Nahum 2 - KITABU KITAKATIFU

Liigwa lia Nineve

¹ Munyi avandu va Nineve, mu veeye mu vuhimwa vwu kwingilirwa! Avasigu valimudiviza vamali kuduuka ku munyi. Mwelohizi kuli munyala kwikinga! Mulindi zinzira! Mwetegeke ku vulwani!

² Yahova aveeye ahimbi kwilanyia vukumi vwa Isiraeli, kuli vaali kale avasigu vaavo ni vakikiri kuvadiviza.

³ Avasikari va vasigu vaginga zinguva zinzakanyu kandi vivikaa zinguvu zinzakanyu. Velohizaa kuzia kwingilira! Amagare ga mahi gaavo gahemahemaa kuli muliru! Zibarasi ziavo zitumatuma!

⁴ Amagare ga mahi ganyagulaa zimbiru mu zinzira, ganyagulaa zimbiru yiyi ni yiyi mu lidaala linene. Gakaa kuli zitochi, kandi ganyagulaa zimbiru kuli oloheni.

⁵ Alaangaa miganda ja vasikari veve, navuzwa vagenda ni visigatira kunzira. Vanyagura kuzia ku lidigi lie lidaala; vetegeki ni zinguva ziavo ziu vulwani.

⁶ Virivwa viveeye ahimbi nu mugera viguliki, inyumba yu vwami imali kugwa.

⁷ Mwami wi kikali ahiliywi mu vuhambe; Avatumikiri veve vasioma kuli amakuulu kandi vaduya vilitu viavo muvovereri.

⁸ Avandu virukaa kutura mu lidaala lia Nineve, kuli amazi gaturaa mu lidavalia limali kufuduka. Lihanzuka lihulirikaa, “Singiri! Singiri!” navuzwa avulaho mundu kali mulala wirana.

⁹ Mulanye ifeza! Mulanye izahabu! Livikiru lie lidaala lizuuyi vindu viu vuguli!

¹⁰ Lidaala lia Nineve limali kudivizwa, limali kolekwa kandi litigaye hazwa! Avandu vizuyi uvuti, amalu gaavo gadegeraa, kandi zinguru ziavo zifeye. Mumoni mwavo kusamuka.

¹¹ Kalunu lidaala linene lialange kuli luhangaywa lwi zisimba ziamenya mu liveeye haliki? Havundu hi zisimba zisoleri zialiraa, havundu hi zisaza ni zingali ziali zinyala kuzia kandi havundu ha vana vazio vaali vanyara kuva mu mirembe?

¹² Isimba isaza yitaa inyama yayo, ma itandulanya mu vidonye, ma igavulira zisimba zingali harara na vana vayo. Yizuliza luhangaywa lwayo ni vidonye vie zinyama.

¹³ Yahova Wuvunyali avoora, “Inzi mbeeye musigu winyu! Ndakasambe magare ginyu gu vulwani. Avasikari vinyu valakitirwi mu vulwani, kandi ndakavuguli vuli kindu choosi cha mwavugula kutura ku vasigu vinyu. Lienya lia vatumwa vinyu sililakahuliriki kandi mba.”