Nehemia 11 - KITABU KITAKATIFU

Avandu vamenya mu Jerusalemi:

¹ Avanene vavandu vamenya mu Jerusalemi, na avandu vandi vakuba ikura kotovola avinyumba indala kutura mu zinyumba 10 vaze komenya mu lidaala litakatifu lia Jerusalemi; na zinyumba zindi zitigaye, vamenye mu madaala gandi manene na makekeeke.

² Avandu vasandiza umundu wundi vosi avihaana komenya mu Jerusalemi.

³ Mu madaala manene gandi na madaala makekeeke, avandu va Isiraeli, avasaalisi, vandu va Levi, avasaza vayinziri mu Litembeli, na visukululwi va avatumikiri va Solomoni vamenya mu miandu jiavo vene mu madaala makekeeke gaavo. Yava nivo avandu vo losoma lwi kivala chi Ivuyuda avamenyaa mu Jerusalemi:

⁴ Avandu vi ihiiri ya Yuda ni yava; Azaia mwana wa Uzia kandi mwisukulu wa Zakaria. Avaguuga veve vandi vaali; Amaria, Shefatia kandi Mahalali, ni visukululwi va avana va Perezi.

⁵ Maaseia, mwana wa Baruki, kandi mwisukulu wa Kolihoze. Avaguuga veve vandi vaali Hazaia, Adaia, Joiaribu na Zakaria, ivisukulurwi va Shela mwana wa Yuda.

⁶ Ivisukulurwi vosi va Perezi avamenyaa mu Jerusalemi vaali avasaza avaluviriri 468.

⁷ Avandu vi ihiiri ya Benjamini ni yava: Salu, mwana wa Meshulami kandi mwisukulu wa Yoedi. Avaguuga veve vandi vaali; Pedaya, Kolaia, Maaseia, Izieli na Jeshaia.

⁸ Gabai na Salai vaali aviiko va Salu va himbi ligali. Avandu vosi vi ihiiri ya Benjamini avamenya mu Jerusalemi vaali 928.

⁹ Joeli mwana wa Zikiri yaali mwimiliri wavo, na Yuda mwana wa Hasenua yaali munene wa kaviri mu Lidaala Linene.

¹⁰ Avasaalisi vaali Jedaya mwana wa Joiaribu harara na Jakini.

¹¹ Seraya mwana Hilikia, kandi mwisukulu wa Meshulami. Avaguuga veve vaali; Zadoku, Merayozi kandi Ahitubu uwaali musaalisi munene.

¹² Avandu vosi vi inyumba ya avasaalisi vaali avatumikaa mu Litembeli vaali 822. Avandu vi inyumba ya Adaia mwana wa Jerohamu, mwisukulu wa Pelelia, vaali harara na avaguuga veve; Amuzi, Zakaria, Pashuri na Malikija.

¹³ Avandu vi inyumba ya Adaya vosi vaali 242, kandi vosi vaali aviimiliri vi zinyumba zindi. Avandu vi inyumba ya Amashisai, mwana wa Azareli mwisukulu wa Ahazi, vaali harara na avaguuga veve Meshilemozi na Imari.

¹⁴ Avandu vosi vi inyumba yiyi vaali 128, vosi vaali avasikari avaluviriri; mwimiliri wavo yaali Zabidieli mwana wa Hagedolimi winyumba yaali enenene.

¹⁵ Avandu vi ihiiri ya vandu va Levi vaali: Shemaya, mwana wa Hashubu, mwisukulu wa Azirikamu. Vaali harara na avaguuga veve Hashabia na Buni.

¹⁶ Shabezai na Jozabadi vaali avanene va vandu va Levi, vasingilira miyinzi ichova wi Litembeli lia Nyasaye.

¹⁷ Matania mwana wa Mika, mwisukulu wa Zabadi, wi kisukururwi cha Asafu, yaali mwimiliri wi ikwaya yukwimba zinyimbu zielisaala liu kusandiza. Bakibukia uwaali mulondi wakaviri ku Matania, na Abida mwana wa Shamua mwisukulu wa Galali, kisukururwi cha Jeduzuni.

¹⁸ Avandu vosi vi Ihiiri ya vandu va Levi avamenyaa mu lidaala linene litakatifu lia Jerusalemi vaali 284.

¹⁹ Avasikari valinda viribwa vie Litembeli vaali: Akubi, Talimoni, harara na aviiko vaavo. Vosi vaali 172.

²⁰ Avandu vandi vosi va Isiraeli harara na Avasaalisi na vandu va Levi avatigara vamenya ku miandu jiavo aveene mu madaala gandi amanene na madaala makekeeke gi Ivuyuda.

²¹ Avasaza avayinziri vi Litembeli vamenya ku lovega lundi lwa Jerusalemi lwalangwa Ofeli. Vaakora miyinzi hasi hu vunyali vwa ziha na Gishipa.

²² Munene wa avandu vi ihiiri ya vandu va Levi avamenyaa mu Jerusalemi yaali Uzi mwana wa Bani, mwisukulu wa Hashabia. Avaguuga veve vaali Matania na baba, weve Mika kutura munyumba ya Asafu avandu vaali nuvunyari vwu kwimba zinyimbu mu vutumiki vwi Litembeli.

²³ Gaaliho amalago kutura ku mwami gavoora kuli avizinyumba kolondekana ni miyinzi jiu vwimbi vwa vuli lidiku mu vutumwa vwi Litembeli.

²⁴ Pezahia mwana wa Meshezabeli, uwaali wi inyumba ya Zera kandi wi ihiiri yi Ivuyuda, yasingira muvugono vwa vandu va Isiraeli mu viina viu mwami:

Avandu mu madaala gandi amanene na makekeeke

²⁵ Avandu vanyingi vamenya mu madaala makekeeke ahimbi ni milimi jiavo. Yavo avaari vi ihiiri ya Yuda vamenya mu madaala ga Kiriazi Ariba, Diboni, na Jekabizeeli, kandi na madaala gandi makekeeke agali ahimbi.

²⁶ Kandi vamenya mu madaala manene ga Jeshua, Molada, Bezifete,

²⁷ Hazarishuali, Beerisheba kandi madaala makekeeke ga likumberiza,

²⁸ kandi vamenya mu madaala manene ga Zikilaga, Mekona na madaala galio makekeeke,

²⁹ Enirimoni, Zora, Yaramuzi,

³⁰ Zanoa, Adulamu, Lakishi, na Azeka kandi na madaala galio makekeeke. Avandu yava vamenya mu kivala hagati ha Beerisheba mu lovega lwa Isavaalu nu mulivona lia Hinomu mu lovega lwa Ivaale.

³¹ Avandu vi ihiiri ya Benjamini vamenya mu Geba, Mikimashi, Aija, Bezeli na madaala galio makekeeke,

³² Anazozi, Nobu, Anania,

³³ Hazori, Rama, Gitaimu,

³⁴ Hadidi, Zeboiimu, Nebalati,

³⁵ Lodi, na Ono, nu mivona lia avasaza avasiza.

³⁶ Kiduma kilala chi Ihiiri ya vandu va Levi avaari ni vamenyi mu kivala chi Ivuyuda, vahambanywa komenya harara ni Ihiiri ya Benjamini.