Nehemia 1 - KITABU KITAKATIFU

¹ Yili ni livaala lie vikolwa vilahi via Nehemia muyaayi wa Hakalia yatwekiza: Mu mweli gwa Kisilevu mu muhiga gwa sirini gwa Aritasakises yaali mwami wa Pasia, Inzi, Nehemia ndaali mu Susa, lidaala linene.

Uvuha vwa Nehemia kigira Jerusalemi

² Hanani, mulala ku avamwavo vange yaazaa kutura Ivuyuda harara nu muganda gwa avandu vandi, na ndavateveleriza amakuva ga Vayuda vaatigara, avahononoka kutura ku liadikizwa. Ma kandi amakuva ga Jerusalemi.

³ Vambolera ndi, yavo avaahonona ku liadikizwa ni vatigara yengo, vaveeye mu kivi kenene kandi mu zisoni ligali. Lidigi lia Jerusalemi liasambulwa, na Ivirivwa vialio viamala kusambwa numuliru.

⁴ Lwa ndahulira makuva yaga goosi, ndikala hasi nindiira ligali. Ndasioma nu kuzizagilira kohonga lilia kandi. Ndasaara imbiri wa Nyasaye wu mwigulu madiku manyingi.

⁵ Maku ndaavoora: “O, Yahova, Nyasaye wu mwigulu, Nyasaye munene kandi kwosi kokoheza uluyali lonene ligali. Ivi udukiza lilagana liilio nu vusuuvirifu, ku yavo avakuyanza kandi avahulira malago googo,

⁶ Mbenza O, Yahova na uhuliri lisaala liange lwa salira avatumikiri vovo, avandu va Isiraeli, mbasu nuvudiku. Nziyamaa ndi kunyi, avandu va Isiraeli harara na avaguuga viitu kwa kola vwoni imbiri woovo.

⁷ Kumali kokora vuchamu ligali ku ivi. Sikugumiyi malago, likalaga kinga miima ja wakuha kuvitira mu mutumikiri woovo Musa mba.

⁸ Mwaza ngusaala, yizuliza kalunu likuva lia walaga mutumikiri woovo Musa, noovoola, ‘Niiva munyi avandu va Isiraeli mulavula kuva avasuuvirifu ku inzi, ndamusalanyia hagati ha avandu vi zihiiri zindi.

⁹ Navuzwa niiva mulirana ku inzi, nukuhulira malago gange, ahene yaho kali niiva avandu vinyu vasalanywa vaveeye ihale ligali ku keheri chi lirova, ndavavungiza kutura yo kandi mbaleete havundu ha inzi ndovoye nduuki kusigamirwa.’

¹⁰ “O, Yahova, yava vaveeye avatumikiri vovo, avandu vovo. Ivi wavahonyia ni zinguru zizio.

¹¹ O, Yahova, hulira lisaala liange kandi lisaala lia vatumikiri vovo vosi avenyaa kuhaana luyali ku ivi. Yaanza ungasize kalunu, inzi mutumikiri woovo, okole mwami ambeere zimbavasi.” Mu madiku yago ndaali musingiliri wi iwaini yu mwami.