Mika 5 - KITABU KITAKATIFU

¹ Munyi avandu va Jerusalemi, vungizi amahi ginyu! Kukumbiriziywi niliihi linene na vingilira nukukuya umwimiliri wa Isiraeli ku lusaya.

Nyasaye avalaga mwami kutura Bezelehemu

² Yahova avoora, “Ivi Bezelehemu Efurate, oveeye mulala ku madaala makekeeke mu Ivuyuda, navuzwa kutura ku ivi, alaza mu Isiraeli mwamihi, uwa avinyumba yeeye vaali ho kutura zing'inga zia kale.”

³ Kunangwa Yahova alaleka vandu veve ku avasigu vaavo kuduuka lwu mukali aliivula mwana muyaayi weve. Maku avandu Vaisiraeli avaveeye mu vuhambe valakahambanywe harara na vandu vaavo.

⁴ Lwa aliiza, alakamiihi avandu veve nizinguru zitulaa ku Yahova kandi nuvunyari vwa Yahova Nyasaye mwene. Avandu veve valakamenyee mu mirembe kigira vandu kutura mu lirova liosi valakamanya ovonene vwivwe, kandi alaleeta mirembe.

Ovohonyi kandi Amageri

⁵ Gulakave murembe lwa avandu va Asiria valiza mu kivala chietu, kandi nukuvunanyia zimbinga zietu, kulatuma avanene saba kandi aviimiliri viitu vi zinguru ligali munane ukulwaana navo.

⁶ Valakamihi kivala cha Asiria nikivavi; kandi kivala cha Nimurodi ni kivavi chetegeki kotema. Valakakohonye kutura ku vandu va Siria lwa valingila kivala chietu, nukogenda mu zinzako zietu.

⁷ Avandu va Isiraeli avalitigala valakave kuli lime litulaa ku Yahova, kuli ulunyilira ku vitagwa vivirukaa. Valeeleda ku Nyasaye, sivalakelede ku mundu mba.

⁸ Yavo avalilekwa hagati hi zihiiri valava kuli isimba ihiimaa chukulia mu mulitu anoho ichayo: ichenyola hagati ha magondi, ituuma kucho, kandi igatandulanyia mu vidonye; kandi sihaveeyeho nunyala kugahonyia mba.

⁹ Isiraeli valakaguuti avasigu vaavo kandi valakavahonye vosi.

¹⁰ Yahova avoora, “Mu lidiku yilio, ndatuliza ho zibarasi zienyu nukwononyia magare ginyu gu vulwani.

¹¹ Ndakononyie madaala manene mu kivala chienyu nukusambula zimbinga zienyu.

¹² Ndakononyie zinguru ziuvukumu zia mutumikiraa nukumuleka vugira avalaguli.

¹³ Ndanonyie vifananyi vienyu kandi minaara mitakatifu ja magina; simulasigamira kandi vindu via munyi vene mumali kolomba mba.

¹⁴ Ndakasambuli misambwa ju munyasaye wikikali Ashera mu kivala chienyu nukudiviza madaala manene ginyu.

¹⁵ Kandi mu vutima vwange vonene ligali, ndavanza kisaalia ku zihiiri ziosi iziavula kutia inzi.”