutura mu lidaala linene lia Tiro vaali nivamenyi mu Jerusalemi, na valeta zisuzi ni vindi vie zing'ano ziosi mu lidaala linene kugulizira avandu ku lidiku lie Lisabato.

¹⁷ Ndagondokera aviimiliri va Vayuda nimbora, “Heenzi ku uvudamanu vwa mukoraa! Munyi mukoraa lisabato kuva ilitali litakatifu.

¹⁸ Yiki nicho chagira Nyasaye nahana amageri ku avaguuga vinyu lwa yaleeta lidiviza ku lidaala linene yili. Navuzwa munyi muzizagiliraa kokora uvutima vwa Nyasaye komeda kuuza ku Isiraeli ku liononyia Lisabato.”

¹⁹ Kunangwa ndahaana malago virivwa vie Lidaala linene vihanwe, lwa Lisabato litangaa, hamugorova kandi nonoho lwa isi itangaa kumwama, na vivuli kwigulwa kuduuka lwa Lisabato liiva niliakafa. Ndaviika valala ku vasaza vange vandaali navo ha virivwa, okolola ndi musigo kali mulala guvuli koleetwa mu lidaala linene ku lidiku lie Lisabato.

²⁰ Lulala anoho kaviri, avakiranyi na vagulizi vi viju vie zing'ano ziosi vagona ichova wa madigi gi lidaala linene ku lidiku liu mulwa katano vudiku.

²¹ Ndaviganihiza, “Simufana vulahi munyi kulindilira ichova yeyo kuduuka lwa vucha mba. Niiva mugerizaa kokora ndio, kandi, ndatumikira zinguru ku munyi.” Kutura lwene yilwo siviirana kuuza mu lidaala linene ku lidiku lie Lisabato mba.

²² Maku ndalaga vandu va Levi vitakase na vazie kuliinda virivwa ku vaduuki kolola ndi Lisabato likoleywe kuva litakatifu. Unzizulizi, O, Nyasaye wange, kigira yaga kandi, na omberere kigira ovonene vwi zimbavasi zizio.

²³ Ku ing'inga yeyo, ndaanyoora ndi vasaza avanyingi Vayuda vaali nivaleeta avakali kutura Ashidodi, Amoni kandi Moabu.

²⁴ Inusu ya avana vaavo vamoloma lulimi lwa Ashidoni anoho lulimi lundi na sivamanya komoloma ululimi lwiitu mba.

²⁵ Ndavagondokera nukuvalaama, niimbakuya, nukumanyula masu gaavo. Maku ndaaviisuuhiza mu lieta lia Nyasaye ndi yavo kinga avana vaavo sivalaletana kandi na avageni kali hakuzu mba.

²⁶ Ndaavoora, “Vaali avakari vageni avalomba mwami Solomoni naakora uvwoni. Yaali mundu munene ligali kuvita avami vandi vi zihiiri zindi. Nyasaye yamuyanza kandi naamukora mwami ku Isiraeli yoosi na kali ndio avakali vageni vamuvika muvwoni.

²⁷ Kunangwa, na kunyi kandi, mwenya kolonde lifwana yili na kuvuli kuhulira Nyasaye ku lileeta avakali vageni?”

²⁸ Jehoyada yaali muyaayi wu Eliashibu, musaalisi munene; navuzwa mulala ku vayaayi va Jehoyada yaleeta mukaana wa Sanibalati, kutura mu lidaala lia Bezi-horoni. Kunangwa ndakunga Jehoyada kutura mu Jerusalemi.

²⁹ Wizulizi, O, Nyasaye wange, kuli avandu yavo vamali kwononyia miyinzi juvusaalisi ni lilagana lia walomba na vasaalisi kandi na vandu va Levi.

³⁰ Ndatakasa avandu kutura ku vindu viosi vigeni; ndalomba malago gu vuyinziri vwa vasaalisi na va Levi kunangwa sa mulala aduuki kumanya miyinzi jije;

³¹ Ndalohiza iziingu zitumikaa kigira kusamba vihaanwa zileetwe ku ing'inga indahi idukanaa, kandi kigira avandu koleta vihaanwa viavo viuvuswage vwukutanga namakuyu gukutanga kwenga. Unzizulizi yaga goosi, O, Nyasaye, na ongolere.