Mika 4 - KITABU KITAKATIFU

Liamiiha lia Yahova lio murembe niligasizwa

¹ Mu madiku gaaza mukigulu chi Litembeli liumbakwa, kilakave kiguru kitambi ligali kuvita vigulu vindi viosi. Zihiiri zinyingi zilangunyana kuzia mu kiguru yiki,

² na avandu vaavo valavoora, “Gendi kuzie igulu ku kiguru cha Yahova, mu Litembeli lia Nyasaye wa avandu va Isiraeli. Kigira Nyasaye alakwigiza agayenya kunyi kokole; kulageenda mu zinzira ziayakotovolera. Kigira amigizu ga Yahova gaturaa mu Lidaala linene lia Jerusalemi; amolomaa ku avandu veve kutura ziyoni.”

³ Yahova alakalaga hagati hi zihiiri zinyingi, kandi alaleeta mirembe hagati hi zihiiri zie zinguru zinene ahimbi ni ihale. Valatura vivavi viavo kolomba zimbago na amatimu gaavo kolomba mihizu ju kuhalulira. Zihiiri sizilazia muvulwani kandi, sivaletegeka ku vulwani kali hakuzu kandi mba.

⁴ Navutswa vandu vosi valamenya mu mirembe hagati he milimi je mizabibu jije ni misaala ji mikuyu, na sihalavaho nu mundu kali mulala unyala kuvatihiza mba. Yahova Wuvunyali umali kulaga yaga.

⁵ Vuli ihiiri ilasigamira nukutia vasigamira mu liitia umunyasaye waavo, navuzwa kunyi kurasigamira nu kutia Yahova Nyasaye wiitu mihiga ni mihiga.

Avandu va Isiraeli valilana kutura mu Vuhambe

⁶ Yahova avoora, “Lidiku liza lwandivungiza harara avalema, nukuvungiza yavo avakungwa kandi, yavo avamali kuha amaduywa;

⁷ Vakolwa avalema kandi vaveeye ihale kutura mu zingo ziavo, navuzwa ndalomba limenya lihia harara niyavo avamala kohononoka, na valagwa ihiiri yizingulu. Inze Yahova ndavamiiha ku kiguru zia Ziyoni kutura ing'inga yeyo kuduuka mihiga ni mihiga.”

⁸ Na Jerusalemi lidaala linene, ha Nyasaye aveeye kuli mwayi kulinda avandu veve, halava kandi lidaala linene lio vwami vwali uvwinyu.

⁹ Kigira ki mwaniraa vudinyu ligali? Kigira ki mukubaa kivi kuli mukali oveeye mulilumwa liumwana? Gaveeye kigira simuveeye nu mwami, na aviideri vinyu vaakuza?

¹⁰ Uzizagiliri kokenya nukukuba zikwiri, avandu va Jerusalemi, kuli mukali wiivula, kulwakalunu mulatula mu lidaala linene nokomenya ichova mukivala chere. Mulazia mu kivala cha Babiloni, navuzwa Yahova alamukinga ku avasigu vinyu.

¹¹ Zihiiri zinyingi zievungikizi ku mwingiliraa. Zivoolaa, “Lidaala linene lia Jerusalemi kuduuka liduuki kudivizwa! Kulalola lidaala linene yili ni ligwiyi amang'anye!”

¹² Navuzwa zihiiri yizi sizimanyi agaveeye mu zing'anagani zia Yahova mba. Si zimanyirizi ndi zivungiziywi harara kohevwa amageri kuli vuswage voletwa koloze ma vuhuulwa.

¹³ Yahova avoora, “Avandu vi lidaala linene lia Jerusalemi, muzie ma muhaane amageri ku vasigu vinyu! Ndamukora muve ni zinguru kuli igiriki eveeye ni zinziga zie kivia ne zimbagayu zie migasa. Mulashonoranyia zihiiri zinyingi, na mulaleetera inzi Yahova wi lirova liosi uvutugi vwa vanyoola mulitumikira zinguru.”