Nehemia 12 - KITABU KITAKATIFU

Amita ga Avasaalisi na vandu va Levi

¹ Yaga na amita ga Avasaalisi na vandu va Levi avilanaa kutura mu lihaminywa harara na Zerubabeli mwana wa Shealitieli harara nu musaalisi munene Joshua; Avasaalisi vaali: Seraya, Jeremia, Ezira,

² Amaria, Muluki, Hatushi,

³ Shekania, Rehumu, Meremozi,

⁴ Ido, Ginezoni, Abija,

⁵ Mijamini, Maadia, Biliga,

⁶ Shemaya, Joiaribu, Jedaya,

⁷ Selu, Amoki, Hilikia na Jedaya. Yava vaali aviimiliri va avasaalisi harara na avamwavo vaavo mu madiku gu musaalisi munene Joshua.

⁸ Avandu va Levi vaali: Jeshua, Binui, Kadimieli, Sherebia, Yuda, na Matania. Yava harara na vamwavo vaavo, vasingira liimba zinyimbu zio kuhaana lisandiza ku Nyasaye.

⁹ Bakibukia na Uno harara na vamwavo vaavo valomba kiduma chavugula izinyimbu kutura ku valeteleli.

Visukululwi vu musaalisi munene Joshua

¹⁰ Joshua yaali baba wa Joiakimu, na Joiakimu yaali baba wa Eliashibu, na Eliashibu yaali baba wa Jehoyada,

¹¹ na Jehoyada yaali baba wa Jonazani, na Jonazani yaali baba wa Jadua.

Aviimiliri vizinyumba ziu vusaalisi

¹² Lwa Joiakimu yaali musaalisi munene, yava nivo avaari aviimiliri vi zinyumba ziu uvusaalisi: Meraia yaali mwimiliri wi inyumba ya Seraya, Hanania yaali mwimiliri wi inyumba ya Jeremia.

¹³ Meshulami yaali mwimiliri wi inyumba ya Ezira, Jehohanani yaali mwimiliri wi inyumba ya Amaria,

¹⁴ Jonazani yaali mwimiliri wi inyumba ya Maluki, Josefu yaali mwimiliri wi inyumba ya Shebania,

¹⁵ Adina yaali mwimiliri wi inyumba ya Harimu, Helikali yaali mwimiliri wi inyumba ya Merayozi,

¹⁶ Zakaria yaali mwimiliri wi inyumba ya Ido, Meshulami yaali mwimiliri wi inyumba ya Ginezoni,

¹⁷ Zikiri yaali mwimiliri wi inyumba ya Abija na Miniamini, Pilitai yaali mwimiliri wi inyumba ya Moadia.

¹⁸ Shamua yaali mwimiliri wi inyumba ya Biliga, Jehonazani yaali mwimiliri wi inyumba ya Shemaya,

¹⁹ Matenai yaali mwimiliri wi inyumba ya Joiaribu, Uzi yaali mwimiliri wi inyumba ya Jedaya,

²⁰ Kalai yaali mwimiliri wi inyumba ya Salai, Ebari yaali mwimiliri wi inyumba ya Amoki,

²¹ Hashabia yaali mwimiliri wi inyumba ya Hilikia, na Nezaneli yaali mwimiliri wi inyumba ya Jedaya.

Amita ga Avasaalisi na vandu vi zinyumba zia va Levi

²² Amita ga Aviimiliri vizinyumba zia vandu va Levi na Avasaalisi gang'odwa mu vitabu mu ing'inga ya Avasaalisi avanene yava; Eliashibu, Jehoyada, Jonazani, na Jodua. Amita yaga galekela kong'odwa lwa Dariasi yaali mwami wa Pasia.

²³ Kunangwa, aviimiliri vizinyumba zia vandu va Levi gang'odwa mu kitabu cha makuva gi zing'inga zia kale kuduuka mu madiku gi likuza lia Jonazani mwisukulu wa Eliashibu.

Ligavula lie miyinzi mu Litembeli

²⁴ Mu vwimiliri vwa Hashabia, Sherebia, Jeshua, Binui na Kadimieli, avandu vi inyumba ya vandu va Levi vaviikwa mu viduma. Ku ing'inga indala, viduma viviri viimba zinyimbu ziu kuhaana lisandiza nu kwizominya Nyasaye kolondekana na Malago gu mwami Daudi mundu wa Nyasaye.

²⁵ Matania, Bakibukia, Obadia, Meshulami, Talimoni na Akubu vaali avasikari vukulinda ha virivwa vie ving'oze via mavikiru mu Litembeli.

²⁶ Vasaza yava vatumika mu ing'inga ya Joiakimu mwana wa Joshua, mwisukulu wa Jehozadaki, kandi mu ing'inga yi liamiiha lia Nehemia, kandi ing'inga ya Ezira musaalisi uwaali mwigizi wi lilaga lia Nyasaye.

Nehemia Yatakasa Lidigi lie Lidaala Linene

²⁷ Lwa Lidigi lie Lidaala Linene lia Jerusalemi liatakaswa, vandu va Levi valetwa kutura wavaali ni vamenyi kuza kusangaa mu Lisangala Lilitakaswa lie lidigi lie Lidaala, linene, mulimba zinyimbu ziu kusandiza Nyasaye nu vukana na madungu.

²⁸ Avimbi vi zinyumba kutura mu vandu va Levi vivungiza harara kutura havundu hoosi havaali ni vamenyi mu Jerusalemi kandi mu madaala gandi makekeeke mu Netofa,

²⁹ kandi kutura mu Bezigiligali, Geba, na Azimavezi.

³⁰ Avandu va Levi harara na Avasaalisi vakora muruka gwi litakasa aveene, kandi kutakasa avandu, virivwa harara na madigi ga madaala manene.

³¹ Maku, ndavuganyia aviimiliri vi Ivuyuda kwigulu kwi lidigi, kandi ndavaviika vave aviimiliri vi viduma viviri vinene vagenda kovodong'ana lidaala linene ni vahaana lisandiza ku Nyasaye. Kiduma chu kutanga chazia ku luvega lwomukono mulungi igulu wi lidigi ku luvega lwi Kirivwa cha Amandu, na

³² Hoshaya yavalonda inyima, wa vimbi yazia, na inusu ya aviimiliri vi Ivuyuda vamulonda.

³³ Azaria, Ezira, Meshulami,

³⁴ Yuda, Benjamini, Shemaya, na Jeremia,

³⁵ kandi na avalala ku avana va avasaalisi ni visiliva; Zakaria mwana wa Jonazani, mwisukulu wa Shemaya. Kandi vaali harara na vaguuga vaavo: Matania, Mikaya, na Zakuri wi inyumba ya Asafu.

³⁶ Kandi vaali harara na avandu vandi avinyumba ya Zakaria: Shemaya, Azareli, Milalai, Gilalai, Maai, Nezaneli, Yuda, na Hanania. Yava vosi vaali ni vagingi iviju viu kwimba viu lugano lwa Daudi umundu wa Nyasaye, na mung'odi Ezira yaali mwimiliri wi kiduma yiki.

³⁷ Ha kirivwa chi kisinukiru, vanina ku vika ni vazia mu lidaala linene lia Daudi, ni vazia kuvita ku inyumba yu vwami vwa Daudi, kandi nivilana ha lidigi, Kirivwa cha Mazi ku lovega lwi lidaala linene lie Ivugwi.

³⁸ Kiduma kindi cha yavo avahaana lisandiza ku Nyasaye vazia ku lovega lundi lwu mukono mumosi, kuvitira igulu wi lidigi kandi ndalondaku ni inusu yindi yikiduma chavandu. Kwageenda kuvitaa ha munara gwa mahiga, kwazia kuduuka ku lidigi ligaramu,

³⁹ na kutura hene yaho, kwazia ni kuvitaa kirivwa cha Efuraimu, kirivwa cha Jeshana, kirivwa chi Zisuzi, munara gwa Hananeli, kandi munara gwa miamoja kuduuka ku kirivwa cha magondi. Kwalekera ligenda liitu ahimbi ni kirivwa chi Litembeli.

⁴⁰ Kunangwa viduma viombi via mavugano iviali nivihaanaa lisandiza ku Nyasaye, viaduuka mu mugizi gwi Litembeli. Komeeda ku inusu ya aviimiliri avaari harara niinzi,

⁴¹ kiduma change chaali harara na avasaalisi yava, nivakubaa visiliva viavo: Eliakimu, Maaseia, Miniamini, Mikala Elianai, Zakaria kandi Hanania;

⁴² kandi Maaseia, Shemaya, Elieza, Uzi, Jehohanani, Malikija, Elamu, na Ezeri valondaku. Jezirahia yimilira avimbi avimbaa vudinyu nu mwoyo munene ligali.

⁴³ Lidiku yilio, vahaana visiuviliru vinyingi, na avandu vizura vusangali vonene ligali kigira Nyasaye yaali navakoli kuva nu vuyanzi ligali. Avakali na avana vasanga mu lisangala zana, kandi liyoga lia valomba liahulirika kuduuka ihale na ihale.

Lietegekera Lisigamira mu Litembeli

⁴⁴ Mu ing'inga yeyo, avasaza vaatovolwa kusingilira ving'oze via mavikiru, gu uvwihaani vwi Litembeli vwaviikwa; harara ni zizaka, uvuswage vwukutanga, na makuyu gukutanga kwenga vuli muhiga. Kutura mu milimi jaali ahimbi na madaala, gavadukiraa valeete mu mavikiru gi zinyumba zie Litembeli vidieli vienyangwa ku Lilaga, avasaalisi na va Levi vahevwe, kigira avandu vosi va Ivuyuda vayanzizwa na vasaalisi kandi na vandu va Levi.

⁴⁵ Vaakora miruka ju kutakasa kandi ni miruka jindi ja Nyasaye yaali na valagi. Aviimbi vu mu Litembeli na valindi vilitembeli vakora jaavo kolondekana na malago gu mwami Daudi nu muyaayi weve Solomoni.

⁴⁶ Kutura ing'inga yu mwami Daudi, nu mwimbi Asafu, kale ligali muno, aviimbi vimilira zinyimbu zie lisandiza ku Nyasaye.

⁴⁷ Mu ing'inga ya Zerubabeli, kandi mu ing'inga ya Nehemia, avandu vosi va Isiraeli vaahana vihaanwa vuli lidiku kigira likonyelera lia avimbi vu Mulitembeli, kandi na avasikari vukulinda Litembeli. Avandu vaahana kihanwa kitakatifu ku avandu va Levi, na vandu va Levi navo vahaana kedonye chenyekaa ku Avasaalisi.