Nahum 3 - KITABU KITAKATIFU

Amageri ku Nineve

¹ O, vayaayi, kivi keveeye ku lidaala liu vugadi kandi lilumindi! Liizula vutugi vunyala kulanywa kandi kuvugulwa!

² Huliriza likinduka lie imbimbu! Muliviti gwa magurudumu ga magare, ligenda lie zibarasi, litumagila lia magare gu vulwani.

³ Avasaza vi zibarasi ziu vulwani vingilira, vivavi na matimu vihemahemaa! Miviri javakuzu jivungi kuli kitumi, miviri minyingi ligali jitanyala kuvalizwa. Avandu vagenda ni vikigitara kujo!

⁴ Munyi avandu va Nineve, muveeye vuzwa kuli amalaya mutumikiraa ovologi nu vusigitiri kuyaanziza kandi kotega zihiiri.

⁵ Yahova Wuvunyali avoora, “Ndakahaane mageri ku munyi avandu va Nineve, ndakamunavuuli na ndakaleke zihiiri zilole viahonyo vienyu mu zisoni.

⁶ Ndakamuchaye kandi ndakaleete vugundu ku munyi. Avandu valakamuhenze nuvuti vunyingi.

⁷ Yavo vosi avalimulola valakegose, valakavoole, ‘Lidaala lia Nineve litigaye amangaye! Nivwaha unyala kulivelerera? Nivwaha unyala koleminya vandu valio mwoyo?’ ”

⁸ Nineve liveeye lidaala lilahii kuvita Zebesi, Lidaala linene lia Egebeti? Lidaala yili liali kandi nu mugera gwalikingaa kuli lidiji: Mugera gwa Naili gwaali imbinga yalio.

⁹ Lidaala yili liamiihaa Ezopia kandi Egebeti. Si haali ho ne kegero kuzinguru ziu vwamihi vwalio mba, lidaala lia Libia liali nu vuhambani vwalio.

¹⁰ Navuzwa vandu va Zebesi vaahirwa mu vuhambe. Avana vaavo vaakuywa nivakuzira muvuli zikona zie zinzira. Aviimiliri valio avasaza vavugulwa nivavoheywe minyororo ni vagavulanyirwa hagati ku vasigu vaavo.

¹¹ Munyi avandu va Nineve, mulakahambiki! Mulakagelizi kwiluka kutura ku vasigu vinyu.

¹² Zimbinga zienyu ziosi zilakave kuli misaala ja makuyu amengu; nusungusa misaala yiji likuyu lialavunguluka mu munwa gwugwo!

¹³ Avasikari vinyu vaveeye kuli avakali, kandi kivala chiinyu keveeye vugira likingwa imbiri wa vasigu vinyu. Muliru guladiviza miluguyu jihaana virivwa vienyu.

¹⁴ Mudahe amazi manyingi kandi mwetegeke ku likumberizwa; mulombe zimbinga zive ni zinguru! Musienye lidohi, mulombe madafari, kandi mwetegekizi kindu cho kolongeraku.

¹⁵ Kali mugerizi kuli munyala, mulasambwa kuduuka lwa mukuza, anaho mulitirwa mu vulwani. Muladivizwa kuli vitagwa viliviywi ni zisigi. Munyi mwameedeka kuli zisigi.

¹⁶ Avakiranyi vinyu vameedeka kuvita zing'ereng'ani ziumwigulu! Navuzwa kalunu vamali kuzia kuli zisigi ziburukaa ma zizia ihale.

¹⁷ Aviimiliri vinyu vaveeye kuli kiduma cha madagala, na vanene vinyu vaveeye kuli kiduma chi zisigi ziveeye ku madiji mu lidiku liu vukindu. Navuzwa lwu muvasu guvalaa, ziburukaa ma zizia ihale. Siaveeyeho nu mundu umanyi wa ziziyi mba!

¹⁸ Avami va Asiria, avamihi vinyu vamali kukuza, kandi avatumikiri vinyu vamali kukuza mihiga ni mihiga! Avandu vinyu vasalanyiywi ku vigulu. Siaveeyeho nu mundu unyala kuvavungiza kandi mba.

¹⁹ Avulaho mundu unyala kohonyia lisalirizwa lienyu, kandi zingwagu zienyu sizinyala kohona mba. Avandu vosi avahulira makuva kigira lidivizwa lienyu, vakubagaa makono gaavo ni vasangara. Siaveeyeho numundu wahononoka kutura mu vusaliri yivu vutaveeye ne keheri mba.